Yontu 145
SIM1 Tɑfiiti sɑmtʋ Yontu. Hɑɩ, mɑɑ sɑ mɑ Ɩsɔ, nyɑɣɑlɛ mɑ wulɑʋ. Mɑ yɔɣɔtəɣɩ nyɑ́ hətɛ tɔm kɛ tɑm tɔɔ. 2 Pɑɑ kʋyɑkʋ ŋkuɣu mɑɑ sɑŋɩ-ŋ, nɑ mɑ́ pʋɣʋləɣɩ nyɑ́ hətɛ kɛ tɑm tɔɔ. 3 Tɑcɑɑ Nyɑɣɑlɛ sɔsɔ nɑ ń mʋnɑ sɑmtʋ, nyɑ́ sɔsɔɔntʋ fɛɩ tənɑɣɑ. 4 Pɑɑ lʋlʋɣʋ looŋɑ ŋkɑ kɑ́ pʋɣʋləɣɩ nyɑ́ təmɑ nɑ kɑ́ kpɑɑləɣɩ nyɑ́ kookɑlənɑɑ. 5 Mɑɑ yɔɣɔtɩ nyɑ́ sɔsɔɔntʋ nɑ nyɑ́ teu sɔsɔɔm tɔm nɑ mɑ́ yooki nyɑ́ sɔsɔɔntʋ yontu. 6 Pɑɑ yɔɣɔtɩ nyɑ́ toŋ sɔsɔɔŋ tɔm, nɑ mɑ́ɑ́ kɛɛsɩ nyɑ́ sɔsɔɔntʋ tɔm. 7 Pɑɑ tɔɔsɩ nyɑ́ kʋpɑntʋ sɔsɔɔntʋ tɔm, nɑ pɑ́ yɔɣɔtəɣɩ nyɑ́ siɣisuɣu tɔm nɑ kɑwilitɑɣɑ. 8 Tɑcɑɑ n kɛ́ pɛɛlɛɛ tʋ kɛ́, nɑ pətɔɔtəlɛ tʋ. Nn mʋɣɩ pɑ́ɑ́nɑ́ kɛ lɔŋ, pə́cɔ nyɑ́ kʋpɑntʋ tɔɔwɑ. 9 Tɑcɑɑ n lɑkɩ kʋpɑntʋ kɛ yəlɑɑ tənɑɣɑ, nɑ ń wɛnɑ nyɑ́ kʋŋmɑŋmɑm tənɑ pətɔɔtəlɛ. 10 Hɑɩ, Tɑcɑɑ, nyɑ́ təmɑ tənɑ kɑ́ sɑ-ŋ kɛ́, nɑ nyɑ́ tɑmpɑnɑ təŋlɑɑ nɑ́ɑ́ sɛɛ-ŋ. 11 Pɑɑ yɔɣɔtɩ nyɑ́ kɑwulɑɣɑ teu tɔm, nɑ pɑ́ kpɑɑlɩ nyɑ́ toŋ tɔm. 12 Nɑ pɑ́ hʋlənɑ yʋlʋ piyɑ kɛ nyɑ́ toŋ nɑ nyɑ́ kɑwulɑɣɑ teeli sɔsɔ tɔm. 13 N tɔkɩ nyɑ́ kɑwulɑɣɑ kɛ tɑm tɔɔ kɛ́, nɑ nyɑ́ ŋmɑkəlʋɣʋ nɑ́ɑ́ wɛ pɑɑ pəlee. Tɑcɑɑ n tɔkəɣɩ nyɑ́ nɔɔsɩ sɩɩʋ kɛ teu kɛ́. Nyɑ́ kʋlɑpʋtʋ tɑɑ kɛ́ nyɑ́ kʋpɑntʋ nɑɑkənɑ. 14 Tɑcɑɑ n teŋ hotilɑɑ kɛ́, nɑ ń siɣisiɣi mpɑ pɑ pɑmɑ tɔ. 15 Nyɑɣɑ yəlɑɑ tənɑ tekiɣi nɑ ń hɑɑkɩ-wɛɣɛ tɔɣɔnɑɣɑ kɛ pə wɑɑtʋ. 16 Nyɑ́ kuliɣinɑ nyɑ́ niŋ, nɑ ń cɛləɣɩ weesiŋ nyə́mɑ kɛ pɑ kʋnyɩɩləm. 17 Tɑcɑɑ n siɣisɑ nyɑ́ kʋlɑpəlɛ tənɑ tɑɑ kɛ́, nɑ ń kɛ́ pɛɛlɛɛ tʋ kɛ nyɑ́ təmɑ tənɑ tɑɑ. 18 Tɑcɑɑ n wɛ mpɑ pɑ yɑɑkɩ-ŋ nɑ ɩsəlɛ kʋsɛɛmlɛ tɔ pɑ kiŋ kɛ́. 19 Nɑ ń lɑkɩ mpɑ pɑ nyɑŋnɑ-ŋ tɔ pɑ kʋsɔɔləm. N nɩɩkɩ pɑ wulɑ kɛ́, nɑ ń yɑkɩ-wɛ. 20 Tɑcɑɑ n pɑɑsəɣənɑ mpɑ pɑ sɔɔlɑ-ŋ tɔɣɔ, nɑ n wɑkələɣɩ ɑsɑɣɑɑ tənɑ. 21 Mɑ nɔɣɔ ɩ́ yoo Tɑcɑɑ nyɑ́ sɑmtʋ tɔm nɑ pɑɑ yʋlʋ wei ɩ́ sɑŋ nyɑ́ hətɛ nɑŋŋ nyəntɛ kɛ pɑɑ kʋyɑkʋ ŋkuɣu tɑm tɔɔ.