KÖLFEL 47
BSM1 Oupwe alopolop ämi chon ekewe mwü meinisin. Oupwe mweireir fän leüömong ren kölün pwapwa.
2 Sipwe niuokusiti ewe Samol mi Lapalap, Ewe mi Unusen Tekia, i eman king mi lap a nemeni unusen fanüfan.
3 A asapwilätiu chon ekewe mwü fach o atolonga ekewe mwü fän nemeniach.
4 A filätä fän itach ewe fanü sa fanüeni, ewe fanü nöün aramas ra aücheani, ir chokewe Kot a tongeer.
5 Kot a feitä ren an lenien motun king fän mweireiren pwapwa, ewe Samol mi Lapalap a feitä fän tikin rappwa.
6 Oupwe kölün mwareiti Kot, oupwe kölün mwareiti. Oupwe kölün mwareiti ach king, oupwe kölün mwareiti.
7 Pun Kot i kingen unusen fanüfan, oupwe mwareiti i ren echö köl mi pin.
8 Kot a nemeni ekewe mwü, Kot a mot won an lenien motun king mi pin.
9 Ekewe samolun ekewe mwü ra mwichefengen, ir ewe mwichen aramas nöün än Apraham we Kot. Pun ekewe kingen fanüfan nöün Kot, i a fokun tekia mwer meinisin.