2 ጽሞቶሳ 4

1 ታን ኔና ጾሳ ስንንነ፥ ደኡዋን ደእያ አሳነ ሀይቄዳ አሳ ፕርዳናዉ ደእያ ክርስቶስ የሱሳ ስንን፥ ቃይ አ ዩሳንነ አ ካዉተን ኔና ዞራይ። 2 ቃላ ኦዳ። ዎዲ እንጀትና እንጀታና ይና፥ ምናደ ኦዳ። ዳሮ ዳንዳያን አሳ ታማርሳደ ሱርሳ፥ ሴራነ ዞራ። 3 አያዉ ጎፐ፥ አሳይ ቱሙ ትምርትያ ስሰናን እጽያ ዎዲ ያናዋ። ሽን አሳይ ባረንቱ አሙዋ ካሊደ፥ ስሳናዉ ናሸችያዋ ኦድያ ታማርስያዋንታ ጉጅ ጉጅ ሺሻና። 4 ኡንቱንቱ ቱሙ የዉዋ ስስያዋ አጊደ፥ ቶሳ ስሳናዉ ባረንቱ ሀይ ዎራ ዛራና። 5 ሽን ኔን ኡባባን ነ ሁጲያ ናጋናዉ በሴ። ዋይያ ዳንዳያ። ዎንጋላ ምሽራቹዋ ኦድያዌ ኦያ ኦሱዋ ኦ። ጾሳ ቆማዳን፥ ነ ኦያ ኦሱዋ ኡባ ፖላ። 6 ታና ግዶፐ፥ ታ ሱይ ጉኪደ ያርሸትያ ዎዲነ ቃይ ሀ ደኡዋ አጋደ ብያ ዎዲ ጋኬዳ። 7 ታን ሎኦ ባጽያ ባጸታድ፤ ዎ ዎጻደ ዉርሳድ፤ አማኑዋካ ናጋድ። 8 ስንፐ ታዉ ጽሎተ ካላቻይ ጊግ ኡቴዳ። ሄዋ ጽሎ ፕርዳ ፕርድያ ጎዳይ ሄ ጋላስ ታዉ እማና። ቃይ ክርስቶስ ቆንጫናዋ ዶስያ ኡባ ሳፐ አትን፥ ታ ጻላላሳ ግደና። 9 ታኮ ኤለካ ያናዉ ምና። 10 አያዉ ጎፐ፥ ዴማስ ሀ አላምያ ዶሲደ፥ ታና አጊደ፥ ተሰሎንቀ ግያ ካታማ ቤዳ። ቀርቂስ ጋላትያ ግያ ጋድያ ቢና፥ ቃይ ቲቶ ድልማጽያ ግያ ጋድያ ቤዳ። 11 ሉቃሳ ጻላላይ ታናና ደኤ። ማርቆስ ታና ኪታን ሎይ ማዳናዉ ዳንዳይያ ድራዉ፥ አ ደማደ ኔናና አካደ ያ። 12 ሽን ታን ትክቆሳ ኤፈሶና ግያ ካታማ ኪታድ። 13 ኔን ያደ፥ ጽሮኣዳ ግያ ካታማን ካርፖሳዋን ታን የጋደ ዬዳ ታ ጋብያነ ቃይ ማጻፋቱዋ ታዉ አካደ ያ። ሽን ዱማያደ ጋልባን ጻፈቴዳ ማጻፋቱዋ አያ ግዶፐነ፥ አከናን ዮፓ። 14 ብራታ ቆጽያ እስክንድር ታና ዳሮ ቆሄዳ፤ ጎዳይ አዉ አ ኦሱዋዳን ዛራና። 15 እ ኑን ኦድያዋ ሎይ ጳልቂያ ድራዉ፥ ኔን አፐ ኔና ናጋ። 16 ኮይሮ ታና ሞትያ ዎደ፥ ኡባይካ አጌዳዋፐ አትን፥ ታና ኦንነ ማድቤና። ጾሳይ ሄዋ ኡንቱንቶ ፓይዶፖ። 17 ሽን ታን ኩመን ኪታ አይሁዳ ግደና አሳይ ኡባይ ስሳናዉ ኦዳና ማላ፥ ጎዳይ ታ ማታን ኤቂደ፥ ታዉ ዎልቃ እሜዳ። ቃይ ጋሙዋ ዶናፐካ ታና አሼዳ። 18 ጎዳይ ታና ኢታባ ኡባፐ አሺደ፥ ባረ ሳሉዋ ካዉተ ሳሮተን አፋና፤ አዉ መ መናዉ ቦንቹ ግዶ። አመንእ። 19 ጵርስቂልዉ፥ አቂላስነ ሄነስፎሩ ሶይ አሳዉ ታ ሳሮታ ኦዳ። 20 ኤራስጾስ ቆሮንቶሳ ግያ ካታማን አቴዳ። ሽን ጽሮፊሞስ ሳከቴዳ ድራዉ፥ ምሊጸ ግያ ካታማን አ ዎድ። 21 ባልጉ ዎናፐ ካሰ ያናዉ ምና። ኤዉቡሉስ፥ ጱዴስ፥ ሊኖስነ ቅላዉደ ቃይ ሀራ እሻቱ ኡባይካ ኔና ሳሮ ሳሮ ጊኖ። 22 ጎዳይ ነ አያናና ግዶ። አ ኬካተይ ህንተናና ኡባና ግዶ። አመንእ።