ኢዮባ 37

1 “ኡሹ ታ ዎዛና ድድቅሴ፤ ባረ ደእያ ሳንካ ፕሬ። 2 ኡባይካ ጾሳ ኮሻ፥ ጉጉንዳን ጉምያ አ ቃላ ስስተ። 3 እ ሳሉዋ ኡባፐ ኪትያ ዋልቃንይ ቢታ ጋጻፐ ጋጻ ጋካናዉ ቤቴ። 4 ሄዋፐ ጉይያን፥ አ ጉን ኮሻይ ስሰቴ፤ ባረ ዎልቃማ ኮሻን ጉሜ፤ አ ኮሻይ ስሰትያ ዎደ፥ ባረ ዋልቃን ተኤና። 5 ጾሳ ኮሻይ ማላልስያ ጉን ጉሜ፤ ኑን አኬካናዉ ዳንዳየና ዎልቃማባ እ ኦ። 6 ሻቻ እ፥ ‘ሳኣን ዎ!’ ያጌ፤ ዎልቃማ እራካ፥ ‘ቡካ’ ያጊደ አዛዜ። 7 “አሳይ ኡባይ አ ኦሱዋ ኤራና ማላ፥ ሄ ዎደ ባረ ኦሱዋ ኦሱዋ አጋናዳን ኦ። 8 ዶአቱካ ባረንቱ ጌሱዋ ጌሱዋ ገሊኖ፤ ያን ኡቲኖ። 9 ገድሳ ባጋፐ ጎቲ ዬ፤ ሁጲሳ ባጋፐካ ሜጉ ዬ። 10 ጾሳይ ሲያና ሸምፕያ ሸምፑዋፐ ሻቻይ መቴ፤ ሄዋን አኮ ሃቱካ ሹቻዳን ምኔ። 11 ሻሪ ሃ ቶካናዳን እ ኦ፤ ባረ ዋልቃንካ ሻርያ ግዶን ላሌ። 12 አ ካለዋን ሻረቱ ዩይ ዩይ አኖ፤ እ አዛዝያዋ ኡባ ኡንቱንቱ ሳኣ ቦላ ኦኖ። 13 ጾሳይ እራ ቡክስያዌ ቢታ እርጽሳናሳ፥ ዎይ አሳ ሙራናሳ፥ ዎይ ባረ ሲቁዋ ኡንቱንታ በሳናሳ። 14 “ኢዮባ፥ ሀዋ ስሳ፤ ጾሳይ ኦያ ማላልስያ ኦሱዋ ታክ ጋደ አኬካ። 15 ጾሳይ ሻራቱዋ ዎት አዛዝንቶነ ባረ ዋልቃንካ ዎት ዎልቃንንቶ ኤራይ? 16 ሻራቱ ሳሉዋን ዋን ቶከቶፐነ ቃይ አ ኤራይ ፖሎ ግዴዳ ጾሳይ ኦያ ማላልስያ ኦሱዋ ኔን ኤራይ? 17 ገድሳ ጫርኩ ዪደ፥ ቢታ ምሽስያ ዎደ፥ ኔን ሆምቢያን መቶታናፐ አትና፥ ሙለካ ሄዋ ኤራካ። 18 ጾሳይ ሳሉዋ ማስቶትያዳን ፕድ ኦደ ምጭያ ዎደ፥ ኔን አ ማዳናዉ ዳንዳያይ? 19 ኑን ኤራ ፓጫ ግድያ ድራዉ ሃሳያናዉ ዳንዳዮኮ፤ ኑን ጾሳዉ ዋግ ሃሳያነንቶ፥ ኔን ኑና ታማርሳ። 20 ጾሳና ሃሳያና ጋደ ታን ኦችከ፤ እ ታና ይሳና ማላ፥ ታን አያዉ አ ደንሬይታ? 21 ጫርኩ ሳሎቱዋ ፕቲደ ጌሼዳዋፐ ጉይያን፥ ሳሎቱዋን ጶልያ አዋ ፖኡዋ አሳይ ጼላናዉ ዳንዳየና። 22 ሁጲሳ ባጋና ዎርቃ ማላትያ ፖኡ ቤቴ፤ ጾሳይካ ያሽያ አንጋን ቆንጬ። 23 “ኑን ኡባ ዳንዳይያ ጾሳ ማታ ሺቃናዉ ዳንዳዮኮ፤ አ ዎልቃይ ዎልቃማ። እ ባረ ቱሙ ፕርዳንነ ባረ ዎልቃማ ጽሎተን ግታ። 24 ሄዋ ድራዉ፥ አሳይ አዉ ያዬ፤ ባረንታ አዳ ኤራንቻ ግያዋንታ ኡባቱዋ እ ጼለና” ያጌዳ።