ኢዮባ 40

1 መና ጎዳይ ኢዮባ፥ 2 “ኢዮባ፥ አሳይ ኡባ ዳንዳይያ ጾሳና ሞተቲደ፥ ሻትም ኤሪ? አነ ጾሳና ሞተትያ ኡራይ አዉ ዛሮ” ያጌዳ። 3 ሄዋፐ ጉይያን፥ ኢዮብ መና ጎዳዉ ዛሪደ፥ ሀዋዳን ያጌዳ፤ 4 “አቤት ጾሳዉ፥ ታን ፓና ላፋ አሳ፤ ታን ነዉ ዎታ ዛራናዉ ዳንዳያይታ? ታን ታ ዶናን ታ ኩሽያ ዎድ። 5 ታን እት ገደ ሃሳያድ፤ ሽን ታዉ ዛርያዌ ባዋ። ላኤንዋ ሃሳይከ” ያጌዳ። 6 ሄዋፐ ጉይያን፥ መና ጎዳይ ጎትያ ግዶፐ ኢዮባዉ ሀዋዳን ያጌዳ፤ 7 “አቱማ አሳዳን ነ ጼሳ ዳንጫ ደንዳደ፥ ታን ኦችያዋ ታዉ ኦዳ። 8 ኔን ታና ባይዛንቻ ከሳና ሀናይ? ነዉ ጽሉዋ ግዳናዉ፥ ታና ዎርዱዋ ከሳይ? 9 ጾሳ ዎልቃ ማላ ዎልቃይ ነዉ ደኢ? ጾሳይ ጉምያዋዳን ኔን ጉማናዉ ዳንዳያይ? 10 ሄዋ ግዶፐ፥ አነ ነ ቦንቹዋንነ ግታተን ደንዳ! ነ ፑላነ አንጋ ማያ! 11 ነ ሀንቁዋ ቦሻ አነ ትጋ፤ ኦቶረትያ አሳ ኡባ ጼላደ፥ አነ ካዉሻ! 12 አነ ሎይ ጼላደ፥ ኦቶረትያ ኡባ ዬላያ፤ ኢታ ኦያዋንታ ኡባ ኡንቱንቱ ደእያ ሳን የ! 13 ኡንቱንቱ ኡባ ቢታን ሞጋ፤ ዱፉዋ ዱገ ዎደ፥ ኡንቱንታ ጎርዳ። 14 ያቶፐ፥ ነ ዎልቃን ኔን ጾናናዋ ታን ነዉ ማርካታና። 15 “ታን ኔና መዳዋዳን መዳ፥ ብሄሞታ ግያ ዶኣ አነ ጼላ! እ ቦራዳን ማታ ሜ። 16 አ ጼሳን ደእያ ዎልቃይነ አ ኡሉዋ ካሜዳ ሻያ ምኖተይ ሎይ ዳሮ። 17 አ ዱፊ ዝጋዳን ስት ግ ኡቴዳ፤ አ ገድያ ጻጶቱካ ምኑዋን ዶቀቴዳዋንታ። 18 አ መቀቱ ናስያ ቦምባ ማላ፤ አ ገዲካ ብራታ ዛንገቱዋ ማላ። 19 “ጾሳይ መዳ መታቱ ኡባፐ እ አ ማላልስያዋ። አ መዳዋፐ አትና፥ አ ጾናናዉ ዳንዳይያዌ ባዋ። 20 ዶአይ ኡባይ ካእያ ዞዚ አዉ ምያዋ ሞክሴ። 21 አጉንይ ደእያ ም ጋርሳን ግሴ፤ ማቃ ግዶን ጫርያን ቆሰቴ። 22 አጉንይ ደእያ ምቱ ባረንቱ ኩዋን አ ገንኖ፤ ሻፋ ዶናን ዶሊያ ምቱ አ ካሚኖ። 23 ሻፋይ ኩሚደ ጎግያ ዎደካ ዳጋመና፤ ዮርዳኖሳ ሻፋይ አ ሶምኡዋን ርጨትያ ዎደካ እ ሳሮ ደኤ። 24 አ አይፍያ ቶይሲደ፥ አ ኦይቃናዉ ዳንዳይያ አሳይ ደኢ? አ ሲያካ ጲርያ ቃራን ጫድ ኦይቃናዉ ዳንዳይያዌ ኦኔ?