ኢዮባ 30

1 “ሽን ሀእ ታፐ ያላግያ አሳቱ ታና ቅሊጪኖ። ኡንቱንቱ ታ ዶርሳ ዉድያ ሄምያ ካናቱዋ ማዳና ጊናካ ታን ድጌዳ አዎቱዋ ናናቱዋ። 2 ኡንቱንቱ አዎቱ ዎልቃይ እጼዳዋንታነ ቦላ ግልቄዳዋንታ ግዴዳ ድራዉ፥ ታና አይነ ማድበይክኖ። 3 መቱዋነ ኮሻ ጋሱዋን ቃማ ደንዲደ፥ ባዙዋ ቢደ፥ ጻጱዋ ጮሜድኖ። 4 ቃይ ሻራፋነ ቦንጭያ ማጼድኖ፤ ማልኤና ሳንካራ ጻጶቱዋካ ሜድኖ። 5 አሳይ ዋሲደ፥ ካይሶቱዋ የደርሴዳዋዳን፥ አሳ ግዶፐ ኡንቱንታ የደርሴዳ። 6 ኡንቱንቱ ዛንጋራ ግዶን፥ ጎንጎሎ ግዶንነ ዛላ ጎንጎሉዋ ግዶን ደኤድኖ። 7 ኡንቱንቱ ቡራ ግዶን ባዞ ዶአቱዋዳን ዋሴድኖ፤ ዶቢያ ጋርሳን ሺቂደ፥ እትፐ ደኤድኖ። 8 ኡንቱንቱ ቃይጼርያን ሾጨቲደ፥ ቢታፐ የደርሰቴድኖ። ኡንቱንቱ ሱንና ባዪደ፥ ቦዛ ግዲደ ደኤድኖ። 9 “ሀእ ኡንቱንቱ ናናቱ ታና የን ቅሊጪኖ፤ ታን ኡንቱንቱ ግዶን ሌምሲደ ኦድያዋ ግዳድ። 10 ኡንቱንቱ ታና ሸነቲደ፥ ታፐ ሃኪኖ፤ አይነ ዬላተናን ታ ሶምኡዋን ጩቻ ጩቺኖ። 11 ጾሳይ ታ ዎልቃ ላፈደ፥ ታና ካዉሼዳ ድራዉ፥ ኡንቱንቱ ታና ቆሀናዉ፥ ብጻላ ከስ ድጌዳ ፓራዳን፥ የዳ ግዴድኖ። 12 ሀ ሴር ባይናን ድጬዳ ናናቱ ታ ቦላ ደንዲደ፥ ታና የደርሲኖ፤ ኡንቱንቱ ታና ይሳናዉ ታ ቦላ ዶዲኖ። 13 ኡንቱንቱ ታ ሀመትያ ኦግያ ጎርዲደ፥ ታና ይሳናዉ ኮዪኖ፤ ኦንነ ኡንቱንቱ ሄዋ ኦናዋ ድገና። 14 ኦላንቻቱ ካታማ ድርሳ መንደ ገልያዋዳን፥ ኡንቱንቱ ታ ቦላ ዬድኖ። 15 ዎልቃማ ዳጋማይ ታና ድፕ ኦዳ፤ ታ ቦንቹካ ጫርኩ አፍያዋዳን ቤዳ፤ ታ እሻሉካ ሻርያዳን ዬዳ። 16 “ታ ሸምፓታ ኡንኤታዱ፤ ቱጋ ጋላሳቱ ታና ጭርፕ ኦይቄዳ። 17 ቃማ ቃማ ሳኩ ታ መቀ ጮሜ፤ ሴላይካ ሸምፕ አከናን ገደ ጉጄ። 18 ታ ማዩ ጉንዲደ ባዬዳ፤ ሻምጭያ ቆያዳን፥ ታና ጩል ኦይቄዳ። 19 ጾሳይ ታና ኡርቃን ኦሌዳ፤ ታን ቢታፐ ብድንፐ ኬከና አሳ ግዳድ። 20 “አቤት ጾሳዉ፥ ታን ነዉ ዋሳይ፤ ሽን ኔን ታዉ አላበይካ። ኤቃደ ኔና ዎሳድ፤ ሽን ኔን ታ ዎሳ ስሳበይካ። 21 ኔን ካሰዋፐ ዱማታደ፥ ታዉ መቀ ኢታዳ፤ ነ ዎልቃማ ዎልቃን ታና የደርሳሳ። 22 ኔን ታና ጫርኩዋን ደንዳ፤ አ ቶግሳዳ፤ ጎትያንካ ታና ጎንዶርሳዳ። 23 አሳዉ ኡባዉ ዉርሰ ግዴዳ ሀይቆ ኔን ታና አደ እምያዋ ታን ኤራይ። 24 “ኩንዲደ መኤዳ አሳይ ቱጋቲደ፥ ‘ታና ማዳርኪ’ ጊደ ዋስና፥ አዉ ቃረተና አሳይ ደኢ? 25 ቱጋን ደእያዋንቶ ታን ዬካበይክታ? ህዬሳቶ ታን ቃረታበይክታ? 26 ሎኦባ ደማና ጋደ ታን አሞትያ ዎደ፥ ኢታባይ ታና ጋኬዳ። ታዉ ሳአይ ኬኬ ጋደ ታን ናግያ ዎደ፥ ጋላሳይ ታዉ ሜዳ። 27 ታ ዎዛናይ ህርጌዳ፤ ታን ዎፓ ደማበይከ፤ ጋላሳፐ ጋላሳን ታ ቱጋይ ያ ዳሬዳ። 28 ታ ቦላይ አዋ ሱሉዋን ግደናን ካዩዋን ካረጼዳ፤ ታን ሺቁዋን ኤቃደ፥ ‘ታና ማድተ!’ ጋደ ዋሳይ። 29 ታን ዎራካናቶ እሻ፥ ሳጎንያዉካ ዳቦ ግዳድ። 30 ታ ጋልባይ ካረጺደ፥ ፖቀት ፖቀት ዎ፤ ታ ቦላይካ ምሹዋን ጹገቴ። 31 ሄዋ ድራዉ፥ ታ ድንኪ ዝላሳዉ ፑነቴዳ፤ ታ ህጽጺካ ዬኮ ፑነቴዳ።