ህዝቄላ 37

1 መና ጎዳ ኩሺ ታ ቦላ ዎዳ፤ እ ታና መና ጎዳ አያናን ከሲደ፥ መቀይ ኩም ኡቴዳ ዎምባን ዎዳ። 2 እ ታና ኡንቱንቱ ግዶን ያነ ሃነ ካለዳ፤ ታንካ ክንችል መሌዳ ዳሮ መቀቱ ኩሜዳዋንታ ዎምባ ግዶን በኣድ። 3 እ ታና፥ “ላ አሳ ናአዉ፥ ሀ መቀቱ ስሚደ፥ ፓጻ ሸምፑዋና ደአናዉ ዳንዳዪኖ?” ያጌዳ። ታን፥ “ኡባ ሞድያ መና ጎዳዉ፥ ሀዋ ኔን ኤራሳ” ያጋድ። 4 እ ታና ሀዋዳን ያጌዳ፤ “ሀ መቀቶ ሀዋዳን ያጋደ ትምቢትያ ኦዳ፤ ‘ህንተኖ፥ መላ መቀቶ መና ጎዳ ቃላ ስስተ፥ 5 ኡባ ሞድያ መና ጎዳይ ሀ መቀቶ ሀዋዳን ያጌ፤ “ታን ሸምፑዋ ህንተ ግዶ ገልሳና፤ ያቶፐ ህንተ ፓጻ ደአና። 6 ታን ህንተ ቦላ ግልዳይያ (ጻጶቱዋ) ዎደ፥ አሹካ ህንተ ቦላ ስማናዳን ኦደ፥ ህንተና ጋልባ ማይዛና። ህንተ ፓጻ ሸምፑዋና ደአና ማላ፥ ታን ህንተ ግዶ ሸምፑዋ ገልሳና። ሄ ዎደ ህንተ ታን መና ጎዳ ግድያዋ ኤራና” ያጌ’ ያጋ” ያጌዳ። 7 እ ታና አዛዜዳዋዳን ትምቢትያ ኦዳድ፤ ታን ትምቢትያ ኦድሽን፥ ቃልጭቃልጭያ ኮሻይ ስሰቴዳ፤ ቃይ መቀቱ ሺቂደ፥ ባረ ሳኣን ሳኣን ኦይቀቴድኖ። 8 ታን ጼልያ ዎደ፥ ኡንቱንቱ ቦላን ጻጶቱ ደኢኖ፤ አሹካ ኡንቱንቱ ቦላን ስሜዳ፤ ጋልባካ ማዬድኖ፤ ሽን ሸምፑ ኡንቱንቱን ደኤና። 9 ያትና፥ እ ታና ሀዋዳን ያጌዳ፤ “ላ አሳ ናአዉ፥ ጫርኮ ትምቢትያ ሀዋዳን ያጋደ ኦዳ፤ ‘ኡባ ሞድያ መና ጎዳይ ሀዋዳን ያጌ፤ “ኔኖ፥ ጫርኮ፥ ኦይዱ ዞዝያናካ ሃያ፤ ኡንቱንቱ ሸምፑዋና ደአናዳን፥ ሀ ሀይቄዳዋንቱ ግዶ ዛራደ ፑና” ያጌ’ ያጋ” ያጌዳ። 10 እ ታና አዛዜዳዋዳንካ፥ ታን ትምቢትያ ኦዳድ፤ ሸምፑ ኡንቱንቱ ግዶ ገልና ፓጺደ፥ ሎይ ዳሮ ኦላንቻቱዋ ግዲደ ኤቄድኖ። 11 ሄዋፐ ጉይያን፥ እ ታዉ ሀዋዳን ያጌዳ፤ “ላ አሳ ናአዉ፥ ሀ መቀቱ ኩመን እስራኤልያ አሳ ሌምሶ፤ እስራኤልያ አሳይካ፥ ‘ኑ መቀቱ መሌድኖ፤ ኑ ስን ናሸቻይካ ክቼዳ፤ ኑን ኡባና ዬዶ’ ያጊኖ። 12 ሄዋ ድራዉ፥ ኡንቱንቶ ሀዋዳን ያጋደ ትምቢትያ ኦዳ፤ ‘ኡባ ሞድያ መና ጎዳይ ሀዋዳን ያጌ፤ “ህንተኖ፥ ታ አሳቶ፥ ታን ህንተ ዱፉዋ ዶያና፤ ህንተና ሄዋፐ ከሳና፤ ታን ህንተና ዛራደ፥ እስራኤልያ ቢታ አሀና። 13 ታ አሳቶ፥ ታን ህንተ ዱፉዋ ዶይያ ዎደነ ህንተና ከስያ ዎደ፥ ታን መና ጎዳ ግድያዋ ህንተ ኤራና። 14 ታን ታ አያና ህንተ ግዶን ዎና፤ ህንተ ፓጻ ደአና። ቃይ ታን ህንተና ህንተ ቢታን ዎና። ሄ ዎደ ታን መና ጎዳይ ኦድያዋነ ኦዳደ ኦዳዋ ህንተ ኤራና። ታን መና ጎዳይ ሀዋ ኦዳይ” ያጌ’ ያጋ” ያጌዳ። 15 ዛሪደካ መና ጎዳ ቃላይ ታኮ ሀዋዳን ያጊደ ዬዳ፤ 16 “ላ አሳ ናአዉ፥ እት ም ጻምኣ አካደ፥ አ ቦላ፥ ‘ሀዌ ይሁዳዋነ አናና ደእያ እስራኤልያ አሳዋ’ ያግያዋ ጻፋ። ቃይ ሀራ ጻምኣ አካደ፥ አ ቦላ፥ ‘ሀዌ ኤፍሬማዋ፤ እካ ቃይ ዮሴፎዋነ አናና ደእያ እስራኤልያ አሳዋ’ ያግያዋ ጻፋ። 17 ሄዋፐ ጉይያን፥ ኡንቱንቱ ነ ኩሽያን እት ጋትማ ግዳናዳን፥ ኡንቱንቱ ላኡዋ እትፐ ጋ። 18 “ነ ቢታ አሳይ ኔና፥ ‘ሀዌ ኔን ኦያዌ አዬ? ኑዉ ብለ ኦዳ’ ያጊደ ኦችያ ዎደ፥ 19 ኡንቱንቶ ሀዋዳን ያጋ፤ ‘ኡባ ሞድያ መና ጎዳይ ሀዋዳን ያጌ፤ “ታን ኤፍሬማ ኩሽያን ደእያ ዮሴፎ ጋትማነ አናና ደእያ እስራኤልያ ዛራቱዋ አካናዉ ሀናይ፤ አካደ ኡንቱንቱ ላኡዋ እት ጋትማ ኦናዉ፥ ይሁዳ ጋትማና ጋና። ያቶፐ ኡንቱንቱ ላኡ ታ ኩሽያን እቱዋ ግዳና” ያጌ’ ያጋ። 20 “ሄ ኔን ኡንቱንቱ ቦላ ጻፌዳ ላኡ ጋትማቱዋ ኡንቱንቱ ስንን ኦይቃደ፥ 21 ኡንቱንታ ሀዋዳን ያጋ፤ ‘ኡባ ሞድያ መና ጎዳይ ሀዋዳን ያጌ፤ “እስራኤልያ አሳ ኡንቱንቱ ቤዳ ካዉተቱዋ ግዶፐ ከሳና፤ ታን ኡንቱንታ ኡባ ሳፐ ሺሻደ፥ ኡንቱንቱ ቢታ ዛራደ አሀና። 22 እስራኤልያ ደረቱዋ ቦላ፥ ኡንቱንቱ ቢታን ታን ኡንቱንታ እት ካዉተ ኦና፤ ኡንቱንቱ ኡባ ቦላ እት ካቲ ካተታና። ቃይ ኡንቱንቱ ላኤን ላኡ ቢታ ከስክኖ፤ ዎይ ላኡ ካዉተ ግዲደ ሻከትክኖ። 23 ሄዋፐ ጉይያን፥ ኡንቱንቱ ባረንቱ ኤቃቱዋንነ ባረንቱ ሸነይያባቱዋን፥ ዎይ ባረንቱ ናቁዋን ባረንታ ቱንስክኖ። ዋኒደ ጎፐ፥ ታን ኡንቱንታ ኡንቱንቱ ጉየ ስሜዳ ናጋራ ኡባፐ አሻና፤ ቃይ ታን ኡንቱንታ ጌሻና። ኡንቱንቱ ታ አሳ ግዳና፤ ታንካ ኡንቱንቱ ጾሳ ግዳና። 24 " ’ “ታ ቆማይ ዳውት ኡንቱንቶ ካትያ ግዳና፤ ኡንቱንቶ ኡባዉ እት ሄንንቻ ጻላላይ ደአና። ኡንቱንቱ ታ ህግያ ካላና፤ ታ ዎጋካ ምንሲደ ናጋና። 25 ታን ታ ቆማ ያቆባዉ እሜዳነ ህንተ ማይዛ አዎቱ ደኤዳ ቢታን ኡንቱንቱ ደአና። ሄ ቢታን ኡንቱንቱ፥ ኡንቱንቱ ናናቱነ ኡንቱንቱ ናናቱዋ ናናቱ መናዉ ደአና፤ ታ ቆማይ ዳውት ኡንቱንቱ ቦላን መናዉ ካፑዋ ግዳና። 26 ታን ኡንቱንቱና ሳሮተ ጫቁዋ ጫቀታና፤ ሄ ጫቁካ ኡንቱንቱና መና ጫቁዋ ግዳናዋ። ታን ኡንቱንታ ምንሳደ ኤሳና፤ ኡንቱንቱ ፓይዱዋካ ጮርሳና፤ ታ ጌሻ ጎልያካ መናዉ ኡንቱንቱ ግዶን ዎና። 27 ያታደ ታን ሄዋን ኡንቱንቱና ደአና። ታን ኡንቱንቱ ጾሳ ግዳና፤ ኡንቱንቱካ ታ አሳ ግዳና። 28 ታ ጌሻ ጎሊ ኡንቱንቱ ግዶን መናዉ ደእያ ዎደ፥ እስራኤላቱዋ ጌሽያዌ ታና፥ መና ጎዳ ግድያዋ ካዉተቱ ኤራና” ያጌ’ ያጋ” ያጊደ ዬዳ።