ዛረዋ 31

1 ሙሴ ጉጂድካ እስራኤልያ አሳዉ ሀዋዳን ያጌዳ፤ 2 “ሀእ ታዉ ጼታነ ላታሙ ላይ ግዴዳ ድራዉ፥ ሀዋፐ ስንናዉ ህንተና ካለናዉ ዳንዳይከ፤ ሄዋ ቦላካ መና ጎዳይ ታና፥ ‘ኔን ዮርዳኖሳ ሄፍን ፕናካ’ ያጊደ ኦዴዳ። 3 መና ጎዳይ ህንተ ጾሳይ ህንተ ስንን ሀመቲደ ህንተና ካለና። ሄዋን ደእያ ካዉተቱዋ እ ዉርስያ ድራዉ፥ ኡንቱንቱ ቢታ ህንተ ላታና። ቃይ መና ጎዳይ ጌዳዋዳን ኢያሱ ህንተና ካለና። 4 መና ጎዳይ አሞረ ካተቱዋ ስሆናነ ኦጋ ጾኒደ፥ ኡንቱንቱ ቢታ ይሴዳዋዳን፥ ህንተ ሞርከቱዋካ ሄዋዳን ኦና። 5 መና ጎዳይ ኡንቱንታ ህንተንቶ አ እማና፤ ህንተ ኡንቱንቱ ቦላ ታን ህንተና አዛዜዳዋዳን ኦና። 6 ምንተ፤ አይነ ባዋ፤ ያዮፕተ። ኡንቱንታ በኢደ ዳጋሞፕተ። አያዉ ጎፐ፥ መና ጎዳይ ህንተ ጾሳይ ህንተናና ግዳናዋ። እ ህንተና የገና ዎይ አገና” ያጌዳ። 7 ሄዋፐ ጉይያን፥ ሙሴ ኢያሳ ጼሲደ፥ እስራኤልያ አሳ ኡባ ስንን ሃዋዳን ያጌዳ፥ “ምና፤ ገንጫ። አያዉ ጎፐ፥ ኔን ሀ አሳና እትፐ መና ጎዳይ ኡንቱንቱ ማይዛ አዋቶ እማና ጊደ ጫቄዳ ቢታ ገልሳሳ፤ ሄ ቢታካ ኡንቱንታ ላትሳሳ። 8 እ መና ጎዳይ ባረ ሁጲያዉ ኔናና ግዲደ ኔና ካለና። እ ኔና ኦለና፤ አይነካ ኔና አገና። ሄዋ ድራዉ፥ ያዮፓ፤ ነ ዎዛናን ዳጋሞፓ” ያጌዳ። 9 ሙሴ ሀ ህግያ ጻፊደ፥ መና ጎዳ ጫቁዋ ታቦታ ቶክያ ቄሰ ግድያ ሌዊያ ናናቶነ እስራኤልያ ጭማቶ ኡባዉ እሜዳ። 10 ሙሴ ኡንቱንታ ሀዋዳን ያጊደ አዛዜዳ፤ “አጩ ኡባይ አቶ ጌተትያ ላፑን ላይ ዉርሰን፥ ቦንቼትያ ዳስያ ባላ ጋላሳን፥ 11 መና ጎዳ ህንተ ጾሳ ስን እ ዶሬዳ ሳኣ አዉ ጎይናናዉ እስራኤልያ አሳይ ኡባይ ሺቅያ ዎደ፥ ኡንቱንቱ ስስያዋዳን ናባብተ። 12 ኡንቱንቱ ኡባይካ ስሲደ፥ መና ጎዳዉ፥ ህንተ ጾሳዉ፥ ያይያዋ ታማራና ማላ፥ ሀ ህግያ ቃላ ኡባ አማነቲደ ፖላና ማላ፥ አሳ፥ አቱማነ ማጫ፥ ናናቱዋነ ህንተ ጋድያን ደእያ ካረ ቢታ አሳ እትፐ ሺሽተ። 13 ሀ ህግያ ቃላ ኤረና ኡንቱንቱ ናናይካ ዮርዳኖሳ ፕኒደ፥ ህንተ ላታናዉ ብያ ጋድያን ህንተ ደእያ ላይ ኡባን ሀ ህግያ ስስኖ፤ መና ጎዳዉ፥ ህንተ ጾሳዉ፥ ያይያዋ ታማርኖ” ያጌዳ። 14 ሄዋፐ ጉይያን፥ መና ጎዳይ ሙሳ ሀዋዳን ያጌዳ፤ “በአ፥ ኔን ሀይቂያ ጋላሳይ ማቴዳ። እ ካለሰትያ አዛዙዋ አዉ ታን እማና ማላ፥ ኢያሳ ጼሳደ፥ ኔን አናና እትፐ ዱንካንያ ግዶ ገልተ” ያግና፥ ሙሴነ ኢያሱ ዱንካንያኮ ሺቄድኖ። 15 መና ጎዳይ ሄ ዱንካንያን ሻርያ ቱሳን ኡንቱንቶ ቆንጬዳ፤ ሄ ሻርያ ቱሳይካ ዱንካንያ ፐንግያን ኤቄዳ። 16 መና ጎዳይ ሙሳ ሀዋዳን ያጌዳ፤ “ኔን ማታን ሀይቃደ ነ አዎቱዋን ጋከታሳ። ኔፐ ጉይያን፥ ሀ አሳይ ታዉ አማነተናዋ ግዳና፤ ታን ኡንቱንቱና ዎዳ ጫቁዋ መንና። ኡንቱንቱ ታና አጊደ፥ ሻርሙጻቱዋዳን፥ ባረንቱ ላትያ ጋድያን ደእያ ኤቃቱዋ ካላና። 17 ሄዌ ሀንያ ዎደ፥ ታ ሀንቁ ኡንቱንቱ ቦላ ኤጽ ከሳና። ታንካ ኡንቱንታ አጋ አጋና፤ ታ ሶምኡዋ ኡንቱንቱፐ ዎራ ዛራና። ያትና፥ ኡንቱንቱ ያና፤ ጮራ መቱነ ባሻይ ኡንቱንቱ ቦላ ያና። ሄ ዎድያን ኡንቱንቱ፥ ‘ቱሙ ሀ መቱ ጋኬዳዌ ኑ ጾሳይ ኑ ግዶን ባይናዋ ግሻሳ ግደኔ?’ ያጊደ ኦቻና። 18 ሀራ ጾሳቶ ጎይኒደ፥ ኡንቱንቱ ሀኔዳ ኢታባ ድራዉ፥ ታን ሄ ጋላስ ታ ሶምኡዋ ሙለካ ኡንቱንቱፐ ዎራ ዛራና። 19 “ሄዋ ድራዉ፥ ሀእ ሀ ማዝሙርያ ጻፋደ፥ እስራኤልያ አሳ ኡባ ታማርሳ። ሀ ማዝሙሪ ታዉ እስራኤልያ አሳ ቦላ ማርካ ግዳና ማላ፥ ኡንቱንታ የጽሳ። 20 ኡንቱንቱ ማይዛ አዋቶ ገሌዳ ቃላዳን፥ ማይነ ኤሳይ ጎግያ ቢታ ታን ኡንቱንታ ገልሴዳዋፐ ጉይያንነ ኡንቱንቱ ም ካሊደ፥ ዎዛናይ ሙሜዳዋፐ ጉይያን፥ ሀራ ጾሳቶ ጎይኒደ፥ ታና ካና፤ ታ ጫቁዋካ መንና። 21 ዳሮ መቱነ ባሻይ ኡንቱንቱ ቦላ ጋኬዳ ዎደ፥ ሀ ማዝሙሪ ኡንቱንቱ ናናቱ ዶናፐ ድገተና ድራዉ፥ ኡንቱንቱ ቦላ ማርካ ግዳናዋ። አያዉ ጎፐ፥ ታን ጫቄዳ ቢታ ኡንቱንታ ብሮ ገልሰናን ደእሽን፥ ሃናናካ ኡንቱንቱ ቆፕያ ቆፋ ኤራክቻድ” ያጌዳ። 22 ሙሴ ሄ ጋላስ ሄ ማዝሙርያ ጻፊደ፥ እስራኤልያ አሳ ታማርሴዳ። 23 ሄዋፐ ጉይያን፥ መና ጎዳይ ኔዌ ናኣ ኢያሳ ሀዋዳን ያጊደ አዛዜዳ፤ “ምና፥ ገንጫ፤ ታን ኡንቱንቶ እማናዉ ቃላ ገሌዳ ቢታ እስራኤልያ አሳ አፋደ ገልሳሳ። ታንካ ኔናና እትፐ ግዳና” ያጌዳ። 24 ሙሴ ሀ ህግያ ቃላቱዋ ኮይሮፐ ዉርሰ ጋካናዉ፥ ጻፊደ ዉርሴዳዋፐ ጉይያን፥ 25 መና ጎዳ ጫቁዋ ታቦታ ቶክያ ሌዋቱዋ ሀዋዳን ያጊደ አዛዜዳ፤ 26 “ህጊ ጻፈቴዳ ሀ ማጻፋ አፍተ፤ መና ጎዳ ህንተ ጾሳ ጫቁዋ ታቦታ ማታን ዎተ። ሄዋን እ ህንተ ቦላ ማርካ ግዳና ማላ ያን ዎተ። 27 ህንተ ዎይሳ ማካላንቼንቶነ ዎይሳ ሞርግያ ሌፈንቶ ታን ኤራይ። በእተ፥ ታ ህንተናና ደኤዳ ላይ ኡባን ህንተ መና ጎዳዉ ኢታ ማካላ፤ ሽን ታን ሀይቃ ክችና፥ ኡባ ዎይሳ ማካላንቴ? 28 ሄዋ ድራዉ፥ ሀዋ ኡባ ታ ኡንቱንቶ ኦዳናዉ፥ ሳሉዋነ ሳኣ ታ ኡንቱንቱ ቦላ ማርካያናዉ፥ ህንተ ዛርያ ካፓቱዋ ኡባነ ደርያ ካለያ አሳ ኡባ ታዉ ሺሽተ። 29 ታ ሀይቄዳዋፐ ጉይያን፥ ህንተ ሙለ ኢታ አሳ ግዳናዋነ ታን ህንተና ታማርሴዳ አዛዙዋፐ ዎራ ስማናዋ ታን ኤራይ። እ ኦፕተ ጌዳ ኢታባ ህንተ ኩሽያን ኦደ፥ መና ጎዳ ሀንቀያ ድራዉ፥ ስንፐ ይያ ዎድያን ህንተ ቦላ ኢታ ቦሻ አሀና” ያጌዳ። 30 ሄዋፐ ጉይያን፥ ሙሴ ሀ ማዝሙርያ ቃላቱ ዉራና ጋካናዉ፥ ሺቄዳ እስራኤልያ ሺቁዋ ኡባ ስሲደ ኦዴዳ።