Ninge 111

1 Pirlat no Watong. Iau ni pirhakasing no Watong ma no nugu nilon bakut aram tano tamat na kis hulungai ta ira ut na takodas. 2 A tamat saakit ira pinapalim tano Watong. Diet ing diet kanakana ta kaike ra pakpakilai, diet la liklik murmur ira uno pinapalim. 3 Ira uno gingilaan i manga melmel saakit, ma ira uno takodasiana magingin na kis hatika. 4 I te hanakamaan leh dahat uta ira uno tamat na pinapalim na kinarup. No Watong, a ut na harmarsai ie, ma i la marse bakut tar dahat. 5 I tabar diet ing diet burtei ma ira adiet nian. I lik hatikane tar no uno kunubus. 6 I te tar se tar ira pise gar na mes na huntunaan taar ta ira uno matanaiabar. Io huo, i te haminas no dadas ta ira uno pinapalim taar ta diet. 7 Ira pinapalim na limana i takodas ma i hatutun ing i tange. Ira uno hartula bakut i tale bia da so nurnuruan ine. 8 Kaike ra hartula diet tur dikdikit hatika taar, ma da mur diet ma ra tutun na takodasiana magingin. 9 I ga kul halangalanga ira uno matanaiabar. I ga hatur hatikane tar no uno kunubus tika ma diet. No hinsana i halhaal ma da lat nabanei. 10 No urur tano Watong aie no burena ta ira minminonas. Diet bakut ing diet mur ira uno hartula, ira udiet lilik i manga palai. Da tar ra pirharlat hathatikai uram ho ie.