2 ካታቱዋ 1

1 አካብ ሀይቄዳዋፐ ጉይያን፥ ሞኣበ ቢታ አሳይ እስራኤልያ ቦላ ደንዴዳ። 2 ሄ ዎደ ካቲ አካዝያስ ሳማርያ ካታማን ቦላ ፖቅያ ባራንዳፐ ኩንዲደ ደሸቴዳ። ሄዋ ድራዉ አሳቱዋ፥ “ቢተ፤ ታን ሀ ደሸፐ ፓጻነንቶ፥ አጋነንቶ፥ ኤቅሮና ካታማ ጾሳ ብኤል-ዘቡላ አነ ታዉ ኦችተ” ያጊደ ኪቴዳ። 3 ሽን መና ጎዳ ኪታንቻይ ትስቢያ ኤላሳ ሀዋዳን ያጌዳ፤ “ባ፤ ፑደ ባደ፥ ሳማርያ ካቲ ኪቴዳ አሳቱዋና ጋከታ። ኡንቱንታ፥ ‘ህንተ ኤቅሮና ካታማ ጾሳ ብኤል-ዘቡላ ኦቻናዉ ቤዳዌ፥ እስራኤልያን ጾሳይ ይኔየ?’ ያጋ። 4 ሄዋ ድራዉ፥ መና ጎዳይ ሀዋዳን ያጌ፤ ‘ካትያዉ፥ ኔን ሀይቃናፐ አትና፥ ሀ ግሴዳ ግሱዋፐ ደንዳካ’ ያጌ” ያጌዳ። ኤላስ ቢደ፥ ኡንቱንቶ ኦዴዳ። 5 ኪቴዳ አሳቱ ካትያኮ ጉየ ስምና፥ እ ኡንቱንታ፥ “አያዉ ስሜድቴ?” ያጊደ ኦቼዳ። 6 ሽን ኡንቱንቱ አዉ ሀዋዳን ያጊደ ዛሬድኖ፥ “እት ብታኒ ኑናና ጋከታናዉ ዪደ፥ ህንተና ኪቴዳ ካትያኮ ስሚደ ቢተ።” አዉ ሀዋዳን ያግተ “መና ጎዳይ ኔና፥ ‘ኤቅሮና ጾሳ ብኤል-ዘቡላ ኦሽሳናዉ ኔን አሳ ኪትያዌ፥ እስራኤልያን ጾስ ይኔየ? ሄዋ ድራዉ፥ ኔን ሀይቃናፐ አትና፥ ሀ ግሴዳ ግሱዋፐ ደንዳካ ያጌ’ ያግተ ያጌዳ” ያጌድኖ። 7 ካቲ ኡንቱንታ፥ “ህንተንቱና ጋከታናዉ ዪደ፥ ሀ የዉዋ ህንተንቶ ኦዴዳ ብታኒ አይ ማላ አሴ?” ያጊደ ኦቼዳ። 8 ኡንቱንቱ፥ “መህያ እስክያን ዳደቴዳ ካባ ማዪደ፥ ባረ ጼሳን ዳፉዋ ዳንጬ” ያጊደ ዛሬድኖ። እ፥ “ሄዌ ትስቢያ ኤላሳ” ያጌዳ። 9 ሄዋፐ ጉይያን፥ ካቲ እሻታሙዋ ካፑዋ አ እሻታሙ ኦላንቻቱዋና ኪቴዳ። ካፑ ደርያ ሁጲያን ኡቴዳ ኤላሳኮ ፑደ ከሲደ፥ “ጾሳ አሳዉ፥ ካቲ ኔና፥ ‘ዱገ ዎ’ ያጌ” ያጌዳ። 10 ሽን ኤላስ እሻታሙዋ ካፖ፥ “ታን ጾሳ አሳ ግዶፐ፥ ታማይ ሳሉዋፐ ዎደ፥ ኔናነ ነ እሻታማቱዋነ ሞ” ያጊደ ዛሬዳ። ታማይ ሳሉዋፐ ዎደ፥ እሻታሙዋ ካፑዋነ አ እሻታማቱዋነ ሜዳ። 11 ቃይ ካቲ ሀራ እሻታሙ ኦላንቻቱዋና ሀራ እሻታሙዋ ካፑዋ ኤላሳኮ ኪቴዳ። እሻታሙዋ ካፑ ኤላሳ፥ “ጾሳ አሳዉ፥ ካቲ ኔና፥ ኤለካ ዱገ ዎ ያጌ” ያጌዳ። 12 ኤላስ አዉ፥ “ታን ጾሳ አሳ ግዶፐ፥ ታማይ ሳሉዋፐ ዎደ፥ ኔናነ ነ እሻታማቱዋነ ሞ” ያጌዳ። ጾሳ ታማይ ሳሉዋፐ ዎደ፥ እሻታሙዋ ካፑዋነ አ እሻታማቱዋነ ሜዳ። 13 ቃይካ ካቲ እሻታሙ ኦላንቻቱዋና ሀራ ሄዘን እሻታሙዋ ካፑዋ ኪቴዳ። እሻታሙዋ ካፑ ፑደ ከሲደ፥ ኤላሳ ስንን ጉልባቲደ፥ “ጾሳ አሳዉ፥ ሀያና፥ ታናነ ታናና ደእያ ሀ እሻታሙ አሳቱዋ ማራ! ኑ ሸምፑዋካ ሀይቁዋፐ አሻ! 14 ታማይ ሳሉዋፐ ዎደ፥ ካሰ እሻታማቱዋ ካፑዋ አሳነ ኡንቱንታ እሻታማቱዋ ኡባነ ሜዳ። ሽን ሀእ ታና ማራ!” ያጊደ ዎሴዳ። 15 መና ጎዳ ኪታንቻይ ኤላሳዉ፥ “ያዮፓ! አናና ዱገ ዎ” ያጌዳ። ኤላስ ደንዲደ፥ አናና ዱገ ዎዳ። 16 እ ካትያዉ፥ “መና ጎዳይ ኔና ሀዋዳን ያጌ፤ ‘ነዉ ኦቻናዉ እስራኤልያን ጾስ ይኔ፥ ኔን ኤቅሮና ጾሳ ብኤል-ዘቡላ ኦቻናዉ አሳ ኪቴዳዌ? ኔን ሀዋ ኦዳ ድራዉ፥ ሀይቃና! ነ ግሴዳ ግሱዋፐካ ደንዳካ’ ያጌ” ያጌዳ። 17 ኤላስ ሃሳዬዳ መና ጎዳ ቃላዳንካ አካዝያስ ሀይቄዳ፤ አካዝያሳዉ አቱማ ናእ ባይና ድራዉ፥ አ እሻይ ዮራመ አ ኮታን ካተቴዳ፤ ሄዌ ሀኔዳዌ ዮሳፌጻ ናአይ ዮራመ ይሁዳን ካዉቴዳ ላኤን ላይና። 18 አካዝያስ ሀኔዳ ሀራባይነ እ ኦዳባይ ኡባይ እስራኤልያ ካተቱ ታርክያ ማጻፋን ጻፈት ኡቴዳ።