ማዝሙርያ 47

1 ካዉተቱ ኡባይ ህንተ ኩሽያ ባቂተ፤ ቃላ ቁ ኦደ፥ ጾሳዉ ጋላታ የጽተ። 2 ኡባፐ ቂያ መና ጎዳይ ያየታናዉ በሴ፤ ሳኣ ኡባ ቦላን እ ዎልቃማ ካትያ። 3 ጋድያ አሳ ኑፐ ጋርሳና፥ ካዉተቱዋካ ኑ ገድያፐ ጋርሳና ዎደ፥ ኑዉ ሞድሴ። 4 እ ኑዉ ላትያ ቢታ ዶሬዳ፤ ሄ ቢታይ፥ እ ሲቅያ ያቆባ ዛራቱ ጬቀትያዋ። 5 ጾሳይ ፑደ ካዉተ አራታ ከሴዳ። መና ጎዳይ ፑደ ከስያ ዎደ፥ ናሸቻ ሆምቦጨይነ ማላካታ ፑናይ ስሰቴዳ። 6 ጾሳ ሳቢተ፤ ኤ፥ አ ሳቢተ። ኑ ካትያ ሳቢተ፤ ኤ፥ አ ሳቢተ። 7 ጾሳይ ሳኣ ኡባ ካትያ ግድያ ድራዉ፥ ጋላታ ሳባ ሳቢተ። 8 ጾሳይ ባረ ጌሻ ካዉተ አራታን ኡቴዳ፤ ጾሳይ ካዉተቱዋ ኡባ ሞዴ። 9 ካዉተቱዋ ካፓቱ፥ አብራሃማ ጾሳ አሳቱዋና እትፐ ሺቂኖ። አያዉ ጎፐ፥ ሳኣን ደእያ ዎልቃማቱ ኡባይ ጾሳሳ፤ እ ሎይ ቁ ጌዳ።