KÖLFEL 67

¹ Ai Kot, kopwe ümöümöch ngenikem o afeiöchükem, kopwe netiu wom fän om kirikiröch,

² pwe aramas won fanüfan repwe silei letipom, nge chon ekewe mwü meinisin repwe silei om we angangen amanaua aramas.

³ Chon ekewe mwü repwe mwareituk, ai Kot, chon ekewe mwü meinisin repwe mwareituk.

⁴ Chon ekewe mwü repwe pwapwa o köl fän ar pwapwa, pun en ka apwüngü chon fanüfan fän pwüng, ka pwal emweni chon ekewe mwü won fanüfan.

⁵ Chon ekewe mwü repwe mwareituk, ai Kot, chon ekewe mwü repwe mwareituk.

⁶ Fanüfan a awora räs, Kot ach Kot a afeiöchükich.

⁷ Kot a afeiöchükich. Chon fanüfan meinisin repwe asamolu i.