KÖLFEL 52

¹ En mwän mi pwora, pwota ka sikäsini om föföringau? Än Kot tong a nom tori feilfeilachök.

² Ka ekiekietä usun om kopwe afeiengaua aramas. Chönawom a usun chök echö räisö mi ken, en eman chon föri angangen atuputup.

³ Ka efich mine a ngau lap seni mine a mürina, ka pwal efich kapas chofana lap seni kapas mi let.

⁴ Ka efich om kopwe afeiengaua aramas ren om kapas, en chon atuputup.

⁵ Nge Kot epwe afeiengauok tori feilfeilachök, epwe turufuk o urusukowu seni imwom. Epwe üttukowu seni fanüen chon manau.

⁶ Ekewe chon pwüng repwe küna mine epwe fis ngonuk o niuokus, mürin repwe takiriik o üra,

⁷ “Nengeni, iei i ewe mwän esap mochen eäni Kot apilükülük, nge a apilükülükü wöün mi somwola o pöchökülela lon an föföringau.”

⁸ Nge ngang üa usun efoch irä olif mi märöch me lon imwen Kot. Üa lükü än Kot tong ellet tori feilfeilachök.

⁹ Ai Kot, üpwe kilisou ngonuk tori feilfeilachök ren mine ka föri. Üpwe asilefeili ngeni noum kewe aramas pwe en ka kirikiröch. Ei üpwe föri me fän meser.