2ሳሜላ ማጻፋ 22

1 ጎዳይ ዳዊቴ ኢዛ ሞርኬታ ኡባ ኩሼፔኔ ሳኦሌ ኩሼፔ ኣሺዳ ዎዴ ዳዊቲ ሃይሳፌ ካሊዛ ማዛሙሬ ጎዳ ቦንቾስ ዬጺዴስ፤ 2 «ጎዳይ ታስ ዛላ፥ ታስ ሚጻኔ ታና ኣሺዛዴ። 3 ታ ጾሳይ ታ ጌሜቲዛ ዛላ፥ ታስ ጎንዳሌኔ ኣቶቴ ካጬ፤ ኢዚ ታስ ሚኖ ሚጻ፤ ታስ ዜምፖኔ ታና ኣሺዛዴ፤ ኔ ታና ማካላንቻታፔ ኣሻሳ። 4 ጋላታይ ቤሲዛ ጎዳ ታ ጼይጋይስ፤ ታኒ ታ ሞርኬታፔካ ኣታይስ። 5 «ሃይቆ ዳምባላይ ታና ጊዶዴስ፤ ይሲዛ ዲኦይ ታና ሚቲዴስ። 6 ሲኦሌ ዎዶሮይ ታ ቦላ ጻጼቲዴስ፤ ሃይቆ ዎጺማዴይ ታስ ዋጼቲዴስ። 7 ታ ጬጪዳ ዎዴ ጎዳ ጼይጋዲስ፤ ታ ጾሳኮ ዋሳዲስ። ኢዚ ባ ኬን ዲሼ ታ ጬንጉርሳ ሲዪዴስ፤ ታ ዋሶይ ኢዛ ሃይን ጌሊዴስ። 8 «ኢዚ ሃንቄቲዳ ጊሻስ ቢታያ ኮኮራዱሲኔ ሺሮታዱስ፤ ሳሎታ ዮቺ ዛኢዴሲኔ ቃጺዴስ። 9 ኢዛ ሲፔ ሃንቆ ጩዋይ ጩዋቲዴስ፤ ኢዛ ዶናፔ ጹጊዛ ታማይ ኤጺዴስ፤ ታማ ቦንቆይካ ኬዚዴስ። 10 ሳሎታ ዳኪ ዎዴስ፤ ኢዛ ቶሆ ጋርሳን ፒ ጊዳ ሻራይ ዴስ። 11 ኢዚ ኪሩቤ ቦላ ኡቲዲ ፒራዴስ፤ ጫርኮ ቄፌ ቦላ ኡቲዲ ፑዴ ፓሊዴስ። 12 ማይ ኢዛ ጊዶዴስ፤ ፒ ጊዳ ኢራ ሻራይ ኢዛ ጌንዴስ። 13 ኢዛ ሲንን ዲዛ ፖኦዛፔ ዋዋጪ ጊዛ ዎልቃን ኬዚዴስ። 14 ጎዳይ ሳሎታፔ ጉሚዴስ፤ ኡባፌ ቃ ጾሳ ጬንጉርስ ሲሲዴስ። 15 ባ ዪሻ ዱኪዲ ባ ሞርኬታ ላሊዴስ፤ ዎልቃን ዬዲዲ ኢስታ ሺሮሲዴስ። 16 ጎዳ ሴራፔኔ ኢዛ ሲፔ ኬዚዛ ሃንቆ ጩዋፔ ዴንዲዳይሳን፥ ኣባ ጊዶን ዲዛ ዙሌቲ ቤቲዳ፤ ሳኣ ዮቻቲ ቆንጪዳ። 17 «ቦላፌ ባ ኩሼ ዬዲዲ ታና ኦይኪዴስ፤ ጪማ ሃታ ጊዶፌካ ታና ኬሲዴስ። 18 ሚኖ ሞርኬታፔ፥ ታኒ ኢስታራ ኤቄታና ዳንዳዮንታ ባሊጋራታፔ ታና ኣሺዴስ። 19 ታ ሜቶቲዳ ጋላስ ታ ቦላ ዪዳ፤ ጊዶ ኣቲን ጎዳይ ታና ካፊዴስ። 20 ኢዚ ታና ኣኮሶ ኬሲዴስ፤ ታናን ኡፋዬቲዳ ጊሻስ ኢዚ ኢስታ ኣሺዴስ። 21 «ጎዳይ ታስ ታ ጺሎቴ ማላ ኦስ፤ ታ ጺሎቴ ማላ ታስ ኩሼ ዛሪዴስ። 22 ጎዳ ኦጌ ታ ናጊዳ ጊሻስ ታኒ ጾሳፌ ሼርኢ ጋዳ ኢታ ኦቤኬ። 23 ኢዛ ዎጋ ኡባይ ታ ሲንን ዴስ፤ ኢዛ ማራፔካ ሃራሶ ሲማቤኬ። 24 ኢዛ ሲንን ቦሬይ ባይንዳ ዴኣዲስ፤ ታናካ ናጋራፔ ናጋዲስ። 25 ጎዳይ ታ ጺሎቴ ማላ፥ ኢዛ ሲንን ዲዛ ጌሻቴ ማላ ታስ ኩሼ ዛሪዴስ። 26 «ኣማኔቲዳይታስ ኔካ ኣማኔቲዳይሳ፥ ሱሬታስ ኔኒ ሱሬ ጊዲዳይሳ ቤሳሳ። 27 ጌሻታስ ኔኒ ጌሽ ጊዲዳይሳ፥ ማካላ ኣሳስ ኔኒ ማካላ ጊዲዳይሳ ቤሳሳ። 28 ኔኒ ቆሄቲዳ ዴራ ኣሻሳ፤ ጊዶ ኣቲን ኔ ኣይፌይ ካዉሻናስ ኦቶራንቻታ ጼሌስ። 29 ኣቤት ጎዳዉ! ኔኒ ታስ ጾምፔ፤ ጎዳይ ታ ማ ፖኢሴስ። 30 ኔ ማዶን ሞርኬታ ኦላ ሲን ሱጋ ሱጋ ባና፤ ታኒ ታ ጾሳ ዎልቃን ጊምቤዛ ቦላራ ጻላይስ። 31 «ጾሳ ኦጌይ ኩሜ፤ ጎዳ ቃላይ ሙሩታ፤ ኢዛን ኣማኔቲዳይታ ኡባስ ኢዚ ጎንዳሌ። 32 ጎዳፔ ኣቲን ሃራ ጾሲ ኦኔ? ኑ ጾሳፌ ኣቲን ዛላይ ኦኔ? 33 ታስ ዎልቃ ኢሚዛይሲ፥ ታ ኦጌካ ሱሪሲዛይሲ ኢዚ ታ ጾሳ። 34 ታ ቶሆታ ጌኔሳ ቶሆ ማላ ፒላቲሴስ፤ ቃሶሆታን ታና ሚን ኤሴስ። 35 ታ ኩሼታ ኦላ ታማርሴስ፤ ታ ቄሴቲ ጻርቂማላ ዎንዳፌ ዚንቄቴስ። 36 ኔ ኣቶቴ ጎንዳሌ ታስ ኢማዳሳ፤ ኔ ካፎይ ታና ጊታሲዴስ። 37 ታ ታንጎ ኣሳዳሳ፤ ታ ቶሆቲካ ጴቲቤቴና። 38 «ታ ሞርኬታ ዬዴ ይሳዲስ፤ ኢስቲ ዲፒ ጋናሼ ጋካናስ ጉዬ ጋቤኬ። 39 ሙሌራ ታ ኢስታ ይሳዲስ፤ ሲሚዲካ ኤቃናስ ዳንዳይቤቴና፤ ታ ቶሆ ጋርሳንካ ኩንዲዳ። 40 ኦላስ ታስ ዎልቃ ኢማዳሳ፤ ታናራ ኤቄቲዛይታ ታ ቶሆ ጋርሳን ኔ ጉልባቲሳዳሳ። 41 ታ ሞርኬቲ ጉዬ ሲሚ ባቃታና ማላ ኦዳሳ፤ ታና ኢጺዛይታ ይሳዳሳ። 42 ኢስቲ ማዶ ዴማናስ ዋሲዳ፤ ጊዶ ኣቲን ኢስታ ማዲዳይ ዴና፤ ኢስቲ ጎዳኮ ዋሲዳ፤ ጊዶ ኣቲን ኢዚ ኢስታስ ዛሪቤና። 43 ጉዱላ ማላ ኢስታ ሊቂሳ ጋጫዲስ፤ ኦጌን ዲዛ ኡርቃ ማላ ኢስታ ጊንዳዲሲኔ ዬታዲስ። 44 «ታ ዴሬይ ቆፒዳ ዳፋፔ ታና ኣሻዳሳ፤ ካዎቴታስ ታና ሁኤ ሂስታዳሳ። ታ ኤሮንታ ኣሳይ ታስ ሃሬቲዴስ። 45 ኣላጋቲ ታና ሾባናስ ዪዳ፤ ኢስቲ ታና ሲዪዳ ማላ ታስ ኣዛዜቴቴስ። 46 ኣላጋቲ ባቢዳ፤ ባንታ ሚጻፔ ኮኮሪሼ ዪዳ። 47 «ጎዳይ ዴኦ ጾሳ፤ ታ ዛላይ ኢዚ ኣንጄቶ፤ ታ ኣቶቴ ዛላይ ታ ጾሳይ ቁ ቁ ጎ። 48 ታ ጊሻስ ሃሎ ኬሲዛ ጾሳይ፥ ካዎቴታ ታስ ሃሪሲዛይ ኢዛ። 49 ኢዚ ታ ሞርኬታ ኩሼፔ ታና ኬሴስ፤ ታ ሞርኬታፔ ታና ቁ ቁ ሂስታዳሳ፤ ሜንጼ ኢታታፔ ታና ኣሻዳሳ። 50 ኣቤት ታ ጎዳዉ! ካዎቴታ ጊዶን ታ ኔና ጋላታና፤ ኔ ሱንስ ጋላታ ማዛሙሬ ታ ዬጻና። 51 ኢዚ ካዎዛስ ጊታ ጾኖ ኢሜስ፤ ባ ቲይዳ ዳዊቴሲኔ ኢዛ ዜሬስ፥ ባ ሜርና ኪያቴ ቤሴስ።»