KÖLFEL 149

¹ Ousipwe mwareiti ewe Samol mi Lapalap. Oupwe eäni ngeni ewe Samol mi Lapalap echö köl mi fö, oupwe kölün mwareiti i me lon ewe mwichen chon allükülük.

² Chon Israel repwe pwapwa ren ewe chon föriir. Ekewe aramasen Sion repwe mwänek ren ar king.

³ Repwe mwareiti itan fän pworuk o köl ngeni fän pisekin kaktai me ükülele.

⁴ Pun ewe Samol mi Lapalap a pwapwaäsini nöün aramas, a alinga ekewe chon tipetekison ren win.

⁵ Ekewe chon pin repwe meseik lon ling, repwe köl fän pwapwa lon kier kewe.

⁶ Kapasen mwareiti Kot fän leüömong epwe nom lon awer, nge ekewe ketilas mi seisei me rüepek repwe nom lon pöür,

⁷ pwe repwe ngeni chon ekewe mwü chappen ar föför o apwüngü ekewe aramas.

⁸ Repwe föti ar kewe king ren sein, nge ar kewe aramas tekia ren selimächä,

⁹ pun repwe eäni apwüng wor usun Kot a fen allük. Ren ei nöün kewe mi pin meinisin ra ling ren. Ousipwe mwareiti ewe Samol mi Lapalap.