ሌምሱዋ 23

1 ኔን አሳ ሞድያዋና እትፐ ቁማ ማናዉ ኡቴዳ ዎደ፥ ነ ስንን ደእያዋ ሎይደ አኬካ። 2 ኔን ዳሮ ዮራ አሳ ግዶፐ፥ ናገታ። 3 እ ኔና ፓጫናዉ ዳንዳይያ ድራዉ፥ አዳ ማልኦ ቁማዉ ያዉነቶፓ። 4 ዱረታናዉ ዳቡሮፓ፤ ሄዋ ማላ ኬስያ አጋናዉ ጭንጫ ግዳ። 5 ሄዋ ማላ ዱረተይ ኔን ጼልሽን ያና፤ ቀፍያ ከሲደ አርጋንዋዳን፥ ሳሉዋ ፓላና። 6 ኡዝያ ቁማ ሞፓ፤ አ ማልኦ ቁማካ ማናዉ አሞቶፓ። 7 ማላትሳናዉ እ ኔና፥ “ማ፤ ኡሻ” ያጌፐ አትና፥ አ ዎዛናይ ኔናና ደኤና። 8 ኔን ሜዳ ላፋ ቁማ ጮሻና፤ ነ ጋላታይካ መላ ግዳና። 9 ቦዛዉ ሎኦባ ሃሳዮፓ፤ አያዉ ጎፐ፥ ነ አዳ ኤራ ሃሳያ እ ካና። 10 በን ዛዋ ሾዶፓ፤ ቃይ አዉ ባይና ናናቱዋ ጋድያ ዛዋ ሱጎፓ፤ 11 አያዉ ጎፐ፥ ኡንቱንታ አሽያ ጾሳይ ምኖ፤ እ ኡንቱንቱ ድራዉ ኔናና ሞተታና። 12 ነ አስታማሪ ነዉ ኦድያዋ ሀይዛ፤ ነ ሀይካ ኤራ ቃላኮ ዛራ። 13 ናኣ ሴረናን አጎፓ፤ ኔን አ ቃይጼርያን ዋፐ፥ እ ሀይቀና። 14 ኔን አ ቃይጼርያን ዋፐ፥ አ ሸምፑዋ ሀይቁዋፐ አሻሳ። 15 ታ ናአዉ፥ ኔን ነ ዎዛናን አዳ ኤራንቻ ግዶፐ፥ ታ ዎዛናይካ ናሸታና፤ 16 ነ እንጻርሳይ ሱረባ ሃሳዮፐ፥ ታ ዎዛናይ ናሸቴ። 17 ናጋራንቻቱዋ ቃናቶፓ፤ ሽን ኡባ ገደ መና ጎዳዉ ያይያዋ አጎፓ። 18 ያቶፐ ነዉ ስንናዉ ሳአይ ኬካና፤ ነ ህዶታይካ የና። 19 ታ ናአዉ፥ ስሳ፤ ዎዛናማ ግዳ፤ ነ ዎዛና ሱረ ኦግያን ዎ። 20 ዳሮ ዎይንያ ኤሳ ኡሽያዋንቱናነ አሹዋ ሙሳዉ ያረትያዋንቱና ዙፐቶፓ፤ 21 አያዉ ጎፐ፥ ማትያዋንቱነ ዮራንቻቱ ማንቃና፤ ገምእሹዋ ዳሩ አሳ ዉሬዳ ጩርቃ ማይዝሴ። 22 ኔና የሌዳ ነ አቡ ኦድያዋ ስሳ፤ ነ አታካ ኤጬዳ ዎደ ካፓ። 23 ቱሙዋ፥ አዳ ኤራተ፥ ትምርትያነ አኬካ ሻማፐ አትና፥ ኡባካ ዛልኦፓ። 24 ጽሎ ናኣ አቡ ሎይ ናሸታና፤ ዎዛናማ ናኣ የሌዳ ኡራይካ አን ሀሹ ጋና። 25 ነ አቡነ ነ አታ ናሸትኖ፤ ኔና የሌዳናካ ሀሹ ጉ። 26 ታ ናአዉ፥ ታ ዞርያ ሀይዛ፤ ታን ሀንያዋዳን ሀና። 27 አያዉ ጎፐ፥ ዎሹምያ ምሽራታ ጪሞ ኦላ ማላ፤ ጫራቱዋ ኦይቂያ ማቻታካ ኡንአ ኦላ ማላ። 28 አ ፓኑዋዳን ቆሰታ ኡታደ ናጋዉ፤ አማነተና አቱማ አሳ አሳ ግዶን ዳርሳዉ። 29 “ዎ!” ግያ ዋሱ ኦሴ? ካዩ ኦሴ? ዋላሳይ ኦሴ? ዙዙንይ ኦሴ? ጋሱ ባይናን ማዱጽያዌ ኦሴ? አይፊ ዞእያዌ ኦሴ? 30 ዎይንያ ኤሳ ኡሺደ ጋምእያዋንቱሳ ግደኔ? ዋላከቴዳ ዎይንያ ኤሳ ኡሽ ኡሽ በእያዋንቱሳ ግደኔ? 31 ዎይንያ ኤሳይ ዞኤዳ ዎደ፥ አ ማላይ ብርልያ ግዶን ጶልያ ዎደ፥ ኡሽሽን ዋላላቲደ ገልያ ዎደ፥ አ ጼሎፓ። 32 ዉርሰን እ ሾሻዳን ዱኬ፤ ሙሉሙቀ ሾሻዳንካ ባረ ይሻ ፑኬ። 33 ነ አይፊ በእ ኤረናዋ በአና፤ ነ ዎዛናይካ ሱረ ቆፓናዉነ ሃሳያናዉ ዳንዳየና። 34 ኔን አባ ግዶን ሆቢ ቃያ ማርካብያ ጼራን ግሴዳ ኡራ ማላ ግዳና። 35 ኔን፥ “ኡንቱንቱ ታና ደቼድኖ፤ ሽን ታን ቆሄታበይከ። ኡንቱንቱ ታና ዋድኖ፤ ሽን ታዉ ኤረትቤና። ሀራ ኡሻ ኡሻናዉ ታን አዉደ ደንዳንድታሻ?” ያጋና።