ህዝቄላ 18

1 መና ጎዳ ቃላይ ታኮ ሀዋዳን ያጊደ ዬዳ፤ 2 “እስራኤልያ ቢታባ ህንተ፥ ‘አዎቱ ጋምኤ ዎይንያ ሚና፥ ናናቱዋ አቻይ ዝልኤዳ’ ጊደ ህንተ ሌምስያዌ አዬ? 3 ታን ኡባ ሞድያ መና ጎዳይ ታ ደኡዋን ጫቃይ: ሀዋፐ ስንዉ ህንተ እስራኤልያ ቢታን ሀ ሌምሱዋ ሌምስክታ። 4 አሳ ኡባ ሸምፑ ታዋ፤ አዉዋ ሸምፑካ ናኣ ሸምፑካ ታዋ። ናጋራ ኦያ ሸምፑ እ ባረዉ ሀይቃና። 5 “እት አሳይ ጽሎ ግዶፐ፥ ቱሙ ፕርዳነ ሱረተ ኦፐ፥ 6 እ ደርያ ቦላ ደእያ ኤቃዉ ጎይንያ ሳአቱዋን ማና ዮፐ፥ እ እስራኤልያ አሳ ኤቃዉ ጎይናና ዮፐ፥ ባረ ሾሩዋ ማጫ አሳ ቱንሳና ዮፐ፥ ቃይ ፒላይ ዬዳ ማጫሳና ግሳና ዮፐ፥ 7 ኦናነ ኡቁናና ዮፐ፥ አጮ ኦይቄዳዋ ጉየ ዛሮፐ፥ እት ኡራነ ቦንቃና ዮፐ፥ ባረዉ ደእያዋፐ ኮሻቴዳ አሳ ምዞፐ፥ ካሎቴዳዋ ማይዞፐ፥ 8 እ ዎያ አካናዉ ድቻዉ ታልአና ዮፐ፥ ባረ ኩሽያ ባላፐ ሺሽ አኮፐ፥ አሳ ግዶን ቱሙዋ ፕርዶፐ፥ 9 ታ ህግያን ሄመቶፐ፥ ታ ዎጋካ አማነቲደ ናጎፐ፥ ያቶፐ፥ እ ጽሎ አሳ፥ እ ቱሙ ፓጻ ደአና። ታን ኡባ ሞድያ መና ጎዳይ ሀዋ ኦዳይ። 10 “ሀ ብታንያዉ ሸምፑዋ ዎያ፥ ዎይ ሀዋፐ ካሊደ ደእያዋንቱፐ ሀቃዋ ግድናካ ኦያ እት ኢታ ናአይ ደኦፐ፥ 11 ባረ አዉ ኦቤናዋ ኡባባ ኦ። እ ደርያ ቦላ ደእያ ኤቃዉ ጎይንያ ሳአቱዋን ሜ፤ እ ባረ ሾሩዋ ማጫ አሳ ቱንሴ፤ 12 እ ህዬሳነ ማንቁዋ ኡቁኔ፤ እ አሳባ ቦንቄ፤ አጮ ኦይቄዳዋ ዛረና፤ ኤቃዉካ ጎይኔ፤ ቱናባካ ኦ፤ 13 እ ድቻዉ ታልኢደ፥ ዎያ አኬ። ሄዋ ማላ አሳይ ፓጻ ደአኔ? ቱይት፥ እ ፓጻ ደኤና! እ ሄዋ ማላ ቱናባ ኦዳ ድራዉ፥ እ ቱማ ሀይቃና፤ አ ሱ አጩካ አ ቦላና ግዳናዋ። 14 “ሀ ኢታ ብታንያዉ ናአይ ደኦፐ ሄ ናአይ ባረ አዉ ኦያ ሀ ናጋራ ኡባ በኢደ፥ እ ሄዋ ማላባ ኦና ዮፐ፥ 15 እ ደርያ ቦላ ኤቃዉ ጎይንያ ሳአቱዋን ማና ዮፐ፥ እስራኤልያ አሳ ኤቃዉ ጎይናና ዮፐ፥ እ ባረ ሾሩዋ ማጫ አሳ ቱንሳና ዮፐ፥ 16 እ ኦናነ ኡቁናና ዮፐ፥ አጮ ኦይቄዳዋ ጉየ ዛሮፐ፥ እ አሳዋ ቦንቃና ዮፐ፥ ባረዉ ደእያዋፐ ኮሻቴዳዋንታ ምዞፐ፥ ካሎቴዳዋንታካ ማይዞፐ፥ 17 እ ባላፐ ኩሽያ ሺሽ አኮፐ፥ ዎያ አካናዉ ድቻዉ ታልአና ዮፐ፥ እ ታ ህግያ ናጎፐ፥ ታ ዎጋንካ ሀመቶፐ፥ ያቶፐ፥ እ ፓጻ ደአናፐ አትና፥ ባረ አዉዋ ናጋራን ሀይቀና። 18 ሽን አ አዉ አሳ ማታ ቦንችቤና ድራዉ፥ ባረ እሻቱዋካ ዎልቃን ቦንቄዳ ድራዉነ ባረ አሳ ግዶን ኢታ ኦዳ ድራዉ፥ ባረ ናጋራን ሀይቃና። 19 “ሽን ህንተ፥ ‘ናአይ ባረ አዉዋ ናጋራን አያዉ ሙረተኔ ያጊታ። ናአይ ቱሙ ፕርዳነ ሱረተ ኦደ፥ ታ ህግያ ምንሲደ ናጎፐ፥ እ ቱሙ ፓጻ ደአና። 20 ናጋራ ኦያ ሸምፑ እ ባረዉ ሀይቃና። ናአይ አዉዋ ናጋራን ሙረተና፤ ሄዋዳንካ፥ አዉ ናኣ ናጋራን ሙረታና። ጽሎ አሳ ጽሎተይ ሄ አዉዋሳ ግዳናዋ፤ ኢታ አሳ ኢታተይካ ሄ አዉዋሳ ግዳናዋ። 21 " ‘ሽን ናጋራንቻይ ባረ ኦዳ ናጋራ ኡባፐ ስሚደ፥ ታ አዛዙዋ ናጎፐነ ቱሙ ፕርዳነ ሱረተ ኦፐ፥ እ ቱሙ ፓጻ ደአናፐ አትና ሀይቀና። 22 እ ኦዳ ናጋራፐ እቱነ ቆፈተና። ባረ ኦዳ ጽሎ ኦሱዋ ድራዉ፥ እ ፓጻ ደአና። 23 ናጋራንቻይ ባረ ኦግያፐ ስሚደ፥ ፓጻ ደእያዋን ናሸታይፐ አትና፥ ታን ኡባ ሞድያ መና ጎዳይ አ ሀይቁዋን ናሸትከ። 24 " ‘ሽን ጽሎ አሳይ ባረ ጽሎተፐ ጉየ ስሚደ፥ ናጋራንቻ አሳይ ኦያ ናጋራነ ቱና ኦሱዋ ኦፐ፥ እ ፓጻ ደአኔ? ቱይት፥ እ ኦዳ ጽሎ ኦሱዋፐ እቱነ ቆፈተና፤ እ አማነተናን እጼዳ ድራዉነ እ ኦዳ ናጋራ ኡባ ድራዉ፥ እ ሀይቃና። 25 " ‘ሽን ህንተ፥ ጾሳ ኦጊ ሱረ ግደና’ ያጊታ። ህንተኖ፥ እስራኤልያ አሳቶ፥ ሀእ ስስተ! ሱረ ግደናዌ ታ ኦጌ? ሱረ ግደናዌ ህንተ ኦግያ ግደኔ? 26 ጽሎ አሳይ ባረ ጽሎተፐ ጉየ ስሚደ፥ ናጋራ ኦያ ዎደ፥ ባረ ናጋራን ሀይቄ። እ ባረ ኦዳ ናጋራ ድራዉ ደኡዋን ደኤና። 27 ሽን ኢታ አሳይ ባረ ኢታተፐ ጉየ ስሚደ፥ ቱሙ ፕርዳነ ሱረተ ኦያ ዎደ፥ እ ባረ ሸምፑዋ አሻና። 28 እ ባረ ኦዳ ናጋራ ኡባ አኬኪደ ስሜዳ ድራዉ፥ እ ቱሙ ፓጻ ደአናፐ አትና ሀይቀና። 29 ሽን እስራኤልያ አሳቱ፥ ጾሳ ኦጊ ሱረ ግደና ያጌድኖ። ህንተኖ፥ እስራኤልያ አሳቶ፥ ሱረ ግደናዌ ታ ኦጌ? ሱረ ግደናዌ ህንተ ኦግያ ግደኔ? 30 “ሄዋ ድራዉ፥ ህንተኖ፥ እስራኤልያ አሳቶ፥ ታን ህንተና ኡባካ ህንተ ኦግያዳን ኦግያዳን ፕርዳና። ናጋራይ ህንተ ዮ ጋሶ ግደናዳን ፓጽተ፤ ህንተ ባይዙዋ ኡባፐካ ስምተ። ታን ኡባ ሞድያ መና ጎዳይ ሀዋ ኦዳይ። 31 ህንተ ናቄዳ ናቁዋ ኡባ ህንተፐ ሃሲደ፥ ኦራ ዎዛናነ ኦራ አያና አክተ። ህንተኖ እስራኤልያ አሳቶ፥ አያዉ ሀይቂቴ? 32 ታን እት አሳ ሀይቁዋንነ ናሸትከ። ሄዋ ድራዉ፥ ህንተ ናጋራ ፓጽ ስሚደ፥ ፓጻ ደእተ! ታን ኡባ ሞድያ መና ጎዳይ ሀዋ ኦዳይ” ያጌዳ።