ዛረዋ 28

1 “መና ጎዳዉ፥ ነ ጾሳዉ፥ ፖሎ አዛዘቶፐ፥ ሀች ታን ነዉ እምያ አዛዙዋ ኡባ ሎይደ ካሎፐ፥ መና ጎዳይ ነ ጾሳይ ጋድያን ደእያ ካዉተቱዋ ኡባፐ ኔና ቁ ቁ ኦና። 2 መና ጎዳዉ፥ ነ ጾሳዉ፥ ኔን አዛዘቶፐ፥ ሀዋፐ ካሊደ ደእያ አንጁ ኡባይ ነዋ ግዳናዋ። 3 “ኔን ካታማን አንጀቴዳዋ ግዳናዋ፤ ጋጻርያንካ አንጀቴዳዋ ግዳናዋ። 4 ነ ኡሉዋ አይፊ፥ ነ ሾይቃ አይፊ፥ ነ መህያ ማራቱነ ነ ዶርሳነ ነ ዴሻ ዉድያ ማራቱ፥ ጮራቲደ አንጀቴዳዋንታ ግዳና። 5 ነ ካ ቁንአይነ ነ ሙናቃ ከሪ አንጀቴዳዋንታ ግዳናዋ። 6 ኔን ገላደካ ከሳደካ አንጀቴዳዋ ግዳና። 7 “ነ ቦላን ደንድያ ነ ሞርከቱዋ መና ጎዳይ ነ ስንን ጾነቴዳዋንታ ኦና። ኡንቱንቱ ነ ቦላ እት ኦግያና ያና፤ ሽን ላፑን ኦግያና ነ ስንፐ ባቃቲደ ያና። 8 “መና ጎዳይ ነ ኩሺ ኦይቄዳዋ ኡባነ ነ ድይያ አንጃና፤ መና ጎዳይ ነ ጾሳይ ነዉ እ እምያ ጋድያን ኔና አንጃና። 9 “ኔን መና ጎዳ ነ ጾሳ አዛዙዋ ናጎፐነ አ ኦግያን ሀመቶፐ፥ እ ነዉ ካሰ ጫቄዳዋዳን፥ መና ጎዳይ ኔና ባረዉ ዱማቴዳ ጌሻ ጋደ ኦደ ኤሳና። 10 ሄዋፐ ጉይያን፥ ጋድያን ደእያ አሳይ ኡባይ መና ጎዳ ሱንይ ኔናን ጼገቴዳዋ በኢደ ያያና። 11 መና ጎዳይ ነዉ እማናዉ ካሰ ነ ማይዛ አዋቶ ጫቄዳ ሄ ጋድያን፥ ነ ኡሉዋ አይፍያ፥ ነ መህያ አይፍያነ፥ ነ ሾይቃ አይፍያ ዳርሲደ ኔና አንጃና። 12 “ነ ኩሽያ ኦሱዋ ኡባ አንጃናዉነ፥ መና ጎዳይ ነ ቢታዉ እራ ዎድያን ቡክሳናዉ ባረ ምንጃ ጎልያ፥ ሳሉዋ ፐንግያ ነዉ ዶያና፤ ቃይ ኔን ዳሮ ካዉተቶ ታልአናፐ አትና፥ ኦፐነ ሃ ታልአካ። 13 መና ጎዳይ ኔና ሁጰ ከሳናፐ አትና፥ ጉየ ዱፈ ከሰና። ሀቼ ታን ነዉ እምያ፥ መና ጎዳ ነ ጾሳ አዛዙዋ ስሳደ፥ ሄዋ ሎይደ ካሎፐ፥ ኔን ቦላ ግዳናፐ አትና፥ ጋርሳ ግዳካ። 14 ታን ነዉ ሀች እሜዳ አዛዙዋፐ ሀድርሳነ ኡሸቻ ጋደ፥ ሀራ ጾሳቱዋ ካሎፓነ ኡንቱንቶ ኦፓ። 15 “ሽን ኔን መና ጎዳ ነ ጾሳ ቃላዉ አዛዘተናን እጻደ፥ ሀች ታን ኔና አዛዝያ ዎጋነ አዛዙዋ ኡባ ናገናን አጎፐ፥ ሀዋፐ ካሊደ ደእያ ሸቃቱ ኡባይ ነ ቦላ ያናነ ኔና ኡንቱንቱ ደማና። 16 “ኔን ካታማን ሸቀቴዳዋ ግዳና፤ ጋጻርያንካ ኔን ሸቀቴዳዋ ግዳና። 17 “ነ ካ ቁንአይነ ነ ሙናቃ ከሪ ሸቀቴዳዋ ግዳና። 18 “ነ ኡሉዋ አይፊ፥ ነ ሾይቃ አይፊ፥ ነ መህያ ዉዲ፥ ነ ዶርሳነ ዴሻ ዉዲ ሸቀቴዳዋ ግዳና። 19 “ኔን ገላደካ ከሳደካ ሸቀቴዳዋ ግዳና። 20 “ኔን ነ ኢታ ኦሱዋን ታና አጌዳ ድራዉ፥ ኤለካ ኔን ያና ጋካናዉ፥ ነ ኦያ ኦሶ ኡባን መና ጎዳይ ሸቃ፥ ሻቢርሳነ ሴራ የዳና። 21 ኔን ላታናዉ ብያ ጋድያፐ ያና ጋካናዉ፥ መና ጎዳይ ኢታ ሀርጊ ኔፐ ዱጸናዳን ኦና። 22 መና ጎዳይ ኔና ግልቃተን፥ ምሹዋንነ ማዱን፥ ጹግያ ሀርጊያንነ ኮሻን፥ ጫርኩዋንነ ዱማ ዱማ ካ ሀርግያን ኔን ያና ጋካናዉ ሾጫና። 23 ኔፐ ቦላና ነ ልክያን ደእያ ሳሉ ናሃሰ ብራታ ግዳናዋ፤ ነ ቢታይካ ብራታ ግዳናዋ። 24 መና ጎዳይ ነ ጋድያን ቡክያ እራ ልያነ ባና ከሳና፤ ኔን ጋድያፐ ያና ጋካናዉ፥ ባናይ ሳሉዋፐ ዱገ ቡካና። 25 “መና ጎዳይ ኔና ነ ሞርከቱዋን ጾንሳና፤ ኔን ኡንቱንታ ኦላናዉ እት ኦግያና ከሳና፤ ሽን ላፑን ኦግያና ነ ኡንቱንቱ ስንፐ ባቃታና። ቢታን ደእያ ካዉተ ኡባይ ነ ቦላ ጋኬዳዋ በኢደ፥ ያሻን ሻቢረታና። 26 ነ አሃይ ሳሉዋ ካፉዋ ኡባዉነ ባዙዋ ዶአዉ ቁማ ግዳና፤ ኡንቱንታ የደርስያባይካ ደኤና። 27 “መና ጎዳይ ኔና ሊ ባይና ግብጼ ማዱን፥ ክጻን፥ እላሁዋንነ ፑሱዋን ኔና ሀርግሳና። 28 መና ጎዳይ ኔና ጎሻን፥ ቆቀተንነ ዳጋማን ሾጫና። 29 ጋላሳ ሴታን ኔን ቆቂ ማን ታታፍያዋዳን ታታፋና፤ ነ ኦያባይ ኡባይ ነዉ ጊገናን እጻና። ነ ደኦ ላይ ኡባን ኡቁነታደነ ቦንቀታደ ደአና። ኔና ማድያ አሳካ ደማካ። 30 “ኔን ማጫ ናቶ ጊግሳና ሽን፥ ሀራይ እዞ ቦንቂደ አፋና። ጎልያ ኔን ኬጻና፤ ሽን አን ደአካ። ዎይንያ ነ ቶካና፤ ሽን አ አይፍያ ማካ። 31 ነ ቦራይ ነ ስንን ሹከታና፤ ሽን አ አሹዋ ማካ። ነ ሀሪ ኔፐ ላገቲደ አከታና፤ ሽን ነዉ ጉየ ስመና። ነ ዶርሳይ ነ ሞርክያዉ እመታና፤ ሄዋ አሻናዉ ኔና ማድያዌ ባዋ። 32 ነ አይፍያ ስንን ነ አቱማ ናናቱነ ማጫ ናናይ ሀራ ካዉተዉ እመታና፤ ኡንቱንቱ ስምና በአና ጋደ ጼልሽን፥ ነ አይፊ ጋልጃና፤ ሄዋ ድጋናዉ ነዉ አይ ዎልቃይነ ደኤና። 33 ነ ቢታ አይፍያነ ነ ዳቡሬዳዋ ኡባ ነ ኤረና አሳይ ማና፤ ነ ደኦ ኡባን ኡቁነቴዳዋነ ናቀቴዳዋ ግዳና። 34 ነ በእያ ኢታይ ኔና ጎሻና። 35 መና ጎዳይ ሊ ባይና ኢታ ማዱን ነ ጉልባታነ ነ ዎድርያ ሀርግሳና፤ የያ ገድያፐ ሁጲያ ጋካናዉ፥ ኔና ሄ ማዱን ሾጫና። 36 “መና ጎዳይ ኔናነ ነ ካትያ፥ ኔና ግድና፥ ነ ማይዛ አዎቱዋ ግድናካ ኤርቤና አሳ ጋደ አፋና። ሄዋን ኔን ምፐነ ሹቻፐ መቴዳ ሀራ ጾሳቶ ጎይናና። 37 መና ጎዳይ ኔና ላልያ ሀራ ካዉተቱዋ ኡባ ግዶን ፖራ ሀዋንቱዋ ጊደ፥ ቅሊጭያዋነ ካእያዋ ግዳናሳ። 38 “ኔን ዳሮ ካ ነ ሾይቃን ዘራና፤ ሽን ቦሊ ም ድግና፥ ጉ ካ ሺሻና። 39 ዎይንያ ቶካደ፥ አ ኦና፤ ሽን ጉጹኒ አ ም ድግና፥ አፐ አይነ ማጻካ፤ አጋደካ አፐ ኡሻካ። 40 ነ ቢታ ኡባን ዛይትያ ዎጋራይ ሞካና፤ ሽን አይፊ ቆቆፈት ክችና፥ ዎጋራ ዛይትያ ደማካ። 41 አቱማነ ማጫ ናናቱዋ ነ የላና፤ ሽን ኦላይ ኦሞድ አፍ ድግና፥ ኡንቱንቱ ኔናና ደእክኖ። 42 ነ ም ኡባነ ነ ቢታ አይፍያ ቦሊ ዉርሳና። 43 “ነ ግዶን ደእያ በቲ ነ ቦላ ቁ ቁ ጋና፤ ሽን ኔን ጉየ ያደ ዝቂ ዝቂ ጋና። 44 እ ነዉ ታልአናፐ አትና፥ ኔን አዉ ታልአካ፤ እ ሁጰ ግዳናዋ፤ ኔን ዱፈ ግዳናሳ። 45 “መና ጎዳዉ፥ ነ ጾሳዉ፥ አዛዘተናን እጼዳ ድራዉነ እ አዛዜዳ አዛዙዋነ ዎጋ ናገናን እጼዳ ድራዉ፥ ኔን ያና ጋካናዉ፥ ሀ ሸቃቱ ኡባይ ነ ቦላ ዎና፤ ኔና ኡንቱንቱ የደርሳና። 46 ሀ ሸቃቱ ነ ቦላንነ ነ ዛራቱ ቦላን መናዉ ማላታነ ማላልስያዋ ግዳናዋ። 47 ነዉ ሳአይ እንጀቴዳ ዎደ፥ መና ጎዳዉ፥ ነ ጾሳዉ፥ ናሸቻንነ ጋላታን ጎይናባካ። 48 ሄዋ ድራዉ፥ ኔና ኮሻን፥ ሳሙዋን፥ ካሉዋንነ መቱዋን ኡባባ ያደ፥ መና ጎዳይ ነ ቦላ የድያ ነ ሞርከቶ ሞደታና፤ መና ጎዳይ ኔና ይሳና ጋካናዉ፥ ነ ሞርግያን ብራታ ሞርገ ም ዋጻና። 49 “መና ጎዳይ ኔን ኡንቱንቱ ቃላ ኤረና ካዉተ አንኩ ፓልያዋዳን ኤሌልሲደ፥ ቢታ ጋጻፐ፥ ሃኩዋፐ ነ ቦላ አሀና። 50 ኡንቱንቱ ሀንቁዋ ሶምኡዋና ደእያዋንታ፤ ጭማ ቦንቼናዋንታ፤ ጉቶካ ቃረተናዋንታ። 51 ኔን ያና ጋካናዉ፥ ነ መህያ ማራነ፥ ነ ቢታ አይፍያ ማና። ኡንቱንቱ ኔን ያና ጋካናዉ፥ ነ ካ፥ ነ ዎይንያ ኤሳ፥ ነ ዛይትያ፥ ነ ሚዛነ ነ ዶርሳ ዉድያ ዉርሳና። 52 ነ ጋድያን ደእያ ኔን አማነትያ፥ አዱሳ፥ ምኖ ድርሳቱ ሙለሳና ኮለታና ጋካናዉ፥ ነ ካታማ ዩሹዋን ዶዲደ፥ ኔና ኡንኤና። መና ጎዳይ ነ ጾሳይ ነዉ እሜዳ ቢታ ኡባ ዩሹዋን ዶዲደ ኔና ኡንኤና። 53 “ነ ሞርከቱ ካታማ ዶዲደ ኔና ኡንኤያ ዎደ፥ ምያዋ ያደ፥ መና ጎዳይ ነ ጾሳይ ነዉ እሜዳ፥ ነ ኡሉዋ አይፍያ ግድያ፥ ነ አቱማ ናናቱነ ነ ማጫ ናናቱ አሹዋ ኔን ማና። 54 ነ ግዶን ሀራይ አቶ ካሰ ሱረተንነ አሽከተን ደኤዳ ግያ አስካ ባረ እሻዉ፥ ባረ ሲቅያ ማቻትዉነ ባረ የሌዳ ናናቶ ቃረተና። 55 ሞርከቱ ካታማ ዶዲደ ኡንኤዳዋፐ ደንዴዳዋን፥ ሀራባይ ማናዉ ባይና ድራዉ፥ ባረ ምያ ባረ ናናቱ አሹዋፐ ሀራዉ ኦስነ እመና። 56 ነ ግዶን ካሰ ሱረተንነ አሽከተን ደኣዱ ግያ፥ ባረ ዱረተፐ ደንዴዳዋን ሳኣ የናዉ ሻተትያ ማጫ ምሽራታካ፥ ባረ ሲቅያ አስናዉ ባረ አቱማነ ማጫ ናናቶ ቃረተናን፥ 57 አ ባረ የሌዳ ናኣና ዬዳ ጉየባ ባረ ሲቅያ አስናካ ባረ የሌዳ ናናቱዋካ ጋናን፥ ኡዘታደ ጌማን ባረካ ማድጋና። አያዉ ጎፐ፥ ሞርኪ አ ደእያ ካታማ ዶዲደ እዞ ኡንኤዳነ ቱጋዬዳ ድራዉ፥ እዝዉ ምያባይ ሀራባይ አያይነ ባዋ። 58 “ሀ ማጻፋን ጻፈቴዳ ህግያ ቃላቱዋ ኡባ ኔን ናጋና ዮፐ፥ መና ጎዳይ ነ ጾሳይ ማላልስያነ ያሽያ ሱን ቦንቼናን አጎፐ፥ 59 ነ ቦላነ ነ ዛርያ ኡባ ቦላ መና ጎዳይ ያሽያ ቦሻ፥ ስመና ባሻነ ሊ ባይና ኢታ ሀርግያ ነ ቦላ የዳና። 60 “ካሰ ግብጼ አሳ ቦላ በኣደ፥ ኔን ያዬዳ ግብጼ ሀርግያ ኡባ ዛሪደ፥ ነ ቦላ አሀና፤ ሄ ሀርጊ ኔና የደና። 61 ቃይ ሀ ህግያ ማጻፋን ጻፈትቤና ሀርገ ኡባነ ቦሻ ኡባ ነ ያና ጋካናዉ፥ መና ጎዳይ ነ ቦላ አሀና። 62 መና ጎዳ ህንተ ጾሳ ቃላ ስሰናን እጼዳ ድራዉ፥ ሳሉዋ ጾልንትያዳን ጮራቴዳ ህንተፐ ጉይ አታና። 63 መና ጎዳይ ህንተንቶ ሎኦባ ኦያ ዎደነ ህንተ ፓይዱዋ ጮራይያ ዎደ ዶሴዳዋዳን፥ ሀእ ህንተ ቦላን ባሻ አህያ ዎደካ ህንተና ላልያ ዎደካ ናሸታና፤ ህንተ ላታናዉ ብያ ቢታፐካ ሾደቲደ ያና። 64 “መና ጎዳይ ህንተና ቢታዉ ሀ ጋጻፐ ያ ጋጻ ጋካናዉ፥ ቢታ ኡባን ላላና። ሄዋን ህንተና ግድና፥ ዎይ ህንተ ማይዛ አዎቱ ኤርቤና፥ ሀራ ምነ ሹቻ ጾሳቶ ጎይናና። 65 ሄ ካዉተቱዋ ግዶን ህንተ ዎፓ ደምክታ፤ ህንተ ገድያ ጫማይ የያ ሳኣ ኬሻ ጋዲካ ህንተንቶ ደኤና። ሄዋን መና ጎዳይ ህንተንቶ መቶባ ቆፋ ጻላላን ኩሜዳ ሁጲያ፥ አሞ ጻላላን ዳቡሬዳ አይፍያነ ህዶታ ቃንጹዋን ኩሜዳ ዎዛና እማና። 66 ህንተ ደኡ ኡባይ ህርጋና ግዳናዋ፤ ጋላስነ ቃማ ሻቢርሳንነ ሀይቁዋ ያሻን ኡንኤቲደ ደአና። 67 ህንተ ዎዛናን ኩሜዳ ያሻፐነ ህንተ አይፊ በእያ ፓላፐ ደንዴዳዋን፥ ህንተ ዎንትያ ዎደ፥ ‘አዉደ ቃማንዴሻ’ ቃይ ቃምያ ዎደ፥ ‘አዉደ ዎንታንዴሻ’ ያጋና። 68 ታን ህንተና፥ ‘ላኤን ሀ ኦግያ ቢክታ’ ጌዳ ኦግያና መና ጎዳይ ህንተና ዛሪደ ማርካብያን ጉየ ግብጼ የዳና። ሄዋን ህንተ አይልያ ግዳናዉ፥ ህንተ ሞርከቶ ህንተና ዛልአናዉ ኮያና፤ ሽን ህንተና አይለያናዉካ ሻምያዋ ደምክታ” ያጌዳ።