2 ቆሮንቶሳ 4

1 ስም ጾሳይ ኑዉ ሀ ኦሱዋ ባረ ማሮተን ኦናዳን እሜዳ ድራዉ፥ ኑን ሳለቶኮ። 2 ኑን ጌማን ኦያ ዬላይያ ኦሱዋ ኡባ አጎይተ፤ ቃይ ገንያ ኦሱዋካ ኦኮ፤ ዎይ ጾሳ ቃላ ዎርዱዋና ዋላኮኮ። ሄዋዳንካ፥ ቱሙዋ ቆንጭያን ሃሳዪደ፥ ጾሳ ስንን ሱረ ዎዛናዉ ኑና ሺሾይተ። 3 ኑን ኦድያ ዎንጋላ ምሽራቹ ጌሜዳዋ ግዶፐካ፥ ይያ አሳቱዋ ጻላላዉ ጌሜዳ። 4 ሀ ሳኣ ጾሳይ አማነና አሳቱዋ ቆፋ ጆልሴዳ፤ ክርስቶሳ ቦንቹዋ፥ ዎንጋላ ምሽራቹዋ ፖኡዋ ባረንቶ ፖእያዋ፥ ጾሳ ማላትያዋ ኡንቱንቱ በኤና ማላ፥ ኡንቱንታ ድጌዳ። 5 አያዉ ጎፐ፥ የሱስ ክርስቶስ ጎዳ ግድያዋነ አ ድራዉ ኑን ኑ ሁጲያን ህንተንቶ ቆማ ግድያዋ ኦደቶፐ አትን፥ ኑባ ኦዶኮ። 6 አያዉ ጎፐ፥ “ማፐ ፖኡ ፖአና” ጌዳ ጾሳይ ኑ ዎዛናን ባረ ፖኡዋ ፖእሴዳ፤ ቃይ እ ባረ ቦንቾ ኤራተ ፖኡዋ ክርስቶሳ ስንን ፖእያዋ ኑዉ እማናዉ ፖእሴዳ። 7 ሽን ኡባፐ አያ ዎልቃይ ጾሳዋፐ አትን፥ ኑሳ ግደናዋ በሳናዉ ኑዉ ሀ ምንጃይ ኡርቃፐ መቴዳ ሚሻ ግዴዳ ኑ ግዶን ደኤ። 8 ኑን ኡባ ባጋናካ ኡንኤቴዶ፤ ሽን መኤረትበይኮ፤ ቃይ እት እት ዎደ ስቶ፤ ሽን ኑ ኡባናካ አግበይኮ። 9 ኑን የደርሰቴዶ፤ ሽን ጾሳይ ኑና ኦልቤና፤ ቃይ ኑ ሞርከቱ ኑና ኦል አጌድኖ፤ ሽን ኑን ይበይኮ። 10 ቃይ የሱሳ ደኡ ኑ አሳተን ቤታና ማላ፥ ኑን ኡባ ዎደ አ ሀይቁዋ ኑ አሳተን ቶክ ዩዬቶ። 11 አያዉ ጎፐ፥ ሀይቂያ ኑ አሳተ ቦላ የሱሳ ደኡ ቤታና ማላ፥ ፓጻ ደእያ ኑን አ ድራዉ፥ ኡባ ዎደ ሀይቄቶ። 12 ሄዋ ድራዉ፥ ሀይቁ ኑ ግዶን ኦ፤ ሽን ደኡ ቃይ ህንተ ግዶን ኦ። 13 ጾሳ ማጻፋይ፥ “ታን አማኔዳ ድራዉ ሃሳያድ” ያጌ፤ ሄ አማኑዋ አያናይ ኑዉካ ደእያ ድራዉ፥ ኑንካ አማኔቶ፤ ሄዋ ድራዉ፥ ሃሳዬቶ። 14 ጾሳይ፥ ጎዳ የሱሳ ሀይቁዋፐ ደንዳዌ፥ ኑናካ ቃይ የሱሳና ሀይቁዋፐ ደንደ፥ ህንተናና እትፐ ባረ ስን ሺሻናዋ ኤሬቶ። 15 ሀዌ ኡባይ ህንተ ድራሳ፤ ጾሳ አ ኬካተይ ዳሮ አሳ ጋክያ ዎደ፥ አሳይ ጾሳ ቦንቾ ዳሮ ጋላታ እማና። 16 ሄዋ ድራዉ፥ ኑን ሳለቶኮ፤ ኑዉ ሀራይ አቶ፥ ቦላ ባጋ አሳተይ ዎቂንቶካ፥ ጋርሳ ባጋ አሳተይ ጋላሳን ጋላሳን ኦራጼ። 17 አያዉ ጎፐ፥ ሀእዉ ዋየትያ ሀ ጉ ዋዪ፥ ኡባፐ ሎይ ዳርያ መና ቦንቹዋ ኑዉ ቤትሳና። 18 ኑን ቤተናዋ ጼሌቶፐ አትን፥ ቤትያዋ ጼሎኮ፤ አያዉ ጎፐ፥ ቤትያባይ ሀእሳ፤ ሽን ቤተናዌ መናዉ ደእያዋ።