2 ኦዱዋ 28

1 አካዝ ካተትያ ዎደ፥ ላይይ አዉ ላታማ፤ እ የሩሳላመን ታማነ ኡሱፑን ላይ ካተቴዳ። አካዝ ባረ ማይዛ አዉ ዳዊተ ሱረባ ኦዳዋዳን፥ መና ጎዳ ስንን እ ሱረባ ኦቤና፤ 2 እ ካሰ ደኤዳ እስራኤልያ ካተቱዋ ኦግያን ሀመቴዳ። ባኣላዉ ጎይናናዳን ናሃስያ ሲልሲደ፥ ምስልያ መዳ። 3 ቃይ ህኖማ ዛንጋራን እጻና ጩዋዬዳ፤ መና ጎዳይ እስራኤልያ አሳ ስንፐ ላጊደ ከሴዳ አሳቱዋ ደኡዋ ዎጋ፥ ሄ ሸነይያዋ ቁሊደ፥ ባረ አቱማ ናና ታማን ጹጊደ፥ ኤቃዉ ያርሼዳ። 4 አካዝ አሳይ ጎይንያ ቃ ግሹዋን፥ ደረቱዋ ሁጲያንነ ዳሻ ም ኡባ ጋርሳን ያርሹዋ ያርሼዳነ እጻና ጩዋዬዳ። 5 ሄዋ ድራዉ፥ መና ጎዳይ አ ጾሳይ አ ሶርያ ካትያ ኩሽያን አ እሜዳ። ኡንቱንቱ አ ጾኒደ፥ አ አሳፐ ዳሮ አሳ ኦሞዲደ፥ ዳማስቆ አፌድኖ። ቃይካ ጾሳይ አ እስራኤልያ ካትያ ኩሽያዉ አ እምና፥ ካቲ ኢታ ሾቻ ሾጬዳ። 6 ይሁዳ አሳይ መና ጎዳ ባረንቱ ማይዛ አዎቱዋ ጾሳ አጌዳ ድራዉ፥ ራማልያ ናአይ ፓቁህ ይሁዳ ኦላንቻቱዋፐ ጼታነ ላታሙ ሻአ ምኖ አሳቱዋ እት ጋላስ ዎዳ። 7 ኤፍሬማ ዛርያ ግድያ ምኖ ኦላንቻይ ዚክር ካትያ ናኣ ማእሴያ፥ ካትያ ጎለዉ አዎትያ አዝርቃማነ ካትያ ካሊደ ደእያ ኤልቃና ዎዳ። 8 እስራኤልያ አሳይ ባረንቱ ዳባቱዋፐ ላኡ ጼቱ ሻአ ማጫ አሳ፥ አቱማ ናናነ ማጫ ናና ኦሞዴድኖ፤ ቃይ ኡንቱንቱ ሎይ ዳሮ ኦሞዱዋ አኪደ፥ ሳማርያ አፌድኖ። 9 መና ጎዳ ሱንን ትምቢትያ ኦድያ ኦዴዳ ግያ እት ብታኒ ሳማርያን ደኤ። ኦዴድ ሳማርያ ይያ ኦላንቻቱዋና ጋከታናዉ ከሲደ፥ ሀዋዳን ያጌዳ፤ “በእተ፥ መና ጎዳይ፥ ህንተንቱ አዎቱዋ ጾሳይ ይሁዳ ሀንቀቴዳ ድራዉ፥ ህንተንቱ ኩሽያን አ እሜዳ። ሽን ህንተንቱካ ሳሉዋ ጋኬዳ ሀንቁዋን ኡንቱንታ ሲፌድታ። 10 ሀእካ ይሁዳ አሳይነ የሩሳላመ አሳይ ህንተንቶ ማጫነ አቱማ አይልያ ግዲደ፥ ሞደታናዳን ቆፒታ። ህንተካ ኡንቱንቱዋዳን ሀኒደ፥ መና ጎዳ ህንተንቱ ጾሳ ናቄድታ ግድክቴ? 11 ሄዋ ድራዉ፥ ሀእ ህንተንቱ ታን ግያዋ ስስተ። መና ጎዳ ሀንቁ ህንተንቱ ቦላ ዎዳ ድራዉ፥ ህንተንቱ ኦሞዲደ ቃቼዳ ህንተንቱ ዳቦቱዋ የዲሽተ” ያጌዳ። 12 ሄዋፐ ጉይያን፥ ኤፍሬማ ዛራቱዋ ካፓቱዋፐ ኦይዳቱ፥ ዮሀናና ናአይ አዛርያስ፥ ማሽለሞታ ናአይ በረኪ፥ ሻሉማ ናአይ ይህዝቀነ ሀድላያ ናአይ አማስ ኦላፐ ስሜዳዋንቱ ቦላ ደንዴድኖ። 13 ሄዋፐ፥ “ሄ ኦሞደቴዳ አሳቱዋ ህንተንቱ ሀዋ አሆፐ፥ ካሰ ኑን መና ጎዳ ቦላ ኦዳ ናጋራነ ናቁዋ ቦላ ሀራ ናቁዋ ጉጂታ። ኑ ናቁ ካሰካ ዳር ኡቴዳ ድራዉ፥ እስራኤልያ ቦላ ጾሳ ሀንቁ ዎዳ” ያጌድኖ። 14 ሄዋ ድራዉ፥ ኦላንቻቱ ኦሞደቴዳ አሳቱዋነ ኦሞደቴዳ ሚሻ ካፓቱ ስንንነ ኩመን ሽቁዋ ስንን ሼድኖ። 15 ሄዋፐ ጉይያን፥ ሱንይ ሀዋፐ ቆሞና ጻፈቴዳ አሳቱ ደንድ ኤቂደ፥ ኦሞደቴዳ አሳቱዋ አኬድኖ። ኡንቱንቱ ግዶን ካሎ ደእያዋንታ ኦሞደቴዳዋፐ ማይዜድኖ፤ ኡንቱንቱ ሄ አሳቶ ማዩዋነ ጫማ እሜድኖ። ቃይ ኡንቱንቱ ምዜድኖነ ኡሸድኖ፤ ኡንቱንቱ ማዱካ ዛይትያ ኦኬድኖ። ኡንቱንቱ ግዶን ዳቡሬዳ ኡባቱዋ ሀርያ ቶግሲደ፥ ኡንቱንቱ እሻቱዋኮ፥ ዛምባይ ደእያ ያርኮ ካታማ አሄድኖ። ሄዋፐ ጉይያን፥ ኡንቱንቱ ሳማርያ ስሜድኖ። 16 ሄ ዎደ ካቲ አካዝ አሶረ ካቲ ባረና ማዳናዳን ኪታ ኪቴዳ። 17 አያዉ ጎፐ፥ ኤዶማ አሳቱ ላኤንዋ ይሁዳ ቦላ ማዪደ፥ ዳሮ አሳ ኦሞዲደ አፌድኖ። 18 ፕልስጼማ አሳቱ ቃይ ይሁዳ ባርጉዋነ ኔጌባ ዎራን ደእያ ካታማቱዋ ኦለቲደ ቤት-ሸመሻ፥ አያሎና፥ ጋደሮታ፥ ሶኮ፥ ትምና፥ ጊምዞነ ኡንቱንቱ ዩሹዋን ደእያ ሞቱዋ ማይ ኦይቂደ፥ ያን ደኤድኖ። 19 ይሁዳ ካቲ አካዝ ይሁዳ አሳ ናጋራ ኦስሴዳ ግሻዉነ መና ጎዳዉ አማነትቤና ድራዉ፥ መና ጎዳይ ይሁዳ ካዉሼዳ። 20 ሄዋ ድራዉ፥ አሶረ ካቲ ትግላት-ፓለሴር አካዛኮ ዪደ፥ አ ቱጋዬዳፐ አትና ማድቤና። 21 አካዝ መና ጎዳ ጌሻ ጎልያፐ፥ ካትያ ጎልያፐነ አሳ ካፓቱዋፐ ዳሮባ አኪደ፥ አሶረ ካትያዉ እሜዳ። ሽን ሄዋ ኦዳዌካ አ አይነ ጎእቤና። 22 ካቲ አካዝ ባረ ሁጲያዉ ባረ ቱጋ ዎደ መና ጎዳዉ አማነተና ሀኖታ ካሰዋፐ ጉጅ ጉጂደ ቤዳ። 23 ባረና ጾኔዳ ዳማስቆ ጾሳቶ ያርሺደ፥ “ሶርያ ካተቱዋ ጾሳቱ ኡንቱንቱ ማዴዳ ድራዉ፥ ታናካ ኡንቱንቱ ማዳናዳን ታን ኡንቱንቶ ያርሻና” ያጌዳ። ሽን ሄ ጾሳቱ አስነ እስራኤልያ አሳ ኡባዉ ባሻ አሄድኖ። 24 አካዝ መና ጎዳ ጌሻ ጎልያ ሻሉዋ ኡባ እት ሳኣ ሺሺደ ክንቼሬዳ። ጾሳ ጌሻ ጎልያ ፐንገቱዋ ጎርዴዳ። ያቲደ የሩሳላመን ኡባ ሳን ባረዉ ያርሽያ ሳኣ ኤሴዳ። 25 አካዝ ሀራ ጾሳቶ እጻና ጩዋያናዉ ይሁዳን ደእያ ካታማቱዋ ኡባን ጎይንያ ቃ ሳኣ መዳ። ያቲደ መና ጎዳ ባረ አዎቱዋ ጾሳ ሀንቀዳ። 26 አካዝ ሀኔዳ ሀራባይነ እ ኦዳባይ ኡባይ ኮይሮፐ ዉርሰ ጋካናዉ ይሁዳ ካተቱነ እስራኤልያ ካተቱዋ ታርክያ ማጻፋን ጻፈት ኡቴዳ። 27 አካዝ ሀይቂደ፥ ባረ ማይዛን ጋከቴዳ። የሩሳላመ ካታማን አ ሞጌድኖ፤ ሽን እስራኤልያ ካተቱዋ ማካናን ሞግበይክኖ። አ ሳኣን አ ናአይ ህዝቂያሰ ካተቴዳ።