ኢዮቤ ማጻፋ 31

1 «ሎኦ ማጫሳኮ ጼላዳ ኣሞቶንታ ማላ፤ ታኒ ታ ኣይፌታራ ጫቆ ጌላዲስ። 2 ቦላን ዴኢዛ ጾሳይ ኣሳስ ኣይ ቃዳ ኢማንዴሻ? ሳሎን ዲዛ ኡባ ዳንዳይዛ ጾሳፌ ኣሳስ ኢሜቲዳ ጊሻይ ኣዜሻ? 3 ኢታ ኣሳ ቦላ ቆሆይ፥ ናጋራንቻ ኣሳ ቦላካ ዮይ ጋካናይሲ ኤሬቲዳዝ ጊዴኔ? 4 ጾሳይ ታ ኦዛይሳ ኡባ ቤዬኔ? ታ ሄሜታካ ሻኪ ኤሬኔ? 5 ታኒ ዎርዶ ሃሳይዳ ጊዲኮ፥ ኣሳካ ባሌዳ ጊዲኮ፤ 6 ጾሲ ታና ሱሬ ጌዳራን ጌዳሮ። ታኒ ጺሎ ጊዲዳይሳ ሻኪ ኤሮ። 7 ታ ሱሬ ኦጌፔ ኬኢዳ ጊዲኮ፥ ታ ኣይፌይ ቤኢዳ ኡባ ታ ዎዚናይ ኣሞቲዳ ጊዲኮ፥ ቃሴካ ታ ኩሼይ ናጋራን ቱኒዳ ጊዲኮ፥ 8 ታኒ ዜሪዳይሳ ሃራ ኣሲ ሞ። ታ ጫሬቻዚካ ኩሜ ሾዴቲ ኦሌቶ። 9 «ታ ዎዚናይ ሃራ ማጫ ኣሞቲዳ ጊዲኮ፥ ታ ሾሮዛ ማቾ ላይማታናስ ኢዛ ፔንጌን ታ ዙጊዳ ጊዲኮ፥ 10 ታ ማቻ ሃራ ኣሳስ ጋጩ፤ ቃሴካ ሃራ ኣዴይ ኢዚራ ዚንኦ። 11 ሃይሲካ ኬሂ ቱና፤ ዎጋንካ ቃጻይሲዛ ናጋራ። 12 ሃ ናጋራይ ታማ ማላ ጹጊዛ ጊሻስ ታ ሃይሳ ኦዳኮ ታ ኣቆታ ጹጊ ይሳናኮሺን። 13 «ማጫኔ ኣቱማ ጊዲዳ ታ ኣይሌቲ ታና ሞቲን ኢስታ ሞቶዛ ታ ካዳ ኣጊዳ ጊዲኮ፥ 14 ጾሲ ታና ፒርዲዛ ዎዴ ታኒ ዋናኔ? ቃሴ ኢዚ ታና ኦይቺዛ ዎዴ ታኒ ኣይ ዛሮ ኢማኔ? 15 ታ ኣዬይ ኡሎን ታና ሜዳይሲ ታ ኣይሌታካ ሜዳይ ኢዛ ጊዴኔ? ኑና ኡባታካ ኣዪ ኡሎን ሜዳይ ኢዛ ዴኔ? 16 «ማንቆቲ ታና ዎሲን ታ ዲጋ ኤሪኬ፤ ቃሴካ ኣምኤ ማጫሳታ ሚንንታ ኣጋ ኤሪኬ። 17 ዪኦኔ ዪቶ ናይታ ኣጋዳ ታ ካ ታርካ ማቤኬ። 18 ታኒ ታ ዬላጋቴፌ ዶማዳ ታኒ ኢስታ ኣዋ ማላ ዲቻዲስ፥ ታ ዴኦ ላይ ኡባን ኣምኤ ማጫሳታ ማዳዲስ። 19 ማይኦይ ዪን ሜጎይ ዎዛዴ፤ ዎይኮ ሜቶፔ ዴንዲዳይሳን ካሎ ዲዛዴ ቤያዳ፥ 20 ታ ዶርሳታ ኢስኬፌ ኦሴቲዳ ማይኦ ታ ማይዚን፥ ኢዛዴ ሆኢን ታና ዛሪ ጋላቶንታ ኣጊዳ ዎዴይ ዴና። 21 ታኒ ሞቶን ኢስታ ላናይሳ ኤራዳ ኣዋይ ባይንዳ ናይታ ናቂዳ ጊዲኮ፥ 22 ታ ኩሼይ ሃሼፔ ኬኦ። ታ ቄሴይካ ኩሬዛፔ ኮልዶ። 23 ታኒ ጾሳ ሃንቆስ ያዪዛ ጊሻሲኔ ኢዛ ቴማቴስ ያዪዛ ጊሻስ ሃይሳ ማላ ዮኦታ ኦናዉ ታ ዳንዳይኬ። 24 «ታኒ ታስ ዲዛ ኣቆታን ኣማኔታቤኬ። ዎይኮ ፓያ ዎርቃካ ታስ ኣማኔቲዛ ሚሽ ኦቤኬ። 25 ‹ታስ ዲዛ ኣቆይ ዳሪዴስ፤ ታኒ ዱሬቴፌ ዴንዲዳይሳን ዳሮ ሚሽ ዴማዲስ› ጋዳ ኡፋዬታ ኤሪኬ። 26 ኣርሼ ፖኦዛ ቤያዳ፥ ኣጊና ሎኤቴ ቤያዳ፥ 27 ታ ዎዚናን ኢስታ ጌማራ ቦንቻቤኬ፤ ቃሴካ ታ ኩሼ ሚጫ ዬራዳ ኢስታስ ጎይናቤኬ። 28 ታኒ ሃይሳ ማላ ኦዳኮ ሳሎን ዲዛ ጾሳ ካዶ ጊዲዳ ጊሻስ ሃይቲ ሃ ኦሶቲ ታ ቦላ ፒርዳ ኤሂዛ ናጋራታ። 29 «ታ ሞርኬታ ኩንዴን ታኒ ኡፋዬታቤኬ፤ ኢታ ሚሺ ኢስታ ቦላ ጋኪሺንካ ሚጫቤኬ። 30 ‹ታ ሞርኬቲ ዬቶ› ጋ ቃንጋዳ ናጋራ ኦቤኬ። 31 ታኒ ኡባ ዎዴ ኢማ ሞኪዛይሳ ታሶ ኣይሌቲ ታ ጊሻስ ማርካቴቴስ። 32 ታኒ ታ ኬ ካሬ ኦጌራ ኣ ቢዛ ማንዳራስ ዶያ ዎዲስ። ሄሳ ጊሻስ ጋዴይ ቃሚን ዪዳ ኢማ ካሬን ኣይሳ ኤሪኬ። 33 ታኒ ታ ሞሮ ጌንቤኬ፤ ሃራ ኣሳታ ማላ ታ ናጋራካ ቆታቤኬ። 34 ታና ኣሳ ዳሮይ ያሺሲኒኔ ሶ ኣሳታ ካይ ዳጋንን ታኒ ታሶን ጮኡ ጋዳ ቆቴቲዳ ዎዴይ ዴና። 35 «ታ ጊዛይሳ ሲዪዛዴይ ቤቴሬኔሺን! ታኒካ ቴቄ ቃላ ሺሻናኮሺን! ኡባ ዳንዳይዛ ጾሳይ ታ ጊዛይሳ ዛሮ ኢዚ ኢሞ! ታና ሞቲዛ ሞታንቻይ ታና ሞቲዛይሳ ጻፊ ሺሺን ታ ቤያርኪናሺን! 36 ዎይቶ ማላ ታኒ ታ ሃሼን ቶካናኮሺን፤ ካላቻ ማላካ ታ ሁኤ ቦላ ጎጻና። 37 ዳናቴ ዲዛ ኣሳ ማላ ጾሳ ሲንን ያዮንታ ኤቃዳ ታ ኦዳ ኡባ ቆንጪሳ ዮታናኮሺን። 38 «ኣሳ ጋዴ ዎጋይ ባይንዳ ቦንቃ ኤካዳ ታኒ ጎዪዳ ጊዲኮ፥ 39 ሄ ጋዳ ጎዳታ ታ ሚሺሲዳ ጊዲኮ፥ ኣይኮካ ኢስታስ ኢሞንታ ዳሼ ሞኪዳ ካ ታኒ ሚዳ ጊዲኮ፥ 40 ሄ ታ ጎዪዛ ጎሻሶን ዲዛ ጊስቴ ጊሻስ ኣጉን፥ ባንጋ ጊሻስ ሻራፋይ ሞኮ» ጊዴስ። ኢዮቢ ባ ሃሳያ ሃይሳን ፖሊዴስ።