እብራዌ 6

1 ሄዋ ድራዉ፥ ክርስቶሳ ትምርትያ ብሮ ዶምያዋ አጊደ፥ ዎዛናማ አሳ ትምርተዉ ስንዉ ቦይተ፤ ኮይሮ ኑን ታማራናዉ ኮሽያ ትምርትያ ዎ ኤቂደ ታማራናዉ ኑዉ በሰና፤ ሄ ትምርቲ አዬ ጎፐ፥ ማደና ኦሱዋፐ ስምያዋ፥ ጾሳ አማንያዋ፥ ጽንቃታቱዋባ፥ ኩሽያ ዎዋባ፥ ሀይቁዋፐ ደንዱዋባነ መና ፕርዳባ። 3 ጾሳይ ኦተ ጎፐ፥ ሄዋ ኑን ኦና። 4 አያዉ ጎፐ፥ እቶደካ ፖኡ ፖኤዳዋንታነ ሳሉዋ እሙዋ ባር በኤዳዋንታ፥ ቃይ ጌሻ አያናካ ሻክ አኬዳዋንታነ ጾሳ ቃላይ ሎአ ግዴዳዋ ስስ ኤሬዳዋንታ፥ ስንፐ ያና ሳኣ ዎልቃካ ቦች ጼሌዳዋንታ፥ 6 ሄዋፐ ጉየ ስሚደ ካዴዳዋንታ ናጋራፐ ላኤንዋ ዛራናዌ ዳንዳየተና። አያዉ ጎፐ፥ ሄዋንቱ ጾሳ ናኣ ማስቃልያ ቦላ ምስማርያን ሺደ ካቂያዋንታነ አሳ ስንን ካዉሽያዋንቱ ማላ። 7 ኡባ ዎደ ቡክያ እራ ኡሽና፥ ጎሼዳ ኡራ ጎእያ ካ ሞክያ ቢታ ጾሳይ አንጄ። 8 ሽን ቡሉዋነ ቡዙዋ ሞኮፐ፥ አይነ ጎኤና፤ ሸቃዉ ሺቅ ኡቴዳ። ቃይ ዉርሰን ጉደታና። 9 ሽን ኑ ሲቃቶ፥ ኑን ሀዋዳን ሃሳይያዋ ግዶፐነ፥ ህንተንቱ አቶተዉ ግድያ ሎኦባይ ህንተንቶ ደእያዋ ኤሬቶ። 10 አያዉ ጎፐ፥ ህንተንቱ ኦዳ ኦሱዋነ ቃይ አማንያዋንታ ማዴዳዋንነ ሀእካ ማድያዋን ጾሳ ሲቄዳ ሲቁዋ ጾሳይ ዶጋናዉ ማካላ ግደና። 11 ህንተንቱ ሁጲያን ሁጲያን ደማና ጊደ፥ ህዶታን ናግ ኡቴዳ ኩመን ቱማተ ዉርሰይ ጋካናዉ፥ ካሰዋዳን ምንሲደ ኦና ማላ አሞቴቶ። 12 ጾሳይ እማና ጌዳዋ አማኑዋንነ ገንጫን ላትያዋንቱ ማላ ህንተንቱ ግዳናዋ ኑን ኮይያዋፐ አትን፥ አዛላ ግዳናዋ ኮዮኮ። 13 ጾሳይ አብራሃሞ እማና ጊደ ጫቄዳ ዎደ፥ ባረፐ አያ ዎልቃማይ ባይና ድራዉ፥ ባረ ሁጲያን ጫቄዳ። 14 ጾሳይ አ፥ “ታን ኔና አንጃና፤ ነ ዘረካ ጮርሳና” ያጊደ ጫቄዳ። 15 ሄዋዳንካ፥ አብራሃሞ ገንጭ ናጊደ፥ ጾሳይ እማና ጌዳዋ አኬዳ። 16 አያዉ ጎፐ፥ አሳይ ባረፐ ቂያ ኡራን ጫቄ፤ ቃይ ሄ ጫቁ ፓሉምያ ኡባካ ተኤ። 17 ሄዋ ድራዉ፥ ጾሳይ ባረ እማና ጌዳዋ ላታናዋንቶ ባረ ቆፋ ኡባካ ላመናዋ ጌሽ ኦዳናዉ ሎይ ኮዪደ፥ ሄዌ ቱማ ግዴዳዎ ጫቄዳ። 18 ጾሳይ ዎርዶታናዉ ዳንዳየና ሀ ላኡ ላመተና የዋቱዋን፥ እ እማና ጌዳ ኑ ስንን ደእያዋ ኦይቃናዉ አኮ ባቃቴዳ ኑዉ ዎልቃማ መን ደኤ። 19 ሀ ኑን ደማና ጊደ ናሸቻን ናግ ኡቴዳዌ፥ ኑ ሸምፖ ማርካብያ ኦይቂያ ቃጸና ብራታ ማላ፤ ሄ ኑን ደማና ጊደ፥ ናሸቻን ናግ ኡቴዳዌ ኤረቴዳ ምኖ ግዲደ፥ ጋርዱዋ ግዶ ጌሻ ሳ ገሌ። 20 ቃይ የሱስ ማልክ-ጸደቃ ሱንተዳን፥ መናዉ ቄሳቱዋ ኡባቱዋ ካፑዋ ግዲደ፥ ኑ ግሻታዉ ኑፐ ካሰቲደ፥ ሄ ሳኣ ገሌዳ።