ኤርማሳ 14

1 ኮሻባ መና ጎዳይ ኤርማሳዉ ኦዴዳ ቃላይ ሀዋ፤ 2 “ይሁዳ ቢታይ ካዮቴ፤ አ ካታማቱ ላባኒኖ። አን ደእያ አሳቱ ቢታን ኡቲደ ዬኪኖ፤ የሩሳላመ አሳይ ዋሱዋ ጹልሴ። 3 ዱረ አሳቱ ሃ ትካናዉ ባረንቱ ቆማቱዋ ኪቲኖ። ኡንቱንቱ ሃ ኦላ ቢኖ፤ ሽን ሃ ደምክኖ። ባረንቱ ኦቱዋ መላ ቶክ አኪደ ስሚኖ። ሀንያዋ ይ ዬላቲደ፥ ባረንቱ ሁጲያ ጉለቲኖ። 4 እራይ ቡከና ድራዉ፥ ቢታይ መሊደ ዛኤ። ጎሻንቻቱ ዬላቲደ፥ ባረንቱ ሁጲያ ጉለቲኖ። 5 ማታይ ባይና ድራዉ፥ ዶጋታ ባረ የሌዳ ጋሎ ማራቶ ደምባን ኦላደ ባዉ። 6 ዎራ ሀረቱ አያይነ ባይና ቃ ደረቱዋን ኤቂደ፥ ዎራካናቱዋዳን ያረቲኖ። ኡንቱንቶ ምያባይ ይና፥ ኡንቱንቱ አይፊ ጼላናዉ ዳቡሬዳ” ያጌዳ። 7 አሳይ ሀዋዳን ያጊደ ዎሴዳ፤ “አቤት መና ጎዳዉ፥ ኑ ናጋራይ ኑ ቦላን ማርካቶፐነ፥ ነ ሱን ድራዉ፥ ኑዉ እትባ ኦ። ኑን ኔፐ ዳሮ ገደ ጉየ ስሜዶ፤ ነ ቦላን ናጋራ ኦዶ። 8 አቤት እስራኤሊ ናግያ ናሸቻዉ፥ መቱዋ ዎድያን አ አሽያዎ፥ ኔን ቢታን እማዳን፥ እት ቃማ አቃናዉ ገሌዳ ኦግያ አሳዳን አያዉ ሀናይ? 9 ኔን ዳጋሜዳ አሳዳን፥ አሻናዉ ዳንዳየና ምኖ አሳዳን አያዉ ሀናይ? አቤት መና ጎዳዉ፥ ኔን ኑ ግዱዋን ደኣሳ! ኑን ነ ሱንን ጼሰቴዳ፤ ኑና ኔን አጎፓ!” ያጌዳ። 10 ሀ አሳቱዋባ መና ጎዳይ ሀዋዳን ያጌ፤ “ኡንቱንቱ ቶይላካትያዋ ሎይ ሲቂኖ፤ ባረንቱ ገድያ ተእክኖ። ሄዋ ድራዉ፥ መና ጎዳይ ኡንቱንቱን ናሸተና። እ ኡንቱንታ ኢታ ኦሱዋ ሀሳዪደ፥ ኡንቱንቱ ናጋራ ድራዉ፥ ኡንቱንታ ሙራና” ያጌ። 11 ሄዋፐ ጉይያን፥ መና ጎዳይ ታና፤ “ሀ አሳቱዋ ሳሮተዉ ታና ዎሶፓ። 12 ኡንቱንቱ ጾሞፐካ፥ ታን ኡንቱንቱ ዋሱዋ ስስከ። ጹግያ ያርሹዋነ ካ ያርሹዋ ኡንቱንቱ ያርሾፐካ፥ ታን ኡንቱንቱ ያርሹዋ አክከ። ታን ኡንቱንቱ ኦላን፥ ኮሻንነ ኢታ ሀርግያን ይሳና” ያጌዳ። 13 ታን ሀዋዳን ያጋድ፤ “አቤት ኡባ ሞድያ መና ጎዳዉ፥ ትምቢትያ ኦድያዋንቱ ኡንቱንቶ፥ ‘ህንተ ኦላ በእክታ ዎይ ኮሻይ ህንተና ኦይቀና። ታን ህንተዉ ሀ ቢታን ፓጨና ሳሮተ እማና’ ያጌ ያጊኖ” ያጋድ። 14 መና ጎዳይ ታዉ ሀዋዳን ያጌዳ፤ “ትምቢትያ ኦድያዋንቱ ታ ሱንን ዎርዱዋ ኦዲኖ። ታን ኡንቱንታ ኪታበይከ፥ ዎይ አዛዛበይከ፥ ዎይ ኡንቱንቶ ኦዳበይከ። ኡንቱንቱ ህንተዉ ትምቢትያ ጊደ ኦድያዌ ዎርዱዋ ሳጻ፥ ፓና ካዩዋነ ቆፕ አኪደ ኦድያ ዎርዶባ። 15 ሄዋ ድራዉ፥ ታ ሱንን ትምቢትያ ኦድያዋንቱባ ግዶፐ፥ ታን ኡንቱንታ ኪታበይከ። ሽን ኡንቱንቱ፥ ‘ኦላይ ዎይ ኮሻይ ሀ ቢታ ቦቼና’ ያጊኖ። ሄ ትምቢትያ ኦድያዋንቱ ባረንቱ ሁጲያዉ ኦላንነ ኮሻን ያና ያጌ መና ጎዳይ! 16 ቃይ ኡንቱንቱ ትምቢትያ ኦድያ አሳይ ኮሻነ ኦላ ጋሱዋን ሀይቃና፤ ኡንቱንቱ አሃይ ካረን የሩሳላመ ኦግያን ኦለታና። ኡንቱንቱ ዎይ ኡንቱንቱ ማጫ አሳ፥ ኡንቱንቱ አቱማ ናናቱዋ ዎይ ኡንቱንቱ ማጫ ናናቱዋ ሞግያዌ ያና። ታን ኡንቱንቶ በስያ ዋይያ ኡንቱንቱ ቦላ ትጋና” ያጌዳ። 17 ታ ካዩዋባ ታን አሳዉ ሀዋዳን ያጋደ ኦዳና ማላ፥ ጾሳይ ታና አዛዜዳ፤ " ‘ታ አሳይ ዳሮ ደሸቲደ፥ ሎይ ማዱንጼዳ ድራዉ፥ ታ አይፈቱ ቃማነ ጋላስ ሸምፐናን አፎጽኖ። 18 ታን ደምባ ቦፐ፥ ማሻን ሲፈቴዳዋንታ በአይ። ካታማ ገሎፐ፥ ቃይ ኮሻን ግልቄዳዋንታ በአይ። ትምቢትያ ኦድያዋንቱነ ቄሳቱ፥ “ኑን ፓጭ ባይናን ኦቶ” ጊኖ፤ ሽን ኡንቱንቱ ባረንቱ ኦያዋ ኤርክኖ’ ያጋ" ያጌዳ። 19 አቤት ጾሳዉ፥ ኔን ይሁዳ ሙለ አጋዲ? ጽዮነ አሳ እጻዲ? ኔን ኑና ፓጸናዳን ኦደ አያዉ ደቻዲ? “ሳሮ ግዳናዋ” ጊደ ናጌዶ፤ ሽን አያይነ ሎኦባይ ኑዉ ጋክቤና። “ፓጻና ዎዲ ያና” ጊደ ናጌዶ፤ ሽን ዳጋማ ጻላላይ ዬዳ። 20 አቤት መና ጎዳዉ፥ ኑን ኑ ኢታተ ኤሬዶ፤ ኑ አዎቱዋ ባይዙዋካ አኬኬዶ፤ ኑን ቱሙዋፐ ነ ቦላ ናጋራ ኦዶ። 21 ኑና ነ ሱን ድራዉ ካፓ፤ ነ ቦንቾ አራታይ ደእያ የሩሳላመ ካዉሾፓ። ኔን ኑናና ጫቀቴዳ ጫቁዋ ሀሳያ፤ ነ ጫቁዋ ካንፓ። 22 ዎን ካዉተቱዋ ኤቃቱዋፐ እቱ እራ ቡክሳናዉ ዳንዳዪ? ሳሉ ባረ ሸንያን ፑስያ ዱገ ኪታናዉ ዳንዳዪ? ዳንዳየና! አቤት መና ጎዳዉ፥ ኑ ጾሳዉ፥ ሄዋ ዳንዳይያዌ ኔና! ሀዋ ኡባ ኦያዌ ኔና ግድያ ድራዉ፥ ኑን ኔናን ናሸቻ ኦቶ።