KÖLFEL 138

¹ Ai Samol mi Lapalap, üa kilisou ngonuk ren unusen lelukei. Üa kölün mwareituk me fän mesen ekewe kot.

² Üa chapetiu ngeni imwom mi pin o kilisou ngeni itom, pokiten om tong ellet me om allükülük. Pun en ka atekiatä itom me om kapas asen ekewe mettoch meinisin.

³ Lupwen üa kökkö, ka pälüeniei, ka apworaei o apöchöküla lelukei.

⁴ Ai Samol mi Lapalap, ekewe king won fanüfan meinisin repwe mwareituk, pun ra rongorong om kapas.

⁵ Iwe, repwe kölü om kewe föför, pun a tekia lingom.

⁶ Inamwo ika ka fokun tekia, ka afäli ekewe chon tekison. Nge ka silleni ekewe chon lamalamtekia me toau.

⁷ Nge are üa nom lon riaföü, en ka tümwünü manauei. Ka ü ngeni ekewe chon oputaei mi song ngeniei o amanauaei ren om manaman.

⁸ Ai Samol mi Lapalap, kopwe apwönüetä ekiekin letipom ngeniei. Ai Samol mi Lapalap, om tong ellet a nonom tori feilfeilachök. Kosap likitala ewe angang ka popuetä.