አሞጻ 2

1 መና ጎዳይ ሀዋዳን ያጌ፤ “ሞኣባ ጋድያ አሳይ ዛር ዛሪደ ኦዳ ናጋራ ድራዉ፥ ታን ኡንቱንታ ሙረናን አግከ። አያዉ ጎፐ፥ ኡንቱንቱ ኤዶማ ጋድያ ካትያ መቀ ብድን ከሳና ጋካናዉ ጹጌድኖ። 2 ሄዋ ድራዉ፥ ታን ሞኣባ ጋድያን ታማ የዳና፤ ሄ ታማይ ቅርዮታ ካታማ ጌሶቱዋ ማና። ሞኣባ ጋድያ አሳይ ሻቢርሳ ግዶን፥ ኦላ ዋሱዋ ግዱዋንነ ማላካታ ፑኑዋ ግዶን ሀይቂ ዉራና። 3 ታን ሞኣባ ጋድያ ሞድያዋ ይሳና፤ ቃይ ካፓቱዋ ኡባካ አናና እትፐ ዎና” ያጌ መና ጎዳይ። 4 መና ጎዳይ ሀዋዳን ያጌ፤ “ይሁዳ ጋድያ አሳይ ዛር ዛሪደ ኦዳ ናጋራ ድራዉ፥ ታን ኡንቱንታ ሙረናን አግከ። አያዉ ጎፐ፥ ኡንቱንቱ መና ጎዳ ህግያ እጼድኖ፤ አ አዛዙዋካ ናግበይክኖ። ኡንቱንቱ አዎቱ ካሌዳ ዎርዶ ጾሳቱ ኡንቱንታካ ባለድኖ። 5 ሄዋ ድራዉ፥ ታን ይሁዳ ጋድያ ቦላ ታማ የዳና፤ ሄ ታማይ የሩሳላመ ጌሶቱዋ ማና” ያጌ። 6 መና ጎዳይ ሀዋዳን ያጌ፤ “እስራኤልያ አሳይ ዛር ዛሪደ ኦዳ ናጋራ ድራዉ፥ ታን ኡንቱንታ ሙረናን አግከ። አያዉ ጎፐ፥ ኡንቱንቱ ሚሻ አካና ድራዉ፥ ጽሉዋ ዛልኢኖ፤ ቃይ ጫማ አጩዋ አካና ግሻዉካ ህዬሳ ዛልኢኖ። 7 ማንቆቱዋ ጋድያ ባናን ኩንድሲደ፥ ኡንቱንቱ ሁጲያ የኖ፤ ናቀቴዳዋንቱ ፕርዳካ ጌላዪኖ። ቃይ አዉነ ናአይ ላኡ እት ምሽራቶ ዎሹምያዋን ታ ጌሻ ሱን ሎይ ቱንሲኖ። 8 ኡንቱንቱ አሳፐ አጮ ኦይቄዳ ማዩዋ ያርሽያ ሳኣን ኡባ ማታን ሂጺደ፥ አን ግሲኖ፤ ቃይ አሳፐ ማቃጮ ኦደ አኬዳ ዎይንያ ኤሳ ባረንቱ ጾሳ ጎልያን ኡሺኖ። 9 “ግዶፐነ፥ ዝጋዳን አዱቂደ፥ ዎላዳን ምኔዳ አሞረ ጋድያ አሳቱዋ ኡንቱንቱ ስንፐ ይሴዳዌ ታና። ታን ኡንቱንቶ ቦላ አይፍያናካ ጋርሳ ጻጱዋናካ ኡባ ይሳድ። 10 ታን ህንተና ግብጼ ጋድያፐ ከሳደ፥ ባዙዋን ኦይታሙ ላይ ካለድ፤ ቃይ አሞረቱ ቢታካ ህንተንቶ ላታ ኦደ እማድ። 11 “ህንተ አቱማ ናናቱ ግዶፐ ትምቢትያ ኦድያዋንታ፥ ህንተ ያላጋ አሳ ግዶፐካ ባረና ጾሳዉ ዱማዬዳ ናዝራዌቱዋ ደንድ። ህንተኖ፥ እስራኤልያ አሳቶ፥ ሀዌ ቱማ ግደኔ? ሀዋ ታን ጾሳይ ኦዳድ። 12 ሽን ህንተ ሄ ናዝራዌቱዋ ጫቁዋ ኮልሲደ፥ ዎይንያ ኤሳ ኡሼድታ፤ ትምቢትያ ኦድያዋንታካ፥ ‘ትምቢትያ ኦዶፕተ’ ያጊደ አዛዜድታ። 13 “በእተ፥ ካ ዳርሲደ ጫኔዳ ጋሪ መእያዋዳን፥ ታን ህንተና መንና። 14 ፓላ ዎጽያዌ ባቃቲደ ከስ አከና፤ ምኖ ዎልቃይ እጻና፤ ኦላንቻይካ ባረ ሸምፑዋ አሸና። 15 ዎንዳፍያን ዱክያዌ ባረ ሳኣን ኤቃናዉ ዳንዳየና፤ ገድያ ኤሱካ ከስ አከና፤ ፓራዉካ ባረ ሸምፑዋ አሸና። 16 ሄ ጋላስ ሀራይ አቶ ኦላንቻቱዋ ግዶን ሎይ ጻላንቻ ግያዋንቱካ ካሎ ጺራ ባቃታና” ያጌ መና ጎዳይ።