Isiyaasa 35

1 Biittaa bazzuunne mela biittay nashettana; Mela biittay nashshechchaa pooc’u giidde, c’iishshaa c’iishshaana. 2 I daroppe c’iishshaana; pooc’u giide nashshechchan yes’s’ana. Liibaanoosa bonchchuunne K’armmeloosanne Saaroona gitatetsay imettana; unttunttu Med’inaa Godaa bonchchuwaanne nu S’oossaa gitatetsaa be’ana. 3 Daabureedda kushetuwaanne arggaac’eedda gulbbataa mintsetsite. 4 Wozanaan yashshay de’iyaawantta, «Minnite! Yayyoppite! Hekko, hintte S’oossay haluwaa kessanawunne bare s’oossatetsan unttuntta muranaw yaana; I hinttena ashshana» yaagite. 5 He wode, k’ook’etuwaa ayfii dooyettana; tulletuwaa haytsaykka sisana. 6 Wobbatuwaa gen"iyaadan guppana; duudetuukka nashshechchan yes’s’ana; bazzuwaan haatsay melosaan pulttuu d’uuk’k’ana. 7 S’uuggiyaa shafii dagatteedda haatsaa gidanawaa; mela biittay haatsaa pulttana; worakanatuu allas’s’iyaasan maatay mak’k’aynne c’arii dolana. 8 Yan aakko ogii de’ana; ikka Geeshshatetsaa Ogiyaa geetettana. Geeshsha gidennawanttu he ogiyaanna aad’d’ikkino. Shin I geeshshatuwaassa gidanawaa; iita eeyyatuu aan simerettikkino. 9 Yan gaammuu de’enna; yashshiyaa do’atuukka hewaana aad’d’ikkino; yaanikka beettikkino; shin wozetteeddawanttu s’alalay hamettana. 10 Med’inaa Goday wozeeddawanttu simmana; yes’s’iiddi, S’iyoone yaana; med’inaa nashechchay unttunttu huup’iyaan wod’d’ana. Unttunttu nashshechchaanne hashshu giyaawaa demmana; kayyuunne oolii wora bak’atana.