ፓይዱዋ 14

1 ሄ ጋላሳ ቃማ ማባራይ ኡባይ ባረንቱ ቃላ ቂሲደ ዬኬድኖ። 2 እስራኤልያ አሳይ ኡባይ ሙሴ ቦላነ አሮና ቦላ ዙዙሜድኖ። ማባራይ ኩመንይ ኡንቱንታ፥ “ኑን ግብጼ ጋድያን ደኢደ ሀይቄዳዋ ግዴሮኮ! ዎይ ኑን ሀ መላ ቢታን ሀይቄዳዋ ግዴሮኮ! 3 ማሻን ኑና ዎ ዉርሳናዉ መና ጎዳይ ሀ ቢታ ኑና አያዉ አሂ? ኑ ማቼቱነ ኑ ናናይ ኦሞደታና። ሄዋፐ ጉየ ግብጼ ቢታ ስምያዌ ኑዉ ኬከኔየ?” ያጌድኖ። 4 ቃይ ኡንቱንቱ እቱ እቱዋ፥ “ኑን ካለያዋ ዶሪደ፥ ጉየ ግብጼ ስሜቶ” ያጌድኖ። 5 ሙሴነ አሮን ሄዋን ሺቄዳ እስራኤልያ አሳ ማባራ ኡባ ስንን ሶምኡዋ ሳኣን ጋደ ጉፋኔድኖ። 6 ሄ ቢታ ዎቼዳ አሳቱ ግዶፐ ኔዌ ናአይ ኢያሱነ ይፉነ ናአይ ካሌብ ባረንቱ ማዩዋ ፔድኖ። 7 እስራኤልያ አሳ ማባራ ኡባዉ፥ “ኑን ካን ከሲደ ዎቼዳ ቢታይ ሎይ ዳሮ ሎአ። 8 መና ጎዳይ ኑናን ናሸትያዋ ግዶፐ፥ ማይነ ኤሳይ ጎግያ ሄ ቢታዉ ኑና እ ገልሳና፤ ሄ ቢታ ኑዉ እ እማና። 9 ሄዋ ድራዉ፥ መና ጎዳ ቦላ ማካላ ማካሎፕተ። ሄ ቢታ አሳዉ ያዮፕተ፤ ኡንቱንቱ ኑዉ ሃ ኡሻካ ጋክክኖ። ኡንቱንቶ አምቦምያዌ ባዋ፤ ሽን መና ጎዳይ ኑናና ደኤ። ህንተ ኡንቱንቶ ያዮፕተ!” ያጌድኖ። 10 ማባራይ ኡባይ ኡንቱንታ ሹቻን ጫዳናዉ ሃሳዬድኖ። ሄ ዎደ መና ጎዳ ቦንቹ ጋከትያ ዱንካንያን እስራኤልያ አሳ ኡባዉ ቆንጬዳ። 11 መና ጎዳይ ሙሳ፥ “ሀ አሳይ አዉደ ጋካናዉ ታና ካኔ? ታን ኡንቱንቱ ግዱዋን ኦዳ ማላታ ኡባ በኢደ፥ አዉደ ጋካናዉ ኡንቱንቱ ታናን አማነናን እጻኔ? 12 ታን ኡንቱንታ ኢታ ሀርግያን ሾጫደ ይሳና፤ ያታደ ታን ኔና ኡንቱንቱፐ ዳርያነ ምንያ ካዉተዉ አዉዋ ኦና” ያጌዳ። 13 ሙሴ መና ጎዳ ሀዋዳን ያጊደ ዎሴዳ፤ “ኔን ነ ዎልቃን ሀ አሳ ግብጼፐ ፑደ ከሴዳዋ ኤርያ ግብጼቱ ሀዋ ስሶፐ፥ ኡንቱንቱ ዋጋኔ? 14 ኡንቱንቱ ሀ ጋድያን ደእያዋንቶካ ሄዋ ኦዳና። አቤት መና ጎዳዉ፥ ኔን ሀ አሳ ግዱዋን ደእያዋ ኡንቱንቱ ስሴድኖ። አቤት መና ጎዳዉ፥ ኑን ኔና በኤዳዋ ኡንቱንቱ ኤሬድኖ፤ ነ ሻሪ ኡንቱንቱፐ ቦላና ታክያዋነ ጋላስ ሻርያ ቱሳን፥ ቃማ ታማ ቱሳን ኔን ኡንቱንቱ ስንን ብያዋ በኤድኖ። 15 ሀእ ኔን ሀ አሳ ኡባ እት ኩን ዎያዋ ግዶፐ፥ ነ ካሰ ኦዳዋ ስሴዳ ካዉተቱ፥ 16 መና ጎዳይ ሀ አሳ፥ ‘ህንተዉ እማና ጊደ ጫቄዳ ቢታ ኡንቱንታ አፋናዉ ዳንዳይቤና ድራዉ፥ መላ ቢታን ኡንቱንታ ዎዳ’ ያጊደ ሃሳያና። 17 “ሄዋ ድራዉ፥ ጎዳዉ፥ ኔን ነ ዎልቃ ኑና በሳ፤ ኔን ጋደ፥ ‘መና ጎዳይ ዳንዳያንቻነ አገና ሲቁዋን ኩሜዳዋ፤ ናጋራነ ማካላ አቶ ግያዋ፤ ግዶፐነ፥ ባይዛንቻ ሙረናን አገናዋ፤ አዎቱዋ ናጋራ ድራዉ ናናቱዋ ሄዘንነ ኦይደን የለታ ጋካናዉ ሙርያዋ’ ጋደ ኦዳ ዎዳዋ ፖላ። 19 ሀ አሳይ ግብጼፐ ከሶደፐ ዶማደ ሀች ጋካናዉ ኔን አቶ ጌዳዋዳን፥ ነ አገና ሲቁዋ ዳሩዋን ሀ አሳ ናጋራ አቶ ጋርኪ!” ያጌዳ። 20 መና ጎዳይ ሙሳ፥ “ኔን ኦቼዳዋዳን ታን ኡንቱንቶ አቶ ጋድ። 21 ሽን ታ ደኡዋን ጫቃይ፤ መና ጎዳ ቦንቹ ሳኣ ኡባ ኩምያዋዳን፥ 22 ሀ አሳፐ እቱነ ሄ ቢታ በኤና። ታ ቦንቹዋነ ግብጼ ቢታንነ መላ ቢታ ታን ኦዳ ማላታ ሀ አሳቱ በኤድኖ፤ ሽን ኡንቱንቱ ታሙ ገደ ታና ፓጬድኖነ ታ ቃላ ስሰናን እጼድኖ። ሄዋ ድራዉ፥ ታን ኡንቱንቱ ማይዛ አዋቶ እማና ጋደ ጫቄዳ ቢታ ታና ካዳዋንቱፐ እቱነ ሙለካ በኤና። 24 ሽን ታ ቆማይ ካሌብ ኡንቱንቱፐ ዱማትያ ድራዉነ እ ታና ፖሎ ዎዛናፐ ካሌዳ ድራዉ፥ ታን እ ካሰ ቤዳ ቢታ አ ጋና፤ አ ዘረይ ሄ ቢታ ላታና። 25 ሽን ሀእ አማሌቃቱነ ካናነቱ ዛንጋራን ደእያ ድራዉ፥ ዎንት ጉየ ስሚደ፥ ዞኦ አባኮ አፍያ ኦግያ ኦይቂደ መላ ቢታ ቢተ” ያጌዳ። 26 ቃይ መና ጎዳይ ሙሳነ አሮና ሀዋዳን ያጌዳ፤ 27 “ሀ ኢታ አሳይ ታ ቦላ አዉደ ጋካናዉ ዙዙማኔ? ታን እስራኤልያ አሳ ዙዙን ኡባ ስሳድ። 28 ሄዋ ድራዉ፥ ኔን ኡንቱንቶ ሀዋዳን ያጋደ ኦዳ፤ ‘ታ ደኡዋን ጫቃይ፤ ታን ህንተ ሃሳይሽን ታ ሀይን ስሴዳዋ ህንተንቶ ኦና። ታን መና ጎዳይ ሄዋ ኦዳይ። 29 ህንተ አሃይ ሀ መላ ቢታን ኩንዳና፤ አያዉ ጎፐ፥ አሳ ፓይድያ ዎደ ፓይደቴዳ ላታሙ ላይነ ሄዋፐ ቦላና ደእያ አሳይ ኡባይ ታ ቦላ ዙዙሜድታ። 30 ይፉነ ናኣ ካሌባፐነ ኔዌ ናኣ ኢያሱፐ አትና፥ ህንተፐ ኦንነ ታን ህንተና ዎናዉ ጫቄዳ ሄ ቢታ ገለና። 31 ህንተ፥ “ኑ ናናይ ኦሞደታና” ጌዳ ህንተ ጉ ናናቱዋ ሄ ህንተ ካዳ ቢታ ገልሳና፤ ቢታይካ ኡንቱንቱሳ ግዳናዋ። 32 ሽን ህንተና ግዶፐ፥ ህንተ አሃይ ሀ መላ ቢታን ኩንዳና። 33 ህንተ አማነትቤና ድራዉ፥ ህንተ ዉርሰ አሃይ ሀ መላ ቢታ ዉላና ጋካናዉ፥ ህንተ ናናይ ዋየቲደ፥ ሀ መላ ቢታ ኦይታሙ ላይ ሄንንቻ ግዲደ ዩያና። 34 ህንተ ሄ ቢታ ዎቼዳ ሄ ኦይታሙ ጋላሳ ፓይዱዋን፥ እት ጋላሳዉ እት ላይ፥ ሄዌነ፥ ኦይታሙ ላይዉ ህንተ ናጋራ ድራዉ ህንተ ዋየታና፤ ታን ህንተ ቦላ ደንድያዋ ህንተ ኤራና’ ያጋ ኦዳ። 35 ታን መና ጎዳይ ሀዋ ኦዳይ። ታ ቦላ ሺቅ ኡቴዳ ሀ ኢታ ማባራ ቦላ ሀዋዳን ቱሙ ኦና: ኡንቱንቱ ሀ መላ ቢታን ዉራና፤ ሀዋን ኡንቱንቱ ሀይቃና” ያጌዳ። 36 ሄ ቢታ ዎቻና ማላ፥ ሙሴ ኡንቱንታ ኪትና ቢደ ስሜዳ አሳቱ፥ ሄ ቢታ ኢታ ኦዱዋ ኦዲደ፥ ሙሴ ቦላ አሳይ ኡባይ ዙዙማና ማላ ኦዳዋንቱ፥ 37 ሄ ኢታ ኦዱዋ ኦዴዳ አሳቱ፥ መና ጎዳ ስን ቦሻን ሀይቄድኖ። 38 ሄ ቢታ ዎቻናዉ ቤዳ አሳቱዋፐ ይፉነ ናአይ ካሌብነ ኔዌ ናአይ ኢያሱ ጻላላይ ፓጻ አቴድኖ። 39 ሙሴ ሀዋ እስራኤልያ አሳዉ ኡባዉ ኦዴዳ ዎደ፥ አሳይ ሎይ ዬኬዳ። 40 ዎንተ ጋላስ ዎንታ ጉራን ኡንቱንቱ ደንዲደ፥ ፑደ ገዘ ቢታ ከሲደ፥ “ኑን ናጋራ ኦዶ፤ ሽን ሀእ ጾሳይ ኑዉ እማና ጌዳ ሳኣ ፑደ ከሳና” ያጌድኖ። 41 ሽን ሙሴ ኡንቱንታ፥ “መና ጎዳ አዛዙዋ ህንተ አያዉ መንቴ? ህንተዉ ሀነና። 42 መና ጎዳይ ህንተናና ደኤና ድራዉ፥ ፑደ ከሶፕተ፤ ህንተ ሞርከቱ ህንተና ጾናና። 43 አማሌቃ አሳቱዋናነ ካናነ አሳቱዋና ህንተ ኦለታና፤ ህንተ ማሻን ሀይቃና። መና ጎዳፐ ህንተ ዎራ ስሜዳ ድራዉ፥ መና ጎዳይ ህንተናና ደኤና” ያጌዳ። 44 ሽን ኡንቱንቱ መና ጎዳ ጫቁዋ ታቦታይነ ሙሴነ ዱንካኔዳ ሳኣፐ ደንዳና ዮፐካ፥ ገዘ ቢታ ከሳናዉ ጻሊደ ደንዴድኖ። 45 ገዘ ጋድያን ደእያ አማሌቃ አሳቱነ ካናነ አሳቱ ዎደ ኡንቱንቱ ኦላይ ጾኒደ፥ ሆርማ ጋካናዉ ኡንቱንታ የደርሴድኖ።