ዬ ማጻፋ 136

1 ጎዳ ጋላቲቴ! ኢዚ ኪያ፤ ኢዛ ሲቆይ ሜርናሳ። 2 ጾሳታ ጾሳ ጋላቲቴ! ኢዛ ሲቆይ ሜርናሳ። 3 ጎዳ ጋላቲቴ! ኢዛ ሲቆይ ሜርናሳ። 4 ኢዚ ጻላ ጊታ ማላሊሲዛ ሚሽ ኦስ፤ ኢዛ ሲቆይ ሜርናሳ። 5 ባ ሂላቴን ሳሎታ ሜዴስ፤ ኢዛ ሲቆይ ሜርናሳ። 6 ቢታ ሃ ቦላን ሚጪዴስ፤ ኢዛ ሲቆይ ሜርናሳ። 7 ጊታ ፖኦታ ሜዴስ፤ ኢዛ ሲቆይ ሜርናሳ። 8 ኣርሼይ ጋላስ ፖኣና ማላ ኦዴስ፤ ኢዛ ሲቆይ ሜርናሳ። 9 ኣጊናይኔ ጾሊንቴቲ ኦማርስ ፖኢሳና ማላ ኦዴስ፤ ኢዛ ሲቆይ ሜርናሳ። 10 ኢዚ ጊብጼ ቢታን ባይራታ ዎዴስ፤ ኢዛ ሲቆይ ሜርናሳ። 11 ኢስራኤሌ ኣሳ ጊብጼፔ ካሌ ኬሲዴስ፤ ኢዛ ሲቆይ ሜርናሳ። 12 ባ ሚኖ ኩሼኒኔ ባ ዎልቃማ ቄሴን ሃይሳ ኦዴስ፤ ኢዛ ሲቆይ ሜርናሳ። 13 ዞኦ ኣባ ሻኪ ዬጊዴስ፤ ኢዛ ሲቆይ ሜርናሳ። 14 ኢስራኤሌ ኣሳ ሄ ኣባ ጊዶራ ፒንዴስ፤ ኢዛ ሲቆይ ሜርናሳ። 15 ጊብጼ ካዎኔ ኢዛ ኦላንቻታ ዞኦ ኣባን ሚቲሲዴስ፤ ኢዛ ሲቆይ ሜርናሳ። 16 ኢዚ ባ ኣሳ ባዞራ ካሌዴስ፤ ኢዛ ሲቆይ ሜርናሳ። 17 ጊታ ካዎታ ሾጪዴስ፤ ኢዛ ሲቆይ ሜርናሳ። 18 ዎልቃማ ካዎታ ዎዴስ፤ ኢዛ ሲቆይ ሜርናሳ። 19 ኣሞሬታ ካዎዛ ሲሆኔ ዎዴስ፤ ኢዛ ሲቆይ ሜርናሳ። 20 ቃሴ ባሳኔ ካዎዛ ኣጌ ዎዴስ፤ ኢዛ ሲቆይ ሜርናሳ። 21 ሂስቲዲ ኢስታ ቢታ ባ ኣሳ ላቲሲዴስ፤ ኢዛ ሲቆይ ሜርናሳ። 22 ባ ኣይሌ ኢስራኤሌ ላቲሲዴስ፤ ኢዛ ሲቆይ ሜርናሳ። 23 ኑኒ ካዉዪዳ ዎዴ ኢዚ ኑና ቆፒዴስ፤ ኢዛ ሲቆይ ሜርናሳ። 24 ኑና ኑ ሞርኬታፔ ኣሺዴስ፤ ኢዛ ሲቆይ ሜርናሳ። 25 ሜታ ኡባስ ሚዛዝ ኢሜስ፤ ኢዛ ሲቆይ ሜርናሳ። 26 ሳሎ ጾሳ ጋላቲቴ! ኢዛ ሲቆይ ሜርናሳ።