ከሳ 23

1 “ዎርዶ ኦዱዋ ፑኮፓ፤ ዎርዱዋ ማርካ ግዳደ፥ ኢታ አሳ ማዶፓ። 2 ኢታባ ኦናዉ ጮራ አሳ ካሎፓ፤ ፕርዳ ጌላያናዉ ጮራ አሳና እታ ግዳደ ማርካቶፓ። 3 ህዬሳይ ፕርዳዉ ሺቆፐ፥ ሞቱዋን አ መቱዋ ጼላደ ማዶፓ። 4 “ነ ሞርክያ ቦራይ ዎይ ሀሪ ባዬዳዋ ደሞፐ፥ ዛራደ አዉ አፋ። 5 ኔና እጽስያ ብታንያ ሀሪ ጫናና ኩንዴዳዋ በኦፐ፥ ሄዋን አጎፓ፤ ማዳደ አናና ደን። 6 “ፕርዳ ዳባባን ማዳደ፥ ህዬሳ አሳ ፕርዳ ጌላዮፓ። 7 ዎርዶ የዉዋ ኡባፐ ሃካ፤ ጌሻ ዎይ ጽሉዋ ዎፓ፤ አያዉ ጎፐ፥ ኮባ ኦዳዋ ታን ሳሮ የድከ። 8 ማታይያ (ማጋንጻ) አኮፓ፤ አያዉ ጎፐ፥ ማታዪ ጼልያዋንቱ አይፍያ ቆቅሴነ ጽላቱዋ ቃላ ምርቄ። 9 “በትያ ናቆፕተ፤ በተ ግድያዌ አይ ኬሻ ካዮይንቶ ኤሪታ፤ አያዉ ጎፐ፥ ህንተንቱ ህንተንቱ ሁጲያዉ በተ ግዲደ ግብጼ ጋድያን ደኤድታ። 10 “ኔን ነ ጋድያ ኡሱፑን ላይዉ ጎሻደ፥ ዘራደ ካ ቆይጫ አካ። 11 ላፑን ላይን ጋድያ ጎሸናን ሻቻ፤ ያቶፐ፥ ነ አሳ ግዶን ደእያ ህዬሳቱ ሄዋፐ ምያባ ደማና፤ ቃይ ኡንቱንቱፐ አትያዋ ዶአቱ ማና። ኔን ነ ዎይንያ ቱራካ ነ ዎጋራካ ሄዋዳን ኦ። 12 ኡሱፑን ጋላሳ ነ ኪታ ኪተታ፤ ነ ቦራይነ ነ ሀሪ ሸምፓና ማላነ ነ ሶን የለቴዳ አይሊነ በቲ፥ ሸምፓና ማላ፥ ላፑን ጋላስ ኦሱዋ ኦፓ። 13 “ታን ህንተንታ ጌዳዋ ኡባ ምንሲደ ኦተ፤ ሀራ ጾሳቱዋ ሱን ጼሶፕተ፤ ህንተንቱ እንጻርሳፐ ሄዌ ስሰቶፖ። 14 “ላይን ሄዙ ገደ ህንተንቱ ታዉ ባላ ቦንችተ። 15 ማጋገ ኡክ ባላ ቦንችተ፤ ታን ህንተንታ አዛዜዳዋዳን፥ ላፑን ጋላሳ እርሹዋ የግቤና ኡክ ሚተ፤ ህንተንቱ አቢባ ጌተትያ አግናን ኬሬዳ ጋላሳቱዋን ሀ ባላ ቦንችተ፤ አያዉ ጎፐ፥ ህንተንቱ ግብጼፐ ከሴዳዌ ሄ አግናና። “ህንተፐ እት አሳይነ ታ ስንን መላ ኩሸ ቤቶፖ። 16 “ቃይ ህንተንቱ ህንተንቱ ጋደን ዘርና፥ ኮይሮ ጋኬዳ ካ ጫክያ ዎደ፥ ካ ጫክያ ባላ ቦንችተ። “ቃይካ ላይ ዉርሰን፥ ካ አይፍያ ጋደፐ ሺሽያ ዎደ፥ ሺሹዋ ባላ ቦንችተ። 17 አቱማ አሳይ ኡባይ ኡባ ሞድያ መና ጎዳ ስንን ላይን ሄዙ ገደ ቤቶ። 18 “ኔን ያርሹዋ ሱ ታዉ ሺሻደ፥ እርሹዋ የጊደ ኡኬዳ ኡክና ሺሾፓ። ታ ባላ ቦንችያ ጋላስ ያርሸቴዳ ሞዋፐ ዎንታዉ አይነ አቶፖ። 19 ነ ጋደን ባይራ ካኤዳ ካፐ ኡባፐ ሎእያዋ መና ጎዳ ሶ፥ ነ ጾሳ ሶ አሀ። ዴሻ ማራ አ ዳይ ማን ዶይሶፓ። 20 “ነ ኦግያን ኔና ናጋና ማላነ ታን ነዉ ጊግሴዳ ሳኣ ኔና አፋና ማላ፥ ታን ኪታንቻ ነ ስንን ኪታና። 21 እ ኦድያዋ ሀይዛ አዉ አዛዘታ፤ አ ቦላ ማካሎፓ፤ ታ ሱንይ አ ቦላ ደእያ ድራዉ፥ ህንተንቱ ናጋራ ኦያዋ ግዶፐ፥ ህንተንቶ እ አቶ ጌና። 22 እ ኦድያዋ ህንተንቱ ምንሲደ ሀይዞፐነ ታን ኦድያዋ ኡባ ኦፐ፥ ህንተንቱ ሞርከቱዋ ታን ሞርካና፤ ህንተናና ኤቀትያዋንቱና ታንካ ኤቀታና። 23 ታ ኪታንቻይ ህንተፐ ስንና ቢደ፥ ህንተንታ አሞራዋናቱዋ ጋድያ፥ ሂተቱዋ ጋድያ፥ ፓርዛዋናቱዋ ጋድያ፥ ካናነቱዋ ጋድያ፥ ሂዌቱዋ ጋድያነ ያቡሳዋናቱዋ ጋድያ አሀና። ታን ኡንቱንቱ ኡባ ይሳና። 24 ኡንቱንቱ ጾሳቱዋ ስንን ሆኮፕተ፥ ዎይ ጎይኖፕተ፥ ዎይ ኡንቱንቱ ሀኑዋ ቁሎፕተ። ህንተንቱ ኡንቱንቱ ጾሳቱዋነ ኡንቱንቱ ሹቻ ምስለቱዋ መንሬናዉ ኮሼ። 25 መና ጎዳ፥ ህንተንቱ ጾሳዉ፥ ጎይንተ፤ ያቶፐ፥ እ ህንተንቱ ቁማነ ህንተንቱ ሃ አንጃናዋ፤ ታን ሀርግያ ህንተንቱ ግዶፐ ድጋና። 26 ህንተንቱ ቢታን አይ ማጫ አሳይነ ቦሸተና፤ ማይነና። ታን ህንተንቱ ደአና ላይ ፓይዱዋ አዱሳና። 27 “ታን ታ ያሻ ህንተንቱ ስንን የዳና፤ ህንተናና ጋከትያ ካዉተ ኡባ ዳጋንና፤ ህንተንቱ ሞርከቱ ኡባይ ህንተንቶ ዞኪያ ዛሪደ፥ ባቃታናዳን ታን ኦና። 28 ታን ህንተፐ ስንዉ ዱክያ ካጅያ የዳና፤ ሂዌቱዋ፥ ካናነቱዋነ ሂተቱዋ ህንተንቱ ስንፐ ላጋደ ከሳና። 29 ሽን ቢታይ መላ አተናዳንነ ባዙዋ ዶአይ ህንተንታ ዋይሰናዳን፥ እት ላይን ኡንቱንታ የደርስከ። 30 ሽን ህንተንቱ ፓይዱዋን ዳሪደ፥ ሄ ጋድያ ላታና ጋካናዉ፥ ታን ኡንቱንታ ላፋ ላፋ ላጋደ ህንተንቱ ስንፐ ከሳና። 31 ታን ህንተንቱ ዛዋ ዞኦ አባፐ ፕልስጼማ አባ፥ መላ ቢታፐ ኤፍራጺሳ ሻፋ ጋና። ሄ ጋድያን ደእያ ኡባ ታን ህንተንቱ ኩሽያን አደ እማና፤ ህንተንቱካ ኡንቱንታ ህንተንቱ ስንፐ ላጊደ ከሳና። 32 ኡንቱንቱና ዎይ ኡንቱንቱ ጾሳቱዋና ጫቁዋ ዎፕተ። 33 ኡንቱንታ ህንተንቱ ጋድያን ዎፕተ፤ ሄዌ ዮፐ ኡንቱንቱ ህንተንታ ታ ቦላ ናጋራ ኦስሳናዋንታ፤ አያዉ ጎፐ፥ ኡንቱንቱ ጾሳቶ ጎይንያዌ ቱሙፐ ህንተንቶ ጲረ ግዳናዋ” ያጌዳ።