KÖLFEL 130

¹ Ai Samol mi Lapalap, üa siö ngonuk seni lon ekewe leni mi alolol.

² Ai Samol, kopwe rongorong mweliei. Kopwe aü selingom ngeni ai kewe tüngor pwe kopwe ümöümöch ngeniei.

³ Are en, äm Samol mi Lapalap, kopwe maketiu äm kewe tipis, iö epwe tongeni manau?

⁴ Nge en ka amusala äm tipis, pwe aipwe niuokusituk.

⁵ Üa fokun witiwiti ewe Samol mi Lapalap, üa apilükülükü an kapas.

⁶ Üa witiwiti ewe Samol, lap seni än ekewe chon mas witiwiti an epwe ränila, lap seni än ekewe chon mas witiwiti an epwe ränila.

⁷ Ämi chon Israel, oupwe apilükülükü ewe Samol mi Lapalap. Pun tong ellet a nom ren ewe Samol mi Lapalap, a pwal watte an angangen amanaua aramas.

⁸ I epwe amanaua chon Israel seni ar tipis meinisin.