Ninge 114

1 Israel ga hansur ma Isip. Iakano huntunaan mon tane Iakop diet ga hansur huo meras ta ira matanaiabar a mes ira udiet nianga. 2 Io, Iudeia ga hanuat no halhaliana taman ta God, ma i la harkurai taar kaia Israel. 3 No Dardarana Tes ga nanaas ma ga hilau laah, ma no Taah Ioridaan ga saal tapukus. 4 Ira tamat na uladih diet ga karkaruas ho ira tumatena sipsip, ma ira nat na uladih hoing ra nat na sipsip. 5 Dardarana Tes, warah bih gu hilau laah? Taah Ioridaan, u saal tapukus warah mah? 6 Muat ira tamat na uladih, warah bih muat karkaruas ho ira tumatena sipsip, ma muat ira nat na uladih, ho ira nat na sipsip? 7 Augu no ula hanuo, dedar ra matmataan tano Watong, kaia tano matmataan tano God tane Iakop, 8 aie nong ga kios no haat bia na hanuat pup na taah, ma no malaapar mah bia na hanuat taah i la pupuat.