ኢዮባ 15

1 ሄዋፐ ተማና ቢታፐ ዬዳ ኤልፋዝ ሀዋዳን ያጊደ ዛሬዳ፤ 2 “አዳ ኤራንቻ አሳይ ጫርኩዋዳን ኦይቀተናዋ ሃሳዪ? ዎይ ቆህያ ቆፋን ባረ ኡሉዋ ኩንናዉ በሲ? 3 ፓና ቃላን ዎይ ማደና ቃላን ሞቱዋ ሞተቲ? 4 ሄዋ ግዶፐ፥ ኔን ጾሳዉ ያይያዋ አጋዳ፤ ሀራቱካ ጾሳዉ ጎይነናዳን ድጋሳ። 5 ነ ኢታተይ ነ ሃሳያን ኤረቴ፤ ሽን ነ ጭንጫ ሃሳያን ካማናዉ ባጸታሳ። 6 ነ ቦላ ፕርድያዌ ነ ዶናፐ አትና፥ ታና ግድከ፤ ነ እንጻርሳይ ነ ቦላ ማርካቴ። 7 “ኮይሮ አሳፐ ስን የለቴዳዌ ኔኔ? ዎይ ኔን ደረቱ መታናፐ ካሰ የለታዲ? 8 ኔን ጾሳ ጹራ ሺቁዋ ስሳዲ? ዎይ አዳ ኤራተ ነ ጻላላይ ኤርያዋ ነዉ ማላቲ? 9 ኑን ኤረናዋ ኔን ኤርያዌ አዬ? ኑዉ ገለናን አጊደ፥ ነዉ ገሌዳዌ አዬ? 10 ነ አዉዋፐ ባይራትያ አሳቱ፥ ጭሚደ ፑሉሜዳ አሳቱ ኑ ግዶን ደኢኖ። 11 “ጾሳይ ነዉ እሜዳ ምንነ ኑን ነዉ አሽከተን ሃሳዬዳ ቃላይ ጉጼዴ? 12 ነ ዎዛናይ ኔና አያዉ ዎራ አፊ? ነ አይፊካ አያዉ ጼላ ደረቂ? 13 ያታደ ኔን ጾሳ ቦላ ሀንቀታዳ፤ ሄዋ ማላ ቃላካ ነ ዶናፐ ከሳዳ። 14 አሳይ ጾሳ ስንን ጌሻ ግዳናዉ ዳንዳዪ? ዎይ ማጫ አሳፐ የለቴዳ አሳይ ጽሉዋ ግዳናዉ ዳንዳዪ? 15 በአ፥ ጾሳይ ባረ ኪታንቻቱዋንካ አማነተና፤ ሀራይ አቶ ሳሎቱካ አ ስንን ጌሻ ግድክኖ። 16 ሽን ሀ ሸነይያነ ቱኔዳ አሳይ፥ ናጋራካ ሃዳን ጋንያ አሳይ ዋን አማነታኔ! 17 “ኢዮባ፥ አነ ስሳ! ነዉ ኦዳና፤ ታን በኤዳዋ ኡባ ነዉ ኦዳና። 18 አዳ ኤራንቻ አሳቱ ባረንቱ ማይዛ አዎቱዋፐ ደሜዳ ኤራተ ገንናን ታና ታማርሴድኖ። 19 ሀ ቢታይ ኡንቱንቱ ጻላላዉ እመቴዳ፤ ሀራ ቢታ አሳይ ኡንቱንቱ ዎዛና ጾሳፐ ዎራ ዛርቤና። 20 “አሳ ኡቁኒደ ደእያ ኢታ አሳይ፥ ባረ ደኡዋ ላይ ኡባን ቱግ አፐ ሻከተና። 21 ኡባ ገደ ዳጋንያ ኮሻይ አ ሀይን ስሰቴ፤ እ ሳሮ ደአይ ጊሽና፥ ፓንጋቱ አ ቦላ ያና። 22 ማፐ ከስ አካናዋ እ አማነና፤ እ ማሻዉ ካጨቴዳ። 23 አ አሃይ አንኮ ቁማ ግዳናዋ፤ ባረዉ ማ ጋላሳይ ማታቴዳዋ እ ኤሬ። 24 መቱነ ቱጋይ አ ያሽሳና፤ ኦላዉ ከሴዳ ካትያዳን አ ዳጋንና። 25 አያዉ ጎፐ፥ እ ባረ ኩሽያ ጾሳ ቦላ ደንዳ፤ ኡባ ዳንዳይያ ጾሳ ቦላካ ጻሌዳ። 26 ምኖነ ኦርዶ ጎንዳልያ ኦይቂደ፥ ጾሳ ቦላ ማካሌዳ። 27 “አ ሶምኢ ሞዳ ድራዉ፥ አ ጼሳይካ ቦቦርጬዳ ድራዉ፥ 28 እ ላቲደ ደእያ ካታማቱካ ኦላን ላለቴዳ ድራዉነ እ ደእያ ጎላቱካ ኦንነ ደኤና ኦና ግዴዳ ድራዉ፥ 29 እ ባረ ዱረተን ዳሮ ጋምኤና፤ አ አቁካ አናና ጋምኤና፤ ቢታ ቦላንካ አከና። 30 “ማፐ እ ከስ አከና፤ አ ታሸቱዋ ላጩ መልሳና፤ አ ጪሻካ ጾሳ ጫርኩ ፕት ይሳና። 31 ባረካ ባረና ጭሚደ፥ ሀዳባን አማነቶፓ። እ አካናባይካ ሀዳባ። 32 ዎዲ ጋከናን ሹልያነ መል ስሚደ፥ ላኤን አጫናዉ ዳንዳየና ም ማላ እ ግዳናዋ። 33 ቴረናን ዉርጩዋና ቆቆፈትያ ዎይንያ ማላነ ጪሻይ ቆቆፈትያ ዎጋራ ማላ እ ግዳናዋ። 34 ጾሳዉ ያየና አሳቶ ዛሪ ያና፤ ማታይያን ኬጸቴዳ ጎልያካ ታማይ ማና። 35 ኡንቱንቱ መቱዋ ሻሃሪደ፥ ኢታባ የሊኖ፤ ኡንቱንቱ ዎዛናንካ ጭሙ ኩም ኡቴዳ” ያጌዳ።