ዬ ማጻፋ 83

1 ኣቤት ጾሳዉ! ጮኡ ጎፓ! ሲርጲ ጎፓ! ኣቤት ጾሳዉ! ቄሊ ጎፓ! 2 ቤኣ! ኔ ሞርኬቲ ኔ ቦላ ዴንዲዳ፤ ኔና ኢጺዛይቲ ኔ ቦላ ባ ቆ ቃዳ። 3 ኢስቲ ኔ ኣሳ ቦላ ጌማን ጌኔ ዱላቲዳ፤ ኔኒ ሲቂዛ ኣሳታ ቦላ ማቄቲዳ። 4 ኢስቲ፥ «ሃ ዪቴ! ኢስታ ካዎቴ ይሶስ፤ ኢስራኤሌ ጌቴቲዛ ሱን ሜርናስ ሃሳኤቶንታ ማላ ኦስ» ጊዳ። 5 ኢስቲ ኢሲ ዎዚና ጊዲዲ ኢሲፌ ማቄቲዳ፤ ኔ ቦላ ዴንዳናስ ጫቄቲዳ። 6 ኢስቲካ ኤዶሜ ኣሳታ፥ ኢስማኤሌ ኣሳታ፥ ሞኣቤ ዛሬታ፥ ኣጋሪ ዛሬታ፥ 7 ጌባሌ ኣሳታ፥ ኣሞኔ ኣሳታ፥ ኣማሌቄ ኣሳታ፥ ፊሊስጼሜ ኣሳታኔ ጺሮሴ ኣሳታ። 8 ኣሶሬ ኣሳቲ ኢስታራ ኢሲፌቴ ሜዳ፤ ሎጼ ዛሬታስካ ማዶ ጊዲዳ። 9 ኔኒ ሚዲያሜ ኣሳታ ቦላ፥ ሲሳራኔ ያቢኔ ቦላ ቂሶኔ ሻፋን ኦዳ ማላ ኢስታ ቦላ ኦ። 10 ኢስቲ ኤን-ዶሬ ጌቴቲዛሶን ይዳ፤ ኢስታ ኣሃይ ሞጌቶንታ ቢታ ቦላ ዎቂዴስ። 11 ኦሬቤ ቦላኔ ዛኤቤ ቦላ ኦዳ ማላ ኢስታ ሃላቃታ ቦላ ኦ፤ ዜባሃኔ ጻልሙና ይሲዳ ማላ ኢስታ ሃሪዛይታካ ኔኒ ይሳ። 12 ሄይቲ፥ «ኑኒ ጾሳ ኣሳ ቢታ ኑስ ቡዞና» ጊዳይታ። 13 ኣቤት ታ ጾሳዉ! ኢስታ ጉዱላ ማላ ላላ፤ ጫርኮይ ኤፊዛ ሱላ ማላ ኦ። 14 ጻራጋይ ዎራ ሚዲ ዉርሲዛ ማላ፥ ታማ ላጮይ ዙማ ማይኢዛ ማላ፥ 15 ጎቴን ኔ ኢስታ ዳጋን፤ ኔ ኡሾንካ ኢስታ ዬዴ። 16 ኣቤት ጎዳዉ! ኣሳይ ኔ ሱን ኮያና ማላ ኔኒ ኢስታ ኣይፌሶ ዬላ ማይዛ። 17 ኢስቲ ሜርናስ ዬላቴቶ፤ ሂርጌቶኔ ካዉዪ ዬቶ። 18 ኔ ሱንይ ጎዳ ጊዲዳይሳኔ ሳኣ ኡባ ቦላ ኔኒ ጻላ ኡባፌ ቃ ጾሳ ጊዲዳይሳ ኢስቲ ኤሬቶ።