እዝራ 3

1 ላፑን አግናይ ጋክያ ዎደ እስራኤልያ አሳይ ባረንቱ ካታማ ካታማ ስሜድኖ፥ ኡንቱንቱ ኡባይ እት አሳዳን የሩሳላመን ሺቄድኖ። 2 ዮጸዴቃ ናኣ ኢያሱነ አ ካልያ ቄሳቱ ቃይ ሳላትያላ ናኣ ዛሩባቤልነ አ ዳቦቱ ጾሳ አሳ ሙሴ ህግያን ካሰ ጻፈቴዳዋዳን ጹግያ ያርሹዋ ያርሻናዉ፥ እስራኤልያ ጾሳዉ ያርሽያ ሳኣ ጊግሴድኖ። 3 ኡንቱንቱ ሄ ጋድያን ደእያ አሳዉ ያዮፐነ፥ አገናን ያርሹዋ ያርሽያ ሳኣ ካሰ እ ኮለቴዳ ሳኣን ዛረደ ኬጼድኖ። ጊግሲደ፥ ጹግያ ያርሹዋ መና ጎዳዉ ዎንታነ ኦማርስ ኡባ ዎደ ያርሼድኖ። 4 ካሰ ጻፈቴዳዋዳንካ ኡንቱንቱ ዳስያ ባላ ቦንቼድኖ፤ ጹግያ ያርሹዋካ ሀቼዉ ሀቼዉ በስያዋ ፓይዱዋ ፓጭሰናን ያርሼድኖ። 5 ቃይ ኡባ ዎደ ያርሽያ ጹግያ ያርሹዋ፥ አግናይ ጼርያ ዎደ ያርሽያ ያርሹዋነ መና ጎዳ ጌሻ ባላቱዋን ያርሽያ ያርሹዋ ኡባካ ያርሼድኖ። ሄዋ ቦላካ አሳይ ባረ ሸንያን መና ጎዳዉ እሜዳ እሞታ ኡባካ ያርሼድኖ። 6 ላፑን አግናን ኮይሮ ጋላሳን ኡንቱንቱ መና ጎዳዉ ጹግያ ያርሹዋ ያርሽያዋ ዶሜድኖ፤ ሽን ሄ ዎደ መና ጎዳ ጌሻ ጎልያ ኬጽያ ባሱ ብሮ ባሰትቤና። 7 ሄዋፐ ጉይያን፥ ሹቻ ማስያዋንቶነ አናጸቶ ሻሉዋ ግሺደ ቃጻሬድኖ። ፓርሰ ካቲ ቂሮስ ኡንቱንቶ አዛዜዳ ድራዉ፥ ሊባኖሳፐ ዝጋ አባ ፕንደ፥ ዮጰ አሀናዉ ሲዶናነ ጺሮሳ ቢታ አሳዉ ቁማ፥ ኡሻነ ዛይትያ እሜድኖ። 8 ሄዋፐ ጉይያን፥ ኡንቱንቱ የሩሳላመን ደእያ ጾሳ ጎሊ ደእያ ሳኣ ጋኬዳ ላኤን ላይን ላኤን አግናን፥ ሳላትያላ ናአይ ዛሩባቤለ፥ ዮጸዴቃ ናኣ ኢያሱነ ኡንቱንቱ ዳቦቱ፥ ቄሳቱ፥ ሌዋቱነ ኦሞዱዋፐ ስሚደ፥ የሩሳላመ ዬዳ አሳይ ኡባይ ኪታ ዶሜድኖ። ቃይ መና ጎዳ ጎልያ ኪታ አዎተን ጼላና ማላ፥ ላታሙ ላይ ግዴዳዋንታነ ላታሙ ላይፐ አዳ ሌዋቱዋ ሱንድኖ። 9 ሌዊያ ዛርያ ግድያ ኢያሱ፥ አ ናናይነ አ ዳቦቱ፥ ሆዳዊያ ያራ ግድያ ቃድምኤልነ አ ናናይ እትፐ ግዲደ፥ ጾሳ ጎልያ ኪታ አዎተን ጼሌድኖ፤ ቃይ ሄናዳዳ ያራ ግድያ ሌዋቱካ ኡንቱንቱ ማዴድኖ። 10 ግምቢያዋንቱ መና ጎዳ ጌሻ ጎልያ ግምባናዉ ባሱዋ ባስ ዉርሴዳ ዎደ፥ ቄሳቱ ባረንቱ ማዩዋ ማይ ጹሩምባ ኦይቂደ፥ ቃይ አቱማ አሳ ግድያ አሳፋ ያራቱዋ፥ ሌዋቱካ፥ ዳላ ኦይቂደ፥ እስራኤልያ ካትያ ዳዊታ ዎጋዳን መና ጎዳ ጋላታናዉ ኤቄድኖ። 11 ኡንቱንቱ መና ጎዳ ጋላቲድነ ቃንጸናን ማዝሙርያን ሳቢደ፥ ሀዋዳን ያጊደ፥ አዉ የጼድኖ፤ “መና ጎዳይ ሎአ፤ እ እስራኤልያ ሲቅያ ሲቁ መናዋ” ያጌድኖ። ቃይ መና ጎዳ ጎልያ ባሱ ባሰቴዳ ድራዉ፥ አሳይ ኡባይ ባረንቱ ቃላ ቁ ኦደ ሆምቦጪደ፥ መና ጎዳ ጋላቴድኖ። 12 ሽን ካሰ ጎልያ በኤዳ ጭማ ቄሳቱ ዋፐ፥ ጭማ ሌዋቱዋፐነ ጭማ ጎልያ ካፓቱዋፐ ዳራቱ ሀእ ጌሻ ጎልያ ግምባናዉ ባሰቴዳ ባሱዋ በኤዳ ዎደ፥ ባረንቱ ቃላ ቁ ኦደ ዬኬድኖ፤ ሀራቱ ማታ ናሸቲደ ሆምቦጬድኖ። 13 ሄዋ ድራዉ፥ ናሸቲደ ሆምቦጭያዋ ዬክያዋፐ ሻክ ኤራናዉ ዳንዳየትቤና። አያዉ ጎፐ፥ ኡንቱንቱ ሎይ ኮሹምያ ድራዉ፥ ኡንቱንቱ ኮሹንቻይካ ሃኮ ሳን ስሰቴ።