ኢዮባ 42

1 ሄዋፐ ጉይያን፥ ኢዮብ መና ጎዳዉ ሀዋዳን ያጊደ ዛሬዳ፤ 2 “ኔን ኡባባ ኦናዉ ዳንዳይያዋነ ነ ሀልቹዋካ ድጋናዉ ዳንዳይያዌ ባይናዋ ታን ኤራይ። 3 ‘ላ ሀ ኤራይ ባይናን ታ ዞርያ ገንያዌ ኦኔ?’ ያጋደ ታና ኦቻዳ። ቱሙፐ ታን ታዉ ገልቤናባ ሃሳያድ፤ ታ ኤራፐ ሃኬዳ ማላልስያባ ሃሳያድ። 4 “ኔን ታና፥ ‘ታን ኦድያ ዎደ ሀይዛ፤ ታን ኦችያ ዎደ ኦዳ’ ያጋዳ። 5 “ታን ካሰ ነባ ታ ሀይን ስሳድ፤ ሽን ሀእ ታ አይፍያን ኔና በኣድ። 6 ሄዋ ድራዉ፥ ታን ሃሳዬዳዌ ታና ዬላዬዳ። ታን ብድንንነ ባናን ኡታደ ፓጻይ” ያጌዳ። 7 መና ጎዳይ ሀዋ ኢዮባዉ ሃሳዬዳዋፐ ጉይያን፥ ተማናፐ ዬዳ ኤልፋዛ ሀዋዳን ያጌዳ፤ “ታ ቆማ እዮበዋዳን፥ ህንተ ታዋ ልከ ሃሳይቤና ድራዉ፥ ነ ቦላነ ነ ላኡ ላገቱዋ ቦላ ታ ሀንቁ ኤጽ ከሴዳ። 8 ሄዋ ድራዉ፥ ሀእ ላፑን ኮሩማቱዋነ ላፑን ዶርሳ ኦርገቱዋ አኪደ፥ ታ ቆማ ኢዮባኮ ቢተ፤ ጹግያ ያርሹዋ ህንተ ባይዞ ያርሽተ። ታ ቆማይ ኢዮብ ህንተዉ ዎሳና፤ ታንካ አ ዎሳ ስሳደ፥ ህንተ ባይዙዋዳን ሙርከ። ህንተ ታ ቆማ እዮበዋዳን ታባ ልከ ሃሳይበይክታ” ያጌዳ። 9 ሄዋፐ ጉይያን፥ ተማናፐ ዬዳ ኤልፋዝ፥ ሹሀፐ ዬዳ ብልዳድነ ናእማፐ ዬዳ ጾፋር ቢደ፥ መና ጎዳይ ኡንቱንታ አዛዜዳዋዳን ኦድኖ። መና ጎዳይካ ኢዮባ ዎሳ ስሴዳ። 10 ኢዮብ ባረ ላገቶ ዎሴዳዋፐ ጉይያን፥ መና ጎዳይ አዉ ዛሪደ እሻልሴዳ፤ አዉ ካሰዋ ድራዉ ላኡ ኩሽያ ኦደ እሜዳ። 11 ሄዋፐ ጉይያን፥ አ እሻቱ፥ አ ምቼቱነ ካሰ አ ኤርያዋንቱ ኡባቱ አኮ ዬድኖ፤ አ ሶን አናና ግብራ ሜድኖ። አዉ ካዮቲደ፥ መና ጎዳይ አ ቦላ አሄዳ መቶ ኡባፐ አ ምንድኖ። ቃይ ኡባይካ አዉ ዎርቃ ምግዱዋነ ብራ እሜድኖ። 12 መና ጎዳይ ኢዮባ ዉርሰ ላይ ኮይሮ ላይፐ አደ አንጄዳ። ኢዮባዉ ታማነ ኦይዱ ሻኡ ዶርሳቱ፥ ኡሱፑን ሻኡ ጋሎቱ፥ እት ሻኡ ዋ ቦራቱነ እት ሻኡ ማጫ ሀረቱ ደኢኖ። 13 ቃይ አዉ ላፑን አቱማ ናናቱነ ሄዙ ማጫ ናናቱ የለቴድኖ። 14 ባይራ ማጫ ናቶ ይሚሞ፥ ላኤንያና ቃጺኦ፥ ሄዘንያና ቀረንሀፉኮ ያጊደ ሱንዳ። 15 ኢዮባ ማጫ ናናቱዋዳን ማላ ሎኦ ማጫ አሳይ ቢታን ሳኣን ሀቃንነ ቤተና። ኡንቱንቱ አዉ ኡንቱንቶ ኡንቱንቱ እሻቱዋና ላትያ ቢታ ሻኪደ እሜዳ። 16 ሄዋፐ ስምና፥ ኢዮብ ጼታነ ኦይታሙ ላይ ደኤዳ፤ ባረ ናናቱዋነ ባረ ናናቱዋ ናናቱዋ ኦይደን የለታ ጋካናዉ በኤዳ። 17 ኢዮብ ዳሮ ዎድያ ደኢደ፥ ሎኦ ጭማ ጭሚደ ሀይቄዳ።