Isaías 32

1 Be dakmar. Rey-wargwen innikigwadba yar-seoed, degi, dummagan-neggwebur-semaladi, napiragwadba negsemaloed. 2 Dummagan-neggwebur-semaladi, burwa-irwa dulemar-odukueyobi, dulemarga gumaloed. Burwa-dummagan-noed-irwa dulemar-odukueyobi, ega gumaloed. Neg-dinnagwadba dian-maidaeyobi, ega gumaloed. Nega-dulesulidganba akwa-dummad-negsichi-imaksidaeyobi, ega gumaloed. 3 Bela-belad nue-nakuledii gumaloed, nue-bogimakar dulemar-sunmaked-itodii gumaloed. 4 Nue-itoakwaa ibmar-imake gumaloed. Nuekwa-sunmake, magar-nue-neg-itoge gumaloed. 5 Dulemala, dule-binsaedsulidaed dule-nuga-nikadye bar biosurmalad. Gadi-dule-yamogedi, sae-dakledoed. 6 Ar dule-binsaedsulidaedi, binsaedsuli sunmaked, yogasaar sunmaked. Igar-isganaginbi binsadidaed, igar-isganabi imakdidaed. Bab-Jehováʼgi gakansaar sunmakdidaed. Dule-masgunbigudiid ogunbidasulid, dule-ukudmaada-itodiid ogobbidasulid. 7 Gadi-dule-yamogedi, dule-yamogedgi alamakdidaed, igar-isgana-imakedgi alamakdidaed, e-gakansaedgi dule-wilemalad-wiodidaed. Dule-gakansaedi, dule-ibmarbina-sogdiid ega igar-naboye-gordidamaladga, gakansadidaed. 8 Ar dule-nuga-nikaddi, degisulid. Igar-nueganbi imakdidaed, e-igar-nuegan-imakedba e-nug dunguoed. 9 Omegan-gwen-bai-itosurmalad, ¡be nue an-itomar! Bunamala-gwen-bai-binsadisurmalad, an bemarga-ibmar-sogoedi nue bogimakar be an-itomalo. 10 Emide, bemar bela nueganbi-bukwa daklemalad, birgagwensega bemar, dobedba-wawanmakdemaloed. Ar ade, uva-sanmar bar welegosulid, ibmar-gwagmar bar welegosulid. 11 Omegan-gwen-bai-itosurmalad, ¡be nue dobee itomarsun! Bemar-baisur-itodimalad, ¡dobedba be wawanmakmarsun! We-mor be yoimalad esumarsun, wile-itoged-mor be yomarsun. 12 Nainu-yeerdaklege-naidga, degi, uva-nainu-nuegan-naidga, be bukib-itogedba binasgar be bibyomarsun. 13 Degine, an-dulamar-e-yar ikomar-yaisulidga gudoed, gagan-ikobimalad-yaisulidga gudoed. Deginbali, bela neg-yagi weligwar-gudimaladga, neggweburgi ibabi-dakdimaladga be wile-itomarsun. 14 Ar reynegmar olloo melledoed, dulemar-neggwebur bela olloo sigoed. Reyneg, degi, neg-gandikmalad, akwa-dummagan-ollogan-bukwayobi degisadegu bukuoed. Sapur-moli-uayasuid-obunnoged-negga guoed, sibadmar-mas-maed-negga guoed. 15 Geb Bab-Dummad-Burba anmargi aidenonikoed, nega-dulesulidi, napa-nuedga gudoed, napa-nuedi, nainu-nued-daklege nadoed. 16 Degisoggu, bela neggweburmar-ilibali, igar-napiramalad, degi, igar-innikimalad oyolemai guoed. 17 Igar-napiragwadi, bega gwage-bogidikid ukoed. Baisur-itoge be-imakoed, degisadegu dobsuli-nanadii be-imakoed. 18 An-dulamar neg-bogidikidgi-gudii gumaloed, nega-nuedgi-mamai gumaloed, neg-boo-itolegedgi-obunnomamai gumaloed. 19 Ar amba sapurdi egi dii-gwamakaled babatidoed-inigwele, bela neggwebur ibitogoed-inigwele, bemargindi nued binsalemarsun. 20 Bemar, dii-gakanaba-ibmar-digmaladi, moli-bebe-nikad-alugwasualed-esikar-imakdimaladi, degi, moli-uayasuid-esikar-imakdimaladi, bemargindi nued binsalemarsun.