Ninge 60

1 God, u te malok se het ma u te bul hasur het. U gate ngalngaluan. Kaiken um, kap pukus habaling leh mehet ukatiga ho ugu! 2 U te gune no pise ma u te habanga ie. Hatakodas pukus ing i banga, kanong kana baak i gungunagune. 3 U te ubal ira num matanaiabar ma ira dadas na pakana bung. U te hamamo het ma ra wain ing i gil het gi haan lakaleka. 4 Iesen uta diet ing diet ru ugu tika ma ra bunurut, u te kute haut tiga hakilang waing diet naga barahit kaia ta ira rumus. 5 Halon het ma no dadas na kata na limaam, ma nu taram no nugu sinasaring, waing mehet ing u manga sip het, mehet naga langalanga taar. 6 God i te ianga meram tano uno halhaliana subaan hoken: “Iau te kap taman taar, kaik iau ni palau ira nugu matanaiabar ma no taman Sekem ma ni hapupuo tar no salil Sukot ma ni tar ie ta diet. 7 No hanuo Gileat a nugui, ma no huntunaan Manase a nugu mah ie. Epraim no nugu kukuha na hinarubu, ma Iudeia no nugu hakilang na harkurai. 8 Moab aie no nugu tultulai wara gisgis ira kakigu. Iau te se tar ira nugu pala lamaas na pinpaas ta Edom wara hamines bia iau te hahirhir ie. Iau te barangang ing iau petlaar Pilistia." 9 Sige na lamus halaka tar iau tano pise na hala nong i manga naliu ira uno lar? Sige na lua tagu ukaia Edom? 10 Kanong warah, God, augu at u te malok se tar het, ma pau hanahaan tika ma ira nuhet umri. 11 Tar ta harharahut wara turtur bat ira amehet suk, kanong a linge bia mon ira harharahut gar na tunotuno. 12 Dahat na bul hasur ira adahat suk ma no harharahut ta God. Aie at na papasuane hasur diet.