ኢዮቤ ማጻፋ 5

1 «ኢዮቤ! ኔ ጼይጊን ኔስ ኮያናዴይ ዲኮ ጼይጋ፤ ኔስ ማዶ ኢማና ማላ ኪታንቻታፔ ኣዋይሳኮ ጼላይ? 2 ኤያ ኣስ ዪሎይ ዎና፤ ቃናቴይካ ኣስ ይሳና። 3 ኤያ ኣሲ ሚኒዲ ዲሺን ቤያዲስ፤ ጊዶ ኣቲን ኢዛ ኣቆይ ቆፖንታ ዲሺን ጾሳ ሃንቆን ላሌቲዴስ። 4 ኢዛ ናይቲካ ባ ዴኦዛስ ኣማንዛዝ ዴሜቴና፤ ዱቡሻንካ ኢስታ ጊሻስ ሃሳይዛ ኣስ ኢስቲ ዴሞንታ ጊሻስ ኢስታ ቦላ ቆሆይ ጋካና። 5 ኢዚ ዜሪዳ ካካ ኮሻቲዳ ኣሳቲ ማና፤ ሃራይ ኣቲን ኣጉን ጊዶን ሞኪዳይሳካ ኢዛስ ኣሼቴና፤ ሳሜቲ ኡቲዳ ኣሳቲ ኢዛ ሃሮዛ ኤካናስ ኣሞቴቴስ። 6 ሜቶይ ጮ ቢታፌ ዴንዴና፤ ዋዬይካ ጋዴፔ ጮ ኬዜና። 7 ታማ ፊንጼ ቦንቆፌ ዴንዲዲ ፑዴ ፊንጺዛ ማላ፥ ኣሲካ ዋዬስ ዬሌቴስ። 8 «ታኒ ኔና ጊዲዳኮ ጾሳ ዎሳና፤ ታ ሜቶ ኡባ ኢዛስ ቆንጪሳና። 9 ኢዚ ቆዳይ ባይንዳ ማላሊሲዛ ሚሽ፥ ፒልጊን ጋኬቶንታ ጊታ ሚሽ ኦስ። 10 ቢታ ቦላ ኢራ ቡኪሴስ፤ ጎሻታካ ሃን ሹጊሴስ። 11 ካዉዪዳይታ ቦንቾን ቁ ሂስቴስ፤ ሙዞቲዛይታ ሚንዲ ኡፋይሴስ። 12 ኢስታ ኦሶይ ፖሌቶንታ ማላ ጌኔ ኣሳታ ቆፋ ሃዳ ኦስ። 13 ጪንጫታ ኢስታ ጌኔ ኦሶዛን ዛሪ ኦይኬስ። ጌኔ ኣሳታ ቆፋካ ኤሶራ ይሴስ። 14 ጋላሳይ ኢስታስ ማ ጊዴስ፤ ቡሮ ሴታ ጋላሳን ኦማርስ ማ ጊዶን ዲዛ ማላ ኢስቲ ታታፌታና። 15 ማንቆታ ኢስታ ሞርኬታ ማሻፌ ኣሼስ፤ ሜቶታንቻታካ ዋዪሲዛይታ ኩሼፔ ኬሲ ኤኬስ። 16 ማንቆታስ ሂዶታ ኢሜስ፤ ማካላቴካ ቢታ ቦላፌ ይሴስ። 17 «ጾሲ ሴሪዛ ኣሲ ኣንጄቲዳይሳ፤ ሄሳ ጊሻስ ኡባ ዳንዳይዛ ጾሳ ሴራ ሌቆፋ። 18 ጾሲ ማዱንኮካ ዛሪዲ ፓስ፤ ኢዚ ሜንስ፤ ባ ኩሼን ዛሪዲ ኮሌስ። 19 ኡሱፑን ቆሞ ቦሻፔ ኔና ኣሺ ኤካና፤ ላፑንዛንካ ኣይ ቆሆይካ ኔ ቦላ ጋኬና። 20 ኮሻ ላይን ኢዚ ኔና ሼምፖራ ፓጻ ዎና፤ ኦላ ላይንካ ኢዚ ኔና ሃይቆፔ ኣሻና። 21 ጾሲ ኔና ኢታ ኢንጻርሳፌ ናጋና፤ ቦሻይ ኔ ቦላ ዪኮካ ያያካ። 22 ዎልቃማታ ቆሆይኔ ኮሻይ ኔና ዳጋንና፤ ቢታ ዶኣታስካ ኔ ያያካ። 23 ኔ ጎዪዛ ጋዴን ኔና ሹቺ ዋዪሴና፤ ዶኣታራካ ኔ ሳሮን ዳና። 24 ኔ ኬን ሳሮይ ኩማናይሳ ኔ ሻካ ኤራና፤ ኔ ሜሄ ጼሊሺን ኣቆፔ ፓጬና። 25 ኔ ዜሬይ ዳራናይሳ ኔ ኤራና፤ ኔ ዜሬይካ ዴምባን ዲዛ ማታ ማላ ዳራና። 26 ካ ካጺዲ ማጼቲዛይሳ ማላ ኔካ ሎኤ ጪማዳ ዱፎን ባና። 27 ኑኒ ሃይሳ ኡባ ፒልጊዲ ቱሙ ጊዲዳይሳ ኤሪዶስ፤ ኔኒካ ኣኬካዳ ሃይሳ ኦሶን ፔይሻ።»