ማዝሙርያ 35

1 አቤት መና ጎዳዉ፥ ታናና ኤቀትያዋንቱና ኔን ኤቀታ፤ ታናና ኦለትያዋንቱና ኔን ኦለታ። 2 ጎንዳልያነ ሀራ ኦላ ሚሻ ኦይቃደ፥ ታና ማዳናዉ ደንዳ። 3 ታና የደርስያዋንቱ ቦላን ነ ቶራነ ማሻ ደን። ታና፥ “ታን ኔና አሽያዋ” ያጋ። 4 ታ ሸምፑዋ ዎናዉ ኮይያዋንቱ፥ ዬላትኖነ ካዉሽኖ፤ ታ ቦላ ኢታባ ማቀትያዋንቱ ካዉሺደ ጉየ ስምኖ። 5 መና ጎዳ ኪታንቻይ ኡንቱንታ የደርስያ ዎደ፥ ኡንቱንቱ ጫርኩዋ ስንን ደእያ ሱላዳን ሀንኖ። 6 መና ጎዳ ኪታንቻይ፥ ኡንቱንታ ደቻና ሀንያ ዎደ፥ ኡንቱንቱ ኦጊ ማነ ሀል ግዶ። 7 ጮ ታና ኦይቃናዉ ባረንቱ ጲርያ ዎድኖ፤ ቃይካ ጮ ታና ኩንድሳናዉ ኦላ ቦኬድኖ። 8 ኤረናን ደእሺና፥ ኡንቱንቱ ቦላን ባሻይ ፑቱ ጎ። ኡንቱንቱ ዎዳ ጲሪ ኡንቱንታ ኦይቆ፤ ኡንቱንቱ ባሻ ኦላን ኩንድኖ። 9 ሄ ዎደ ታን መና ጎዳን ናሸታና፤ እ አሼዳ ድራዉ፥ ታን ናሸቻ ኖጩ ጋና። 10 ታ ኩመን አሳተይ ኔና፥ “አቤት መና ጎዳዉ፥ ነ ማል ኦኔ? ህዬሳ ዎልቃማ ኩሽያፐ ዎ አካሳ። ህዬሳነ መቶታንቻ ቦንቂ ምያዋንቱ ኩሽያፐ አሻሳ” ያጋና። 11 ዎርዱዋ ማርካትያዋንቱ ታ ቦላ ደንዲኖ። ታን ኤረናባን ታና ሞቲኖ። 12 ታን ሎኡዋ ኦዳዋ ኩሽያ ኢታ ዛሪኖ፤ ያትና፥ ታን ታረካ አታድ። 13 ሽን ታን ኡንቱንቱ ሀርጌዳ ዎደ፥ ማቃ ማያድ፤ ታ አሳተ ጾማን ዳቡርሳድ። ታ ዎሳይ ዛሩዋ ደመናን አቴዳ። 14 ታ ሁጲያ ዝቂ ኦደ፥ ታ ዳቦ፥ ዎይ ታ እሻዉ ዬክያዋዳን ዬካድ። እት አሳይ ባረ አትዉ ካዮትያዋዳን ታ ሁጲያ ኦይቃደ፥ ዬካደ ሀመታድ። 15 ሽን ኡንቱንቱ ታን በቴዳዋን ናሸቲደ፥ ታ ቦላ ሺቄድኖ። ታን ኤረና ጋሱዋን ታና ዋደ፥ አጉዋ እጼድኖ። 16 ኢታ አሳይ ቅሊጭያዋዳን ኡንቱንቱ ታና ቅሊጪኖ፤ ኡንቱንቱ ይሎቲደ፥ ባረንቱ አቻ ጋርጬድኖ። 17 አቤት ጾሳዉ፥ ኔን አዉደ ጋካናዉ ጮኡ ጋደ ጼላይ? ኡንቱንቱ ኢታ ኦሱዋፐ ታና አሻ፤ ሀ ጋሞቱዋ ማላ አሳቱዋፐ ታ አልኦ ሸምፑዋ አሻ። 18 ሄ ዎደ ግታ ሺቁዋን ታን ነዉ ጋላታ እማና፤ ጮራ አሳ ሺቁዋን ታን ኔና ሳባና። 19 ጋሱ ባይናን ታና ሞርክያዋንቱ ናሸቶፕኖ፤ ታና ጮ እጽያዋንቱ ታ ቦላ ስምኤቶፕኖ። 20 ኡንቱንቱ ሳሮባ ሃሳይያዋ አጊደ፥ ቢታን ጮኡ ጊደ ደእያ አሳቱዋ ቦላን ዎርዱዋ መደ ሃሳዪኖ። 21 ኡንቱንቱ ባረንቱ እንጻርሳ ታ ቦላ ቃራዪደ፥ “ኤ፥ ኤ፥ ኔን ኦዳዋ ኑን ኑ አይፍያን በኤዶ” ያጊኖ። 22 አቤት መና ጎዳዉ፥ ኔን ሀዋ በኣደ፤ ጮኡ ጎፓ። አቤት ጾሳዉ፥ ኔን ታፐ ሃኮፓ። 23 አቤት ታ ጎዳዉ፥ ታ ጾሳዉ፥ ታ ድራዉ ደንዳ፤ ቤጎታ ታ ዶና ግዳደ ሞተታ። 24 አቤት መና ጎዳዉ፥ ታ ጾሳዉ፥ ነ ጽሎተን ታና ሻትን፤ ታ ሞርከቱዋ ናሸቾፓ። 25 ኡንቱንቱ ባረንቶ፥ “ሀሹ፥ ሀሹ፥ ኑን ኑ ዎዛናን አሞቴዳዋ ጋዶ። ኑን አ ምቴዶ” ጋናዳን ኦፓ። 26 ታ ዋይያን ናሸትያዋንቱ ኡባይ ዬላትኖነ ካዉሽኖ። ታ ቦላን ኦቶረትያዋንቱ ዬላነ ካዉሻ ማይኖ። 27 ታን ሻትምያዋ ዶስያዋንቱ ናሸቲደ፥ “ሀሹ!” ጊኖ። ኡንቱንቱ ኡባ ገደ፥ “ባረ ቆማ ሳሮተን ናሸትያ መና ጎዳይ ግታቶ” ያግኖ። 28 ጋላሳ ኩመንን ታ እንጻርሳይ፥ ነ ጽሎተባነ ነ ጋላታባ ኦዳና።