ዶመ 27

1 ይሳቅ ጭምና፥ አ አይፊ ጼላ እጼዳ ዎደ፥ ባረ ባይራትያ ናኣ ኤሳ ጼሲደ አ፥ “ታ ናአዉ” ያጌዳ። እ፥ “አቤ” ጊደ ኮዬዳ። 2 እ፥ “በአ፥ ሀእ ታን ጭማድ፤ ታን ሀይቃና ጋላሳ ኤርከ። 3 ያትያ ድራዉ፥ ሀእ ነ ሻንካትያ ዎንዳፍያነ ዙቢያ አካደ፥ ባዙዋ ባ፤ ዶኣ ታዉ ሻንካታደ፥ አሹዋ አካደ ያ። 4 ማልኦ ቁማ፥ ታን ዶስያዋ ካደ አ፤ ሄዌነ ታን ሀይቃናፐ ካሰ ኔና አንጃናሳ” ያጌዳ። 5 ርብቃ ይሳቅ ባረ ናኣ ኤሳዉ ኦድያ ዎደ ስሳዱ። ኤሳይ ዶኣ ሻንካቲደ አሀናዉ ባዙዋ ቤዳዋፐ ጉየ፥ 6 ርብቃ ባረ ናኣ ያቆባ፥ “ነ አዉ ነ እሻ ኤሳዉ፥ 7 ‘ዶኣ ሻንካታ አሃደ፥ ታዉ ማልኦ ቁማ ታን ማናዉ ካ፤ ሄዌነ ታን ሀይቃናፐ ካሰታደ፥ መና ጎዳ ስንን ኔና አንጃናሳ’ ያግያዋ ታን ስሳድ። 8 ታ ናአዉ፥ ሀእ ታን ኔና አዛዝያዋ ሎይደ ስሳ። 9 ዉድያ ጋርሳ ባደ፥ ላኡ ቦልትቦልታ ዴሻ ማራቱዋ ታዉ አካደ ያ፤ ታን ነ አቦው ማልኦ ቁማ እ ዶስያዋዳን ካና። 10 ነ አዉ ሚደ ሀይቀናን ካሰቲደ ኔና አንጃና ማላ፥ አዉ አሳ” ያጋዱ። 11 ሽን ያቆብ ባረ አቶ ርብቆ፥ “ታ እሻ ኤሳ ቦላን እስኪ ደኤ፤ ሽን ታ ቦላይ ሊቆ። 12 ታ አዉ ታና ኦይቂ በኦፐ ሽን? ታን አ ጭምያዋ አዉ ማላትና፥ ታን አንጁዋ ድራዉ ሸቃ ታ ቦላ አሀነንቶነ” ያጌዳ። 13 አ ዳያ አ፥ “ታ ናአዉ፥ ሄ ሸቃይ ታና ጋኮ። ታን ነዉ ኦድያዋ ኦ፤ ባደ ዴሻ ማራቱዋ ታዉ አካደ ያ” ያጋዱ። 14 ብ አሂደ ባረ ዳይዉ እሜዳ፤ አ ዳያ ማልኦ ቁማ አ አዉ ዶስያዋዳን ካዱ። 15 ሄዋፐ ጉየ፥ ርብቃ ሶን ባረ ማታን ደእያ ባረ ባይራ ናኣ ኤሳ ማዩዋ ሎኡዋ አሃደ፥ ባረ ቴፋ ናኣ ያቆባ ማይዛዱ። 16 ቃይ ሄ ዴሻቱዋ ጋልባ አ ኩሽያነ አ ሊቆ ቆያ ማይዛዱ። 17 ባረ ካዳ ማልኦ ቁማነ ኡክ ባረ ናኣ ያቆባ ኩሽያን ዎዱ። 18 ያትና እ ባረ አዉዋኮ ቢደ ገሊደ፥ “ታ አዎ” ያጌዳ። እ፥ “አቤ! ታ ናአዉ፥ ኔን ኦኔ?” ያጌዳ። 19 ያቆብ ባረ አዉዋ፥ “ታን ነ ባይራ ናኣ ኤሳ፤ ኔን ታና አዛዜዳዋዳን ታን ኦድ፤ ደንዳ፤ ደንዳ ኡታደ፥ ታን ሻንካፐ አሄዳዋ ማ፤ ያታደ ታና አንጃ” ያጌዳ። 20 ይሳቅ ባረ ናኣ፥ “ታ ናአዉ፥ ዋታ ኤሌላ ደማድ?” ያጊደ ኦቼዳ። እ፥ “መና ጎዳይ ነ ጾሳይ ታና ማዴዳ” ያጌዳ። 21 ይሳቅ ያቆባ፥ “ታ ናአዉ፥ ኔን ቱሙ ታ ናኣ ኤሰንቶነ ታን ኦይቃ በአናዉ አነ ታኮ ሺቃ” ያጌዳ። 22 ያቆብ ባረ አዉዋ ይሳቃኮ ሺቅና ኦይቂ በኢደ፥ “ሀ ቃላይ ያቆባ ቃላ፤ ሽን ኩሺ ኤሳ ኩሽያ” ያጌዳ። 23 አ ኩሺ አ እሻ ኤሳ ኩሽያዳን እስክያና ደእያ ድራዉ፥ ኤርቤና፤ እ ኤረናን አ አንጄዳ። 24 አ፥ “ቱሙ ኔን ታ ናኣ ኤሰዬ?” ያጊደ ኦቼዳ። እ፥ “ኤ፥ ታናቴ” ያጌዳ። 25 እ፥ “ታ ናአዉ፥ ታን ኔን ሻንካቴዳዋ ማናዉ ሃ አ፤ ማደ ታን ኔና አንጃና” ያጌዳ። ያቆብ አና፥ እ ሜዳ፤ ቃይ እ አዉ ዎይንያ ኤሳ አህና ኡሼዳ። 26 ሄዋፐ ጉየ አ አዉዋ ይሳቅ፥ “ታ ናአዉ፥ ሃያ፤ ሺቃደ ታና የራ” ያጌዳ። 27 ያቆብ ሺቂደ አ የሬዳ፤ ይሳቅ አ ማዩዋ ስንግ ስሲደ፥ ሀዋዳን ያጊደ አንጄዳ፤ “ታ ናኣ ፔኑ መና ጎዳይ አንጄዳ ጎሻዳን ሳዌ። 28 ጾሳይ ሳሉዋ ጮኩዋነ ሳኣ ሽጫ፥ ካነ ኦራ ዎይንያ ኤሳ ዳርሲደ ነዉ እሞ። 29 ካዉተቱ ነዉ ሞደትኖ፤ አሳቱ ነዉ ጉልባትኖ። ኔን ነ እሻቶ ጎዳ ግዳ፤ ነ አት ዛራቱ ነዉ ጉልባትኖ። ኔና ሸቂያዌ ሸቀቴዳዋ ግዶ፤ ኔና አንጅያዌ አንጀቴዳዋ ግዶ” ያጌዳ። 30 ይሳቅ ያቆባ አንጅ ዉርሴዳዋፐ ጉየ፥ ያቆብ ባረ አዉዋ ይሳቃ ስንፐ ከሶዋን ኤሳይ ሻንካፐ ፑቱ ጌዳ። 31 እካ ቃይ ማልኦ ቁማ ካደ፥ ባረ አዎ አዳ። አ፥ “ታ አዎ፥ ደንዳ፤ ደንዳ ኡታደ፥ ታን ሻንካቴዳዋፐ ማ፤ ያታደ ታና አንጃ” ያጌዳ። 32 አ አዉ ይሳቅ አ፥ “ኔን ኦኔ?” ያጊደ ኦቼዳ። እ፥ “ታን ነ ናኣ፥ ነ ባይራ ናኣ ኤሳ” ያጌዳ። 33 ይሳቅ ዳጋሚደ ኮኮሪደ፤ “ያትና ዶኣ ሻንካቴዳዋ አኪደ ታዉ አዳዌ ኦኔ? ታን ሀእ ኔን ያና ስንን ማደ፥ አ አንጃ ድጋድ፤ ቱሙካ እ አንጀቴዳዋ ግዳናዋ” ያጌዳ። 34 ኤሳይ ባረ አዉዋ ቃላ ስሴዳ ዎደ፥ ባረ ቃላ ቁ ኦደ፥ ዳሮ ይባታ ዬኩዋ ዬኪደ ባረ አዉዋ፥ “ታና አንጃ፤ ታ አዎ፥ ታናካ አንጃ!” ያጌዳ። 35 ሽን እ፥ “ነ እሻይ ዪደ ጭሚደ፥ ነ አንጁዋ አክ ድጌዳ” ያጌዳ። 36 ኤሳይ፥ “አ ኤሪደ ያቆባ ሱንዳ፤ እ ታና ጭሞደ፥ ሀዌ ላኤንዋ፤ እ ታ ባይራተ አኬዳ፤ ቃይ ሀእ ታ አንጁዋ አኬዳ” ያጌዳ። ቃይ እ፥ “ኔን ታዉ አንጁዋፐ አያነ አሻበይኪ?” ያጊደ ኦቼዳ። 37 ይሳቅ ኤሳ፥ “ታን አ ነዉ ጎዳ ኦድ፤ አ እሻቱዋ ኡባካ አ ቆማቱዋ ኦድ፤ ቃይ ታን ካንነ ኦራ ዎይንያ ኤሳን አ ምንሳድ። ያትና፥ ታ ናአዉ፥ ነዉ ታን አያ ኦ?” ያጌዳ። 38 ኤሳይ ባረ አዉዋ፥ “ታ አዎ፥ ነዉ እት አንጆ ጻላላይ ደኢ? ታ አዎ፥ ታናካ ቃይ አንጃ” ያጌዳ። ሄዋፐ ጉየ፥ ኤሳይ ባረ ቃላ ቁ ኦደ ዬኬዳ። 39 አ አዉዋ ይሳቅ ዛሪደ፥ “ነ ደእያ ሀ ሳኣ ዱረተፐ ሃካደ ደአና፤ ሳሉዋ ጮኩካ ነዉ ዎና፤ 40 ኔን ነ ማሻን አቃና፤ ኔን ነ እሻዉ ሞደታና። ሽን ኔን አናና ኤቀትያ ዎደ፥ አ ሞርገ ም ነ ሞርግያፐ ኦላና” ያጌዳ። 41 ያቆባ አ አዉ አንጄዳ ድራዉ፥ ኤሳይ ባረ ኡሉዋን አ ሞርኬዳ፤ እ ባረ ዎዛናን፥ “ታ አዉ ሀያና ማቴዳ፤ ታን አዉ ካዮታ ስማደ፥ ታ እሻ ያቆባ ዎና” ያጌዳ። 42 ሽን ርብቃ ሀ ባረ ባይራ ናኣ ኤሳ ቃላ ስሴዳ ድራዉ፥ ባረ ቴፋ ናኣ ያቆባ ጼስሳ አሃደ ሀዋዳን ያጋዱ፤ “ነ እሻይ ኤሳይ ኔና ዎደ ሀሉዋ ከሳናዉ ሀልቼዳ። 43 ሀያና ታ ናአዉ፥ ታን ነዉ ኦዶዋ ኦ። ደንዳ! ካራነን ደእያ ታ እሻ ላባናኮ ባቃታ! 44 ያታደ ነ እሻ ሀንቁ ዶቻና ጋካናዉ፥ አማሬዳ ዎድያ አናና ደአሻ። 45 ነ እሻይ ነዉ ሀንቀትያዋ አግያ ዎደነ፥ ኔን አ ቦላ ኦዳዋ እ ዶግያ ዎደ፥ ታን ኪታደ ኔና ያፐ አህሳና። ታን እት ጋላስ ህንተንቱ ላኡዋፐ መላ ከሳና ኮይከ” ያጋዱ። 46 ሄዋፐ ጉየ ርብቃ ይሳቃ፥ “ኤሳይ አኬዳ ሂተቱዋ ማጫ ናና ጋሱዋን ታን ታ ደኡዋ ሸነታድ፤ ቃይ ያቆብካ ሀዋንቱ ማላ ሂተቱዋ ማጫ ናናቱዋፐ ማቻቶ አኮፐ፥ ታን ስም ሀይቃናዉ ኮያድ” ያጋዱ።