ኢዮባ 4

1 ሄዋፐ ጉይያን፥ ቴማና ቢታፐ ዬዳ ኤልፋዝ ዛሪደ፥ ሀዋዳን ያጌዳ፤ 2 “እት ኡራይ ኔናና ጻሊደ ሃሳዮፐ፥ ኔን ሀንቀታኒ? ሽን ሃሳየናንነ አጋናዌ ኦኔ? 3 በአ፥ ኔን ዳሮቱዋ ታማርሳዳ፤ አርጋጬዳ ኩሸቱዋካ ምንዳ። 4 ነ ቃላይ በቴዳዋንታ ምንስ ኤሴ፤ ዳቡሬዳ ጉልባታቱዋካ ምን። 5 ሽን ሀእ መቱ ኔኮ ዬዳ፤ ኔን ገንጫበይካ። መቱ ኔና ጋክና፥ ኔን ሻቢረታዳ። 6 ኔን ጾሳዉ ያይያዌ ኔና አማንደ ዎኔ? ነ ሀመትያ ሱረ ሀመታይ ነዉ ህዶታ ግደኔ? 7 “አነ ኔን ሀእ ቆፓ: ጌሻ ግዴዳ አሳን ዬዳዌ ኦኔ? ዎይ ሱረ አሳይ ሀቃን ቆለቲደ ይ ኤሪ? 8 ታን በኤዳዋዳን፥ ኢታተ ጎሺደ፥ መቱዋ ዘርያዋንቱ ኢታተነ መቱዋ ጫካና። 9 ኡንቱንቱ ጾሳፐ ከስያ ሸምፑዋን ፑነቲደ ባያና፤ አ ሀንቁዋ ሱሉዋንካ ኡንቱንቱ ሜተት ያና። 10 ኢታቱ ጉድያነ ዳርያ ጋሞቱዋ ማላ፤ ሽን ጾሳይ ኡንቱንቱ አቻ መን። 11 ሻንካቲደ ኦይቄዳዋ ማናዉ አቻ ያ ጋሞቱዋዳን፥ ኢታቱ ኮሻን ሀይቂኖ፤ ኡንቱንቱ ናናቱካ ላለቲኖ። 12 “እት ጋላስ እት ጹራይ ታኮ ዬዳ፤ ሄ ጹራይ ሳሱከቲደ፥ ታ ሀይን ዎዳ። 13 ቃማ ገምእሹዋ ፓኑርሽን፥ ታና ኢታ አኩሙ ኡንኤዳ። 14 ታና ያሻይነ ኮኮርሳይ ኦይቄዳ፤ ታ መቀ ኡባ ጋጅ ጋጅሴዳ። 15 ጫርኩ አደ ታ ሶምኡዋ ፕቲደ፥ ታ ስንና አዳ፤ ዳጋማፐ ደንዴዳዋን ታ ቦላን ደእያ ብናናይ ኤቄዳ። 16 እ ታ ስንን ኤቄዳ፤ ሽን እ አየንቶ ታን ሻካደ ኤራናዉ ዳንዳያበይከ። ሄዋፐ ጉይያን፥ ጮኡ ጌዳሳፐ ሀዋዳን ያግያ ኮሻ ስሳድ፤ 17 ‘ሀይቂያ አሳይ ጾሳ ስንን ጽሉዋ ግዲደ ቤታናዉ ዳንዳዪ? ዎይ አሳይ ባረና መዳዋ ስንን ጌሻ ግዲደ ቤታናዉ ዳንዳዪ? 18 ጾሳይ ባረ ቆማቱዋን አማነተና፤ ባረ ኪታንቻቱዋንካ ባይዙዋ ደሜ። 19 ያትና፥ ኡርቃፐ መቴዳዋንቱን፥ ኡንቱንቱ ደኡዋ ባሱ ባና ግዴዳዋንቱን፥ ብልኣፐካ ኤሌሊደ ዎቂያዋንቱን አይ ኬሻ ዳሮ ባይዙ ቤታንዴሻ! 20 ዎንታ ፓጻ ደእያ አሳይ ኦማርስ ጋካናዉ፥ ኦንነ ሀሳየናን ደእሺና ሀይቄ። 21 ኡንቱንቱ ደኡዋ ሽካሊ ሾደት ዎያ ዎደ፥ ኡንቱንቱ አዳ ኤራተ ደመናን ሀይቂ ባዪኖ’ ያግያዋ ስሳድ።