ዬ ማጻፋ 31

1 ኣቤት ጎዳዉ! ኔ ታስ ኩዋ ጊዳና ማላ ታ ኔኮ ያዲስ፤ ኣይዴካ ታና ዬላሶፓ፤ ኔ ጺሎቴን ታና ኣሻ። 2 ኔ ሃይ ታኮ ዛራ፤ ኤሶን ታና ኣሻ፤ ኔኒ ታና ጌንዛ ዛላ ጊዳ፤ ታና ኣሺዛ ሚኖ ሚጻ ታስ ጊዳ። 3 ኤ፥ ኔኒ ታስ ዛላ፤ ታ ኢዛን ጌላ ኣቲዛ ሚጻ፤ ኔ ሱን ጊሻስ ታኒ ባና ኦጌ ቤሳኔ ካሌ። 4 ኔኒ ታስ ዜምፖ ጊዲዛ ጊሻስ፥ ኢስቲ ታስ ዋጺ ዎዳ ናርጻፌ ታና ኔ ናጋ። 5 ኣቤት ጎዳዉ ቱሙ ጾሳዉ! ታኒ ታ ሼምፖ ኔ ኩሼን ሃዳራ ኢማይስ፤ ኔኒ ታና ዎዛ። 6 ፓንታ ኤቃታስ ጎይኒዛይታ ታኒ ኢጻይስ፤ ታኒ ጊዲኮ ጎዳን ኣማኔታይስ። 7 ታ ሜቶ ኔኒ ቤኢዳ ጊሻሲኔ ታ ቱጋ ኔኒ ኤሪዳ ጊሻስ ታኒ ኔ ሲቆን ኡፋዬታይስ። 8 ኔኒ ታና ታ ሞርኬታስ ኣ ኢማቤካ፤ ታ ቶሆታካ ኣሆ ሶሆን ኤሳዳሳ። 9 ኣቤት ጎዳዉ! ታኒ ሜቶን ጌላዲስ፤ ታስ ቃታ። ታኒ ዳሮ ሚሼታዲስ፤ ታ ኣይፌይ፥ ታ ኣሾይኔ ታ ሼምፖይ ዳቡርዴስ። 10 ታ ሼምፖያ ዋዬን ዳቡራዱስ፤ ታ ላይይካ ጬጬን ዉሪዴስ። ሜቶ ዳሮን ታ ዎልቃይ ጪንጊዴስ፤ ታ ሜቄቲካ ጊዶን ሴሪዳ። 11 ታ ሞርኬታ ኡባስ ታኒ ቂ ሚሽ ጊዳዲስ፤ ታ ሾሮታስ ሚሬስ ኣታዲስ፤ ታና ኤሪዛይታስ ካስ ጊዳዲስ፤ ኦጌን ታና ቤኢዳይቲካ ታፔ ባቃቴቴስ። 12 ታኒ ሃይቂዳ ኣሳ ማላ ዶጌታዲስ፤ ሞሆ ኦቶ ማላ ጊዳዲስ። 13 ታኒ ዳሮቲ ሳሱኬቲሺን ሲያዲስ፤ ዳጋማይ ኡባሶራ ዴስ፤ ኢስቲ ታ ቦላ ጌኔን ዱላቴቴስ፤ ታና ዎናዉካ ማቄቴቴስ። 14 ጊዶ ኣቲን ጎዳዉ! ታኒ ኔናን ኣማኔታዳ፥ «ኔኒ ታ ጾሳ» ጋይስ። 15 ታ ዴኦ ላይይ ኔ ኩሼና፤ ታና ጎዲዛ ታ ሞርኬታ ኩሼፔ ኔ ታና ኣሻ። 16 ኔ ኣይሌዛ ቦላ ኔ ሲን ፖኢሳ፤ ኔ ማሮቴን ታና ኣሻ። 17 ኣቤት ጎዳዉ! ታኒ ኔና ጼይጋይስ፤ ታና ዬላሶፓ፤ ኢታቲ ጊዲኮ ዬላቴቶ፤ ዱጌ ዱፎን ጌሊዲ ሲርጲ ጌቶ። 18 ጺሎዛ ቦላ ኦቶሮን፥ ካኒኔ ጻላቴን ሃሳይዛ ጊሻስ ዎርዳንቻታ ዶና ዱዲሳ። 19 ኔናን ዜምፓናስ ኔኮ ሺቂዳይታሲኔ ኔስ ያዪዛይታስ ኔኒ ኣሳ ሲንን ኢስታስ ኢማና ጋዳ ሚንጃ ዎዳ ኪያቴ ኣይ ማላ ዳሮ! 20 ኔኒ ኢስታ ኔ ኬን ጌንዳ ኣሳ ማቆፌ ኣሻሳ፤ ኔኒ ኢስታ ኔ ዲዛሶን ቆታዳ ኢታ ኢንጻርሳፌ ናጋሳ። 21 ታኒ ሞርኬይ ዶዲ ኦይኪዳ ካታማ ጊዶን ዲዛ ዎዴ ኢዚ ማላሊሲዛ ባ ማሮቴ ታና ቤሲዳ ጊሻስ ጎዳይ ጋላቴቶ። 22 ታኒ ዳጋማዳ፥ «ኔ ሲንፌ ኪቻዲስ» ጋዲስ። ጊዶ ኣቲን ታና ማዳና ማላ ኔና ታ ጼይጊዳ ዎዴ ታ ዋሶዛ ኔኒ ሲያዳሳ። 23 ኢንቴኖ ጾሳ ኣሳቶ! ጎዳ ሲቂቴ። ጎዳይ ኢዛን ኣማኔቲዛይታ ናጌስ፤ ጊዶ ኣቲን ኦቶራንቻታስ ኢስታስ ቤሲዛ ቂጻቴ ኢሜስ። 24 ኢንቴ ሂዶታ ጎዳን ኦዳይቶ! ቤጊቴኔ ሚኒቴ።