ኤራንቻታ ማጻፋ 12

1 ሜቶ ጋላሳቲ ዮንታ ዲሺን ኔኒ፥ «ታና ኡፋይሴቴና» ጊዛ ዎዴቲ ጋኮንታ ዲሺን ኔ ዬላጋቴ ላይን ኔና ሜዳይሳ ቆፓ። 2 ኣዋይኔ ፖኦይ፥ ኣጊናይኔ ጾሊንቴይ ሞንታ ዲሺን፥ ኢራይ ቡኪ ሲሚን ሻራይ ኪቾንታ ዲሺን ኔና ሜዳይሳ ቆፓ። 3 ኬ ናጊዛይቲ ኮኮሪዛ ዎዴ፥ ሚኖቲ ኩኒዛ ዎዴ፥ ጋጪዛይቲ ቆዳን ጉ ጊዲዳ ጊሻስ ጋቼ ኣጊዛ ዎዴ፥ ማስኮቴራ ጼሊዛይቲ ዶልጁሚዛ ዎዴ፥ 4 ዱቡሻሶ ኤፊዛ ኦጌቲ ጎርዴቲዛ ዎዴ፥ ዎጻይ ሎጬቲዲ ጊሬ ኣጊዛ ዎዴ፥ ካፎ ዋሶይ ኣስ ዴንዛ ዎዴ፥ ኢስታ ዬካ ዳቡርዛ ዎዴ፥ 5 ፑዱን ኬሲ ጾኒዛ ዎዴ፥ ኦጌ ቡሲ ባቢሲዛ ዎዴ፥ ኦቾሎኔይ ጪዪዛ ዎዴ፥ ቦሌይ ባርካ ባና ጎቺዛ ዎዴ፥ ኣሳፔ ኣሞይ ይዛ ዎዴ ኣሲ ባ ሜርና ኬ ባና፤ ዬኪዛይቲካ ባሌን ዩያና። 6 ቢራ ሳንሳላታይ ዱጾንታ ዲሺን፥ ዎርቃ ሳኔይ ሜቆንታ ዲሺን፥ ሃ ኦቶይ ፑልቶ ኣቻን ሜቆንታ ዲሺን፥ ሃ ኦላፌ ኬሲዛ ዋጉምቦይ ሜቄሬቶንታ ዲሺን፥ 7 ቢታይ ዱጌ ቢታን ሲሞንታ ዲሺን፥ ሼምፖይ ኢሚዳ ጾሳኮ ሲሞንታ ዲሺን፥ ኔና ሜዳ ጾሳኮ ሲማ። 8 ኤራንቻዚ፥ «ሃዳ! ሃዳፔካ ሃዳ! ኡባይካ ሃዳ!» ጌስ። 9 ኤራንቻዚ ባ ሁኤስ ኣ ኤራንቻ ጻላ ጊዶንታ ኣሳካ ኤራቴ ታማርሲዴስ። ዳሮ ሌሚሶታ ፒልጊ ጼሊዳፔ ጉዬን ማራን ማራን ጊግሲዴስ። 10 ኤራንቻዚ ሱሬ ቃላ ዴማናስ ፒልጊዴስ፤ ኢዚ ጻፊዳይሲ ሱሬኔ ቱማ። 11 ኣ ኤራንቻ ቃላይ ጪካ ማላ ሆጼ፤ ቃሴ ኢዛ ቶሴቲካ ኣዳፌ ሽኬቲዳ ሽኬ ማላ፤ ሄይቲካ ኢሲ ሄንንቻፌ ኢሜቲዳይታ። 12 ታ ናዞ! ሃ ኡባፌ ቦላራ ኣይ ሚሻፌካ ናጌታ፤ ኣይኮካ ጉጆፋ፤ ዳሮ ማጻፋታ ጻፊኮካ ዉርሴ ዴና፤ ጺናቴ ዳሮይ ቦላ ዳቡርሴስ። 13 ሄኮ ኡባ ሚሺ ዮቴቲዴስ፤ ዮኦ ኡባስ ኩሺ ሃይሳ፤ ጾሳስ ያያ፤ ኢዛ ኣዛዞ ናጋ፤ ሄሲካ ኣሳ ናስ ኢሜቲዳ ኩሜ ኦሶ። 14 ጾሳይ ኦሶ ኡባ ቦላ፥ ጌሚዳ ዮኦ ኡባ ቦላ፥ ሎኦ ጊዲን ኢታ ጊዲንካ ፒርዳና።