ኢዩኤሌ ቲንቢቴ 3

1 ጾሲ፥ «ሄ ዎዴ ታኒ ዬሩሳላሜፔኔ ዩሁዳፔ ዲኤቲ ኤኬቲዳ ሚሽ ኡባ ዛራና። 2 ታኒ ካዎቴታ ኡባ ሺሻዳ ዱጌ ኢዮሳፊጼ ዙሌ ዎና፤ ሄንካ ታ ኢስታ ቦላ ፒርዳና፤ ጋሶይካ ታ ዴሬ ኢስራኤሌ ኣሳ ካዎቴታ ጊዶን ላሊዲ ኢስቲ ቢታ ጊሼቲ ኤኪዳ ጊሻሳ። 3 ኢስቲ ባ ዲኢ ኤሂዳ ታ ዴሬታ ጊሼቲ ኤካናስ ኢስታ ቦላ ሳማ ዬጊዳ፤ ላይማ ማጫሳታ ዴማናስ ኣቱማ ናይታ ኣ ኢሚዳ፤ ዎይኔ ኡሹ ኡያናስ ማጫ ናይታ ኣይሌቴስ ባይዚዳ። 4 ኢንቴኖ ጺሮሴ፥ ሲዶናኔ ፊሊስጼሜ ኣሳቶ! ኢንቴ ኣይ ኦሼ ዴቲ? ኢንቴ ታ ቦላ ሃሎ ኬሳና ቆፔቲ? ኢንቴ ሄሳ ማላ ቆፒኮ ታኒካ ካሴታዳ ኢንቴ ቦላ ሃሎ ኬሳና። 5 ታ ቢራ፥ ዎርቃኔ ታስ ዲዛ ኣልኦ ሚሽ ኡባ ኢንቴ ቦንቂ ኤኪዲ ኢንቴ ኤቃ ኬ ጌልዴታ። 6 ዩሁዳኔ ዬሩሳላሜ ዬሌታታ ኢስታ ዴሬ ሳፌ ሃሲ ኤፊዲ ጊሪኬ ኣሳስ ባይዚዴታ። 7 «ሄኮ ታኒ ሃኢ ኢስቲ ባይዜቲ ዲዛሶፔ ኢስታ ዴንዳ ዛራና፤ ኢንቴ ኢስታ ቦላ ጋዳ ቆሆዛ ታ ኢንቴ ቦላ ዛራ ኤሃና። 8 ኢንቴ ማጫ ናይቲኔ ኣቱማ ናይቲ ዩሁዳ ኣሳስ ባይዜታና ማላ ታ ኦና፤ ኢስቲካ ሃሆ ዴሬን ዲዛ ሳባኔ ኣሳስ ኣ ባይዛና፤ ሃይሳ ዉርሳ ዮቲዳይ ታና ጎዳ። 9 «ሃይሳ ኡባ ካዎቴታስ ኣዋጂቴ! ኦላስ ጊጌቲቴ! ኦላ ቃራታ ዴንቴ! ኢንቴ ኦላንቻቲ ኡባይ ኬዚዲ ሞርኬታ ኦሌቶ! 10 ማራሻ ጊ ማሻ ቆጺቴ፤ ባጫ ቃሴ ቶራ ቆጺቴ፤ ላፋይካ ባና፥ ‹ታኒ ሚኖ ኣሳ› ጎ። 11 ኢንቴኖ ዩዪ ኣናስ ዲዛ ካዎቴቶ! ኢንቴ ዉሪካ ኤሶን ኬዚቴ! ሂርኪ ሾባን ኢሲ ቦላ ሺቂቴ። ጎዳዉ፥ ኔኒ 12 «ካዎቴቲ ኡባይ ዴንዲዲ ዱጌ ኢዮሳፊጼ ሾባ ቤቶ፤ ታኒ ጾሳይ ኢንቴ ዩሾን ዲዛ ካዎቴታ ቦላ ፒርዳናስ ታ ሄን ኡታና። 13 ኢስታ ኢታቴ ኬሂ ዳሪዴስ፤ ሄሳ ጊሻስ ካጺዳ ካ ባጫን ጫኬቲዛ ማላ ኢስታ ጫኪቴ፤ ዎይኔ ሚ ኣይፌይ ጉምኤቲዛሶን ኩሚዲ ዬቲዛ ማላ ኢንቴ ኢስታ ዬቲቴ» ጊዴስ። 14 ዮኦ ፒርዲዛ ዙሌን ጎዳይ ፒርዲዛ ጋላሲ ጋኪዴስ፤ ሄሳ ጊሻስ ዳሮ ዴሬይ ሄን ሺቂ ኡቲዴስ። 15 ሄ ጋላስ ኣርሼይኔ ኣጊናይ ማና፤ ጾሊንቴይካ ፖኤና። 16 ጎዳይ ጺዮኔ ዙማ ቦላ ዬሩሳላሜን ዲሼ ባቢሲዛ ባ ቃላ ጊሪስ ሲሳና፤ ሳሎይኔ ሳኣይ ቃጻና፤ ጎዳይ ጊዲኮ ባ ዴሬ ኢስራኤሌስ ሺቂ ኣቲዛሶ ጊዳና። 17 «ኢስራኤሌ ኣሳዉ! ሄ ዎዴ ታኒ ጎዳ ኢንቴ ጾሳ ጊዲዳይሳ ኢንቴ ኤራና፤ ታኒ ጌሽ ጊዲዳ ታ ዙማ ጺዮኔ ቦላ ዴኣና፤ ዬሩሳላሜይ ኣንጄቲዳ ካታማ ጊዳና፤ ሄሳፌ ጉዬ ሃራ ኣላጋ ዎታዳራይ ኢዞ ዎራጄና። 18 «ሄ ዎዴ ዙማቲ ዉሪካ ዎይኔ ሚን ኩማና፤ ዙምቡላን ዳሮ ማ ሚዛቲ ሄሜታና፤ ጎዳ ኬፌ ፑልቶይ ፑልታና፤ ዩሁዳ ዴሬን ዲዛ ሻፋታ ኡባ ሃ ኩማና፤ ሺጺሜ ሾባይ ሃ ካላና። 19 ጊብጼ ኣሳይኔ ኤዶሜ ኣሳይ ዩሁዳ ኣሳ ቦላ ጌኔ ኦዳ ጊሻስ ቃሴካ ጺሎ ኣሳ ዎዳ ጊሻስ ጊብጼይ ባዞ ጊዳና፤ ኤዶሜይ ኣሲ ባይንዳሶ ጊዳና። 20 ሄሳ ጋካናዉ ታኒ ሃሎ ኬሶንታ ኣጊዳ ጺሎታ ሱ ጊሻስ ሃሎ ኬሳና፤ ዩሁዳይኔ ዬሩሳላሜይ ቃሴ ሜርናስ ታ ዴሬይ ዴኢዛሶ ጊዳና፤ ታኒካ ጾሳይ ጺዮኔ ዙማ ቦላ ዴኣና» ጊዴስ።