1ታሶሎንቄ ኣሳስ 1

1 ጳዉሎሳፔ፥ ሲልዋኖሳፔኔ ጺምቶሳፔ፤ ጾሳ ኣዋሲኔ ጎዳ ዬሱስ ኪርስቶሳይታ ጊዲዳ ታሶሎንቄን ዲዛ ኣማኒዛ ኣሳስ ኑ ኣዋ ጾሳፌኔ ጎዳ ዬሱስ ኪርስቶሳ ኪያቴኔ ሳሮቴ ኢንቴስ ጊዶ። 2 ኑ ኢንቴና ኑ ዎሳን ቆፒሼ ኡባ ዎዴ ጾሳ ኢንቴ ጊሻስ ጋላቶስ። 3 ኣማኖኒኔ ሚኖ ሲቆቴን ኢንቴ ኦዳ ኦሶ ጊሻስ ጎዳ ዬሱስ ኪርስቶሳ ቦላ ዲዛ ኢንቴ ሚኖ ሂዶታን ቤቲዳ ኢንቴ ሚኖቴ ጊሻስ ኑ ጎዳ ጾሳ፥ ኑ ኣዋ ሲንን ኡባ ጋላስ ኢንቴ ጊሻስ ቆፖስ። 4 ጾሳን ዶሴቲዳ ኑ ኢሻቶ! ኢዚ ኢንቴና ዶሪዳይሳ ኑ ኤሮስ። 5 ጋሶይካ ሚሺራቾ ቃላይ ኢንቴኮ ዪዳይ ዎልቃራ ጺሎ ኣያናኒኔ ሎኤ ሻኪ ኤሪን ኣቲን ጮ ቃላ ጻላን ጊዴና፤ ቃሴካ ኑ ኢንቴ ጊሻስ ጊዲ ዋኒ ዴኢዳኮ ኢንቴ ኤሬታ። 6 ሃኢ ኢንቴ ኑናኔ ጎዳ ሚሳቲዴታ፤ ኢንቴ ቦላ ኣይ ሜቶይ ጋኪዳ ጊዲኮካ ጺሎ ኣያና ኡፋይሳን ቃላ ኢንቴ ኤኪዴታ። 7 ሄሳፌ ዴንዲዳይሳን ኢንቴ ማቂዶኒያኒኔ ኣካያን ኣማኒዛ ኣሳ ኡባስ ሎኦ ሌሚሶታ ጊዲዴታ። 8 ጎዳ ቃላይ ኢንቴፌ ኬዚዲ ማቂዶኒያኒኔ ኣካያን ሲዬቴ ጻላ ጊዶንታ ኢንቴስ ጾሳ ቦላ ዲዛ ኣማኖይ ኡባሶን ኤሬቲዴስ፤ ሄሳ ጊሻስ ኑ ኢንቴስ ዮታናስ ኣይኮካ ኮሼና። 9 ኢንቴ ኑና ዎስቲ ሞኪ ኤኪዳኮኔ ዴኦን ዲዛ ቱሙ ጾሳስ ኦናስ ኢንቴ ኤቃታፔ ጾሳኮ ዋኒ ሲሚዳኮ ኣሳይ ኢንቴ ጊሻስ ሃሳዬስ። 10 ቃሴካ ጾሲ ሃይቆፔ ዴንዳይሳ ቡሮ ያና ሃንቆፌ ኑና ኣሻና ሳሎፔ ያና ጾሳ ና ዬሱሳ ዩሳ ኢንቴ ዎስቲ ናጊዛኮ ኣሳይ ሃሳዬስ።