ሌሚሶ ማጻፋ 10

1 ሃይቲ ሶሎሞኔ ሌሚሶታ። ኣ ኤራቴ ዲዛ ናይ ባ ኣዋ ኡፋይሴስ፤ ጊዶ ኣቲን ኤያ ናይ ባ ኣዮ ጬጪሴስ። 2 ቤሶንታ ኦጌራ ዪዳ ኣቆታይ ጎኤና፤ ጊዶ ኣቲን ጺሎቴ ሃይቆፔ ኣሼስ። 3 ጎዳይ ጺሎታ ጋፊሴና፤ ጊዶ ኣቲን ናጋራንቻታ ኣሞ ጫልቃሚሳና። 4 ኣዛላቴ ማንቂሴስ፤ ሚኒ ኦሶይ ጊዲኮ ዱሬሴስ። 5 ኣ ኤራንቻይ ካ ዎዴራ ሺሼስ፤ ካ ሺሺዛ ዎዴ ስኪዛ ኣሲ ጊዲኮ ካዉዬስ። 6 ጺሎ ኣሲ ኣንጄቴስ፤ ኢታ ኣሳ ዶና ማካላቴ ጎርዴስ። 7 ጺሎታ ሱንይ ኣንጆን ጼይጌቲሼ ዳና፤ ኢታታ ሱን ጊዲኮ ዶጌታና። 8 ኣ ኤራንቻይ ኣዛዞ ኤሮ ጊ ኤኬስ፤ ሎምኡሎምኢዛ ኤያቲ ጊዲኮ ባሻሶ ቤቴስ። 9 ሱሬ ኣሲ ሂርጋይ ባይንዳ ዴስ፤ ጌላ ኦጌ ቢዛ ኣሲ ጊዲኮ ባ ሞሮን ኦይኬታና። 10 ጌኔ ኦሶስ ቂምኦቲዛ ኣሲ ሜቶ ኤሄስ፤ ሎምኡሎምኢዛ ኤያይካ ሜቶ ኤሄስ። 11 ጺሎታ ሃሳያይ ዴኦ ፑልቶ፤ ኢታታ ሃሳያይ ማካላቴ ጌንስ። 12 ኢጾይ ፓላማ ዴንስ፤ ሲቆይ ጊዲኮ ባላ ኡባ ካሚ ኣስ። 13 ዎዚናማ ኣሳይ ኣ ኤራን ሃሳዬስ፤ ኤያ ዞኮን ጊዲኮ ጻምኣይ ሜቄስ። 14 ኣ ኤራንቻቲ ኤራቴ ዳጋሴቴስ፤ ኤያ ሃሳያይ ጊዲኮ ባሽ ጼይጌስ። 15 ዱሬታ ኣቆታይ ኢስታስ ጊምቤቲዳ ካታማ፤ ማንቆታ ማንቆቴ ኢስታስ ዮሶ። 16 ጺሎ ኣሳ ዳሞዛይ ዴኦ፤ ኢታ ኣሳታስ ዎይ ጊዲኮ ቂጻቴ። 17 ሴራ ኤኪዛ ኣሲ ዴኦ ኦጌን ሄሜቴስ፤ ሴራ ኢጺዛ ኣሲ ጊዲኮ ሜቶ ቦላ ዎስ። 18 ኢጺሼ ባ ኢጺዛይሳ ቆቲዛ ኣሲ ዎርዳንቻ፤ ዚጊርስ ዚጊርዛ ኣሲ ጊዲኮ ኤያ። 19 ዳሮ ሃሳያ ጊዶን ሞሮይ ዬና፤ ባ ዶና ሺሺ ኤኪዛ ኣሲ ጊዲኮ ኣ ኤራንቻ። 20 ጺሎታ ሃሳያቲ ጌሻ ቢራ ማላ፤ ኢታ ኣሳ ቆፋስ ጊዲኮ ጎኣይ ዴና። 21 ጺሎታ ሃሳያይ ዳሮታ ጎኤስ፤ ኤያቲ ጊዲኮ ባ ዎዚና ፓጬን ሃይቄቴስ። 22 ጎዳ ኣንጆይ ዱሬ ኬሴስ፤ ኢዚ ሄ ዱሬቴን ሜቶ ጉጄና። 23 ኤያ ኣሲ ኢታ ኦሶን ኡፋዬቴስ፤ ዎዚናማ ኣሲ ጊዲኮ ኣ ኤራቴን ኡፋዬቴስ። 24 ኢታ ኣስ ሂርጊዛ ሚሽ ኢዛ ቦላ ጋካና፤ ጊዶ ኣቲን ጺሎ ኣሞይ ኢዛስ ፖሌታና። 25 ጎቴ ጫርኮይ ዴንዲሺን ኢታቲ ፒቴቲ ያና፤ ጺሎቲ ጊዲኮ ሜርናስ ሚኒ ዳና። 26 ጫላይ ኣች ዚልኢሲዛ ማላኔ ጩዋይ ኣይፌ ቆሂዛ ማላ ኣዛላ ኣሲ ኪቲዳዴንታስ ሄሳ ማላ። 27 ጎዳስ ያሺ ላይ ኣዱሴስ፤ ኢታታ ባሬይ ጊዲኮ ቃን። 28 ጺሎታ ሂዶታይ ኡፋይሳን ጋስ፤ ኢታታ ሂዶታይ ጊዲኮ ሃዳ ጊዲ ኣቴስ። 29 ጎዳ ኦጌይ ጺሎታስ ባቃቲ ኣቲዛሶሆ፤ ኢታ ኦዛይታስ ጊዲኮ ባሻ ሶሆ። 30 ጺሎቲ ሙሌካ ቃሌቴቴና፤ ኢታቲ ጊዲኮ ቢታ ቦላ ዴኤቴና። 31 ጺሎታ ዶናይ ኣ ኤራቴ ሃሳዬስ፤ ጌላታ ኢንጻርሲ ጊዲኮ ቃንጼታና። 32 ጺሎታ ሜቴርሻይ ቤሲዛ ዮኦ ሃሳዬስ፤ ኢታ ዶናይ ጊዲኮ ቦካ ዮቴስ።