ማዝሙርያ 10

1 አቤት መና ጎዳዉ፥ አያዉ ሃካደ ኤቃይ? መቱዋ ዎድያን አያዉ ኔን ጌማይ? 2 ባረ ኦቶሩዋን ኢታ አሳይ ህዬሳ ሻንካቴ። ኡንቱንቱ ባረንቱ ፓላ ማቁዋን ባረንቶ ኦይቀትኖ። 3 ሄ ኢታይ ባረ ዎዛና ኢታ አሙዋን ጬቀቴ፤ ዮራንቻይ መና ጎዳ ቦላ ኢታ ቃላ ሃሳዬነ ካዴ። 4 ኢታይ ባረ ኦቶሩዋን ጾሳ ኮየና፤ ባረ ቆፋ ኡባንካ ጾሳ አይነ ኮየና። 5 ኡባባይ አዉ ኡባ ዎደካ ኩሜ፤ እ ኦቶሩዋ ጴጻሌ። ነ ህጊ አዉ ገለና፤ ባረ ሞርከቱዋ ቦላን እ ቅሊጬ። 6 ባረ ዎዛናን እ፥ “ታና አያይነ ቃና። ታና ኡባካ መቱ ጋከና” ያጊደ ቆፔ። 7 አ ዶናን ሸቃይ፥ ዎርዱነ ማንደይ ኩሜዳ። ባረ እንጻርሳን ገነባነ ኢታባ ሃሳያናዉ ኤሌሌ። 8 ሄራን ቆሰትያሳን እ ዙጊደ ኡቴ። ባረ ዎያዋ ዎናዉ ቆሰት ናጊደ፥ ዎልቃይ ባይና አሽከቱዋ ጼሌ። 9 ባረ ቆሰትያሳን ጌሚደ፥ ህዬሳ ኦይቃናዉ ጋሙዋዳን ዙጌ። እ ህዬሳ ኦይቂደ፥ ባረ ጲርያን ጎቺደ አፌ። 10 ያትና፥ ዎልቃይ ባይና ህዬሳይ ሾጨቴ፤ ንፕ ጌነ ሄ ምኑዋን ጾነቴ። 11 እ ባረ ዎዛናን፥ “ጾሳይ ታና ዶግ ክቼዳ። ባረ ሶምኡዋ ታፐ ገን ክቼዳ፤ ኡባካ እ በኤና” ያጌ። 12 አቤት መና ጎዳዉ፥ ደንዳ። ጾሳዉ፥ ነ ኩሽያ ቁ ኦደ ደን፤ ህዬሳ ዶጎፓ። 13 ናጋራንቻ ኡራይ ባረ ዎዛናን፥ ጾሳ አያዉ ካ? ባረ ቆፋንካ፥ “ጾሳይ ታና ሙረና” አያዉ ያጊ? 14 ሽን ጾሳዉ፥ ኔን ቱሙካ በኣሳ፤ መቱዋካ ዋይያካ ጼላሳ። ኔን ኡባ ዎደ ኑና ማዳናዉ ጊጋ ኡታዳ። ዪአቶ ኔን ማዱዋ። ቆሄቴዳዌ ኔን ማዳናዳን ባረና ነዉ ሼ። 15 ገንያዋንቱ ዎልቃ ኔን ዉርሳ፤ ኢታ አሳቱዋካ ሄዋዳ ኦ። ላኤን ኡንቱንቱ ግዶን ኢታተይ ቤተና ማላ ኡንቱንታ ሙራ። 16 መና ጎዳይ መ መናዉ ካተቲደ ደኤ፤ ሀራ ካዉተቱ አ ቢታፐ ያና። 17 አቤት መና ጎዳዉ፥ ኔን ባረንታ ካዉሽያዋንቱ አሙዋ ስሳሳ። ኔን ኡንቱንታ ምንሳ። 18 ይአቶነ ኡንኤቴዳዋንቶ ቱሙዋ ፕርዳ፤ ሳኣን ደእያ አሳይ፥ ኡንቱንታ ያሽሰና ማላ፥ ኡንቱንቱ ዋሱዋ ስሳሳ።