ኢያሳ 23

1 ዳሮ ዎድያፐ ጉይያን፥ መና ጎዳይ እስራኤልያ አሳ ኡንቱንቱ ዩሹዋን ደእያ ሞርከቱዋ ኡባፐ ሸምፕሴዳ። ሄ ዎደ ኢያሱ ጭሚደ፥ ዎድያ ሎይ ሱጌዳ። 2 ያቴዳዌ እስራኤልያ አሳ ኡባ፥ ጭማቱዋ፥ ካፓቱዋ፥ ዳናቱዋነ ኦላ ጋዳዋቱዋ እትፐ ጼሲደ፥ ሀዋዳን ያጌዳ፤ “ታን ጭማደ፥ ዎድያ ሎይ ሱጋድ። 3 መና ጎዳይ ህንተንቱ ጾሳይ ህንተንቱ ድራዉ ሀ ካዉተቱዋ ኡባ ኦዳዋ ህንተንቱ ህንተንቱ ሁጲያዉ በኤድታ። ህንተንቶ ኦለቴዳዌ መና ጎዳ ህንተንቱ ጾሳተነ። 4 በእተ፥ ዮርዳኖሳ ሻፋፐ ዶሚደ አዋይ ዉልያ ባጋና ደእያ ሜድትራነ አባ ጋካናዉ ደእያ፥ አቴዳ ካዉተቱዋ ቢታ ኡባ፥ ታን ይሴዳ ካዉተቱ ቢታናካ ላታ ጋደ ኦደ፥ ህንተንቱ ዛረቶ ሻካደ እማድ። 5 መና ጎዳይ ህንተንቱ ጾሳይ ኡንቱንታ ሱጋናነ ህንተንቱ ስንፐ ላግና መና ጎዳይ ህንተንቱ ጾሳይ ጌዳዋዳን፥ ህንተንቱ ኡንቱንቱ ጋድያ ላታና። 6 “ሄዋ ድራዉ፥ ሙሴ ህግያ ማጻፋን ጻፈቴዳ ኡባ ናጋናዉነ ኦናዉ ሎይ ምንተ፤ አፐ ኡሸቻ ሀድርሳ ጎፕተ። 7 ሄዋን ህንተንቱ ግዶን አቴዳ ሀ ካዉተቱዋና ዋላከቶፕተ። ኡንቱንቱ ጾሳቱዋ ሱን ደንፕተ ዎይ ኡንቱንቱ ሱንን ጫቆፕተ። ኡንቱንቶ ኦፕተ ዎይ ኡንቱንቶ ጎይኖፕተ። 8 ሽን ሀቼ ጋካናዉ ህንተንቱ ኦዳዋዳን፥ ጾሳ ህንተንቱ መና ጎዳ ሎይ ኦይክተ። 9 “አያዉ ጎፐ፥ መና ጎዳይ ግታነ ምኖ ካዉተቱዋ ህንተንቱ ስንፐ ከሴዳ። ህንተና ግዶፐ፥ ሀቼ ጋካናዉ ኦንነ ህንተናና ኤቀታናዉ ዳንዳይቤና። 10 መና ጎዳይ ህንተንቱ ጾሳይ ህንተንቶ ጌዳዋዳን፥ እ ባረ ሁጲያዉ ህንተንቶ ኦለትያ ድራዉ፥ ህንተፐ እት አሳይ ሻአ አሳ የደርሴዳ። 11 መና ጎዳ ህንተንቱ ጾሳ ኡባ ገደ ሲቃናዋ ዶጎፕተ። 12 ህንተንቱ ጉየ ስሚደ፥ ካዉተቱዋፐ ሀዋን ህንተንቱ ግዱዋን አቴዳ አሳና እቱዋ ግዶፐ፥ ኡንቱንቱ ማቻቱዋ ህንተንቶ፥ ህንተንቱ ማቻቱዋ ኡንቱንቶ እም ዋላከቶፐ፥ 13 መና ጎዳይ ህንተንቱ ጾሳይ ሀ ካዉተቱዋ ህንተንቱ ስንፐ የደርስያዋ አግ ባሻናዋ ጌሺደ ኤርተ። ሽን መና ጎዳይ ህንተንቱ ጾሳይ እሜዳ ሀ ሎኦ ጋድያፐ ህንተንቱ ያና ጋካናዉ፥ ኡንቱንቱ ህንተንቶ ጲረነ ግተ ግዳና፤ ህንተንቱ ዞክያዉ ልሶ፥ ህንተንቱ አይፍያዉካ አጉን ግዳና። 14 “ሀእ ስም ታን ሀይቃና ማታድ። መና ጎዳይ ህንተንቱ ጾሳይ ህንተንቶ እማና ጌዳ ሎኦ ኡባፐ እትባይነ አትቤናዋ ህንተንቱ ኡባይ ህንተንቱ ዎዛናንነ ሸምፑዋን ኤሪታ። እ ህንተንቶ እማና ጌዳዋፐ እትባይነ አተናን፥ ኡባይ ፖለቴዳ። 15 መና ጎዳይ ህንተንቱ ጾሳይ ህንተንቶ እማና ጌዳ ሎኦባይ ኡባይ አተናን ፖለቴዳዋዳን፥ መና ጎዳይ ህንተንቱ ጾሳይ ህንተንቶ እሜዳ ሀ ሎኦ ጋድያፐ ህንተንታ ይሳና ጋካናዉ፥ ኢታ ሙሩዋ ኡባካ ህንተንቱ ቦላን ሄዋዳን አሀና። 16 መና ጎዳይ ህንተንቱ ጾሳይ ህንተናና ጫቀቴዳ ቃላ ጫቁዋ ህንተንቱ መንፐ፥ ቢደ ሀራ ጾሳቶ ኦፐነ ጎይኖፐ፥ መና ጎዳ ሀንቁ ህንተንቱ ቦላ ኤጽ ከሳና፤ እ ህንተንቶ እሜዳ ሎኦ ቢታፐካ ህንተንቱ ኤለካ ያና” ያጌዳ።