ፕልሞና 1

1 ታን ጳዉሎስ፥ የሱስ ክርስቶሳ ድራዉ ቃሹዋን ደእያዌነ ኑ እሻ ጽሞቶስ፥ ኑናና ኦያ ኑን ሲቅያ ፕልሞናዉ፥ 2 ነ ጎለን ሺቅያ አማንያዋንቶ፥ ኑ ምቻት አፍብስነ ኑናና እትፐ ደእያ ክርስቶሳ ዎታዳራ አርክፖሳዉ ሀ ዳብዳቢያ ጻፌቶ። 3 ጾሳ ኑ አዉዋፐነ ኑ ጎዳ የሱስ ክርስቶሳፐ አ ኬካተይነ ሳሮተይ ህንተንቶ ግዶ። 4 ኔን ጾሳ አሳቱዋ ሲቅያዋነ ጎዳ የሱሳ አማንያዋ ታን ስስያ ድራዉ፥ ጾሳ ዎሳደ ኔና ሀሳይያ ዎደ ኡባን፥ ታ ጾሳ ጋላታይ። 6 ኔን ነ አማኑዋ ሀራቱዋና ሻክያዌ ኑዉ ክርስቶስ የሱሳ ባጋና ይያ ሎኦባ ኡባ ኤርሳና ማላ፥ ታን ጾሳ ዎሳይ። 7 አያዉ ጎፐ፥ ጾሳ አሳቱዋ ዎዛናይ ነ ኪታን ምኔዳ ድራዉ፥ ታ እሻዉ፥ ታን ነ ሲቁዋን ዳሮ ናሸቻነ መንዋ ደማድ። 8 ሄዋ ድራዉ፥ ኔን ኦናዉ በስያዋ ኦና ማላ፥ ታን ኔና አዛዛናዉ ክርስቶሳ ባጋና ጻሎፐካ፥ 9 ታን ጳዉሎስ ጭሜዳዌ፥ ክርስቶስ የሱሳዉ ሀእካ ቃሹዋን ደእያዌ፥ ሲቁዋ ድራዉ፥ ኔና ዎሳይ። 10 ታን ቃሹዋን ደኣደ አዉ አዉዋ ግዴዳ ታ ናኣ አናስሞሳ ድራዉ፥ ኔና ዎሳይ። 11 እ ካሰ ኔና ጎኤና፤ ሽን ሀእ ኔናካ ታናካ ቱሙ ጎኤ። 12 ታን ዎዛናፐ ዶስያ አናስሞሳ ኔኮ የዶዌ ታ ዎዛና የዶዋ። ታን ዎንጋላ ድራዉ ቃሸታ ኡታ ደእሽን፥ ኔና ኮቺደ፥ ታና ማዳና ማላ፥ ታ ማታን አ አሻናዉ ኮያይ። 14 ሽን ኔን ነ ሸንያዳን ኦናዋ ኮያይፐ አትን፥ ኔናና ዞረተናን ዎልቃን አይነ ኦናዉ ኮይከ። 15 አናስሞስ ጉ ዎድያ ኔፐ ሻከቴዳዌ፥ ኦን ኤር ስሚደ፥ ኡባ ዎደካ ኔናና ደአናሰንቶነ። 16 ስም ሀዋፐ ስንዉ አናስሞስ አይልያ ግደና፤ ሽን አይልያፐ እ ሎይ አ፤ እ ታዉ አይ ኬና ሲቆ እሼ! ቃይ እ ነዉ አሳ ባጋናካ ጎዳ ባጋናካ አይ ኬና አዳ እሻ ግዳንዴሻ! 17 ስም ኔን ታና ነ ላገ ግያዋ ግዶፐ፥ ታና ሞክያዋዳን፥ አ ሞካ። 18 እ ነዉ ባይዜዳባይ ዎይ አ ቦላ ነዉ አጩ ደኦፐ፥ ታፐ ጭጋ አካ። 19 ሄ አጩዋ ታን ጭጋና ጋደ፥ ታን ጳዉሎስ ታ ኩሽያን ጻፋይ። ኔን ታዉ ነ ሸምፑዋ አጮታ ኡቴዳዋ ታን ኔና ሀሳይሳናዉ ኮሸና። 20 ኤ፥ ታ እሻዉ፥ ጎዳ ባጋና ኔፐ ማዱዋ ደማናዉ ኮያይ። ክርስቶሳ ባጋና ታና መን። 21 ታን ጌዳዋፐ ዳሩዋ ኔን ኦናዋ ኤራደ፥ ቃይ ነ ታዉ አዛዘታናዋካ አማናደ፥ ሀዋ ነዉ ጻፋይ። 22 ቃይ ህንተንቱ ኤለካ ታዉ እማይ ሸምፕያ ጎልያ ጊግስተ። አያዉ ጎፐ፥ ጾሳይ ህንተንቱ ዎሳን ታና ህንተንቶ ጉየ ዛሪደ እማና ጋደ ቆፓይ። 23 ክርስቶስ የሱሳ ድራዉ፥ ታናና ቃሹዋን ደእያ ኤፓፍር ኔና ሳሮ ሳሮ ጌ። 24 ቃይ ታናና እትፐ ኦያ ማርቆስ፥ አርስጽሮኮስ፥ ዴማስነ ሉቃስ ኔና ሳሮ ሳሮ ጊኖ። 25 ጎዳ የሱስ ክርስቶሳ አ ኬካተይ ህንተንቱ አያናና ግዶ።