Yontu 8
SIM1 Tɑfiiti yontu nti pɑ yookinɑ Kɑtɩ nyə́mɑ sɑŋkʋ nɑ tə wɛ yonyoolɑɑ nyʋɣʋ tʋ yontunɑɑ tɑɑ tɔɣɔlɔ. 2 Hɑɩ, Ɩsɔ Tɑcɑɑ, nyɑ́ hətɛ ɩ́ yɑɑ tɛtʋ tənɑ tɑɑ. Nɑ mɑ́ sɑŋ nyɑ́ teu mpi pə kəlɑ ɩsɔtɑɑ nyəm tɔ. 3 Ahʋlʋmnɑɑ nɑ pəcəncələm mɑɣɑmɑɣɑ nɑ́ sɑŋɩ-ŋ. Nɑ pə́ wɛ ɩsɩɩ koluŋɑ ɩcɑtɛ kɛ n ŋmɑwɑ nɑ ń cɔɔsɩ nyɑ́ kolontunɑɑ, nɑ ń təkəɣɩ nyɑ́ tɔɔ kʋllɑɑ nɔɔsɩ. 4 Sɑɑ wei mɑ nyənəɣɩ nyɑ́ ɩsɔtɔnʋɣʋ ŋku n ŋmɑwɑ nɑ ɩsɔtʋ nɑ ɩsɔtʋlʋŋɑsɩ nsi n sɩɩ sɩ lonɑ tɑɑ tɔ. 5 Ɩlɛ mɑ pɔɔsəɣɩ mɑ tɩ sɩ: Yʋlʋ kɛ́ we nɑ ń tɔɔsəɣɩ ɩ tɔm? Yɑɑ yʋlʋ pəyɑɣɑ tɩɩ kɛ́ we nɑ ń pɑɑsəɣənɑ-kɛ? 6 N lɑpɑ-ɩ kɛ́ nɑ ɩ́ sɛkɩ-ŋ pəcɔ, nɑ ń tʋ-ɩ teeli nɑ ń kʋsɩ ɩ nyʋɣʋ. 7 Nyɑ́ tʋnɑ-ɩ sɩ ɩ́ ŋmɑkəlɩ wontu nti n lɑpənɑ nyɑ́ niŋ tɔ nɑ ń tʋ pə tənɑɣɑ ɩ nɔɔhɛɛ tɛɛ. 8 Pə kpɑɣɑʋ nɑɑŋ nɑ heeŋ nɑ pə́ŋ nɑ pə kpɛŋnɑ tɑɑlɛ wontu. 9 Nɑ sumɑsɩ nɑ tiinɑ nɑ teŋku tɑɑ nyəm tənɑ tɔ. 10 Hɑɩ, Ɩsɔ Tɑcɑɑ, nyɑ́ hətɛ yɑɑwɑ tɛtʋ tənɑ tɑɑ kɛ́.